KUA inangaro a Iosepha i te kite me te vai ra rai te tu kino e te tangi kore o tona au tuakana e 10. No reira kua karanga aia e: ‘E au tangata kimi muna kotou. Aere mai kotou i te akara i te au ngai o to matou enua kare e paruru.’

‘Kare matou i te aronga kimi muna,’ i na ratou ei. ‘E aronga tuatua tika matou. E au teina tuakana matou. E 12 matou. Okotai i mate, e tei te kainga to matou teina openga i to matou papa.’

Kua maani a Iosepha e kare aia e irinaki ana ia ratou. Kua tapu mai aia ia Simeona ki roto i te areauri, e kua tuku ia ratou pouroa kia apai i te kai e kia oki ki te kainga. Tera ra kua akakite aia kia ratou e: ‘Me oki mai kotou, e apai mai kotou i to kotou teina openga.’

I te tae atu anga ratou ki Kanaana, kua akakite ratou i te au mea pouroa tei tupu ki to ratou papa kia Iakoba. Kua taitaia tikai a Iakoba. ‘Kua mate a Iosepha,’ i aue ei aia, ‘e kare ua a Simeona i teianei. Kare au e akatika ia kotou kia apai i taku tamaiti openga ia Beniamina.’ Inara i te pou anga ta ratou kai, kua tuku a Iakoba ia ratou kia apai ia Beniamina ki Aiphiti kia rauka akaou mai tetai kai na ratou.

Kua kite akaou atu a Iosepha i tona au tuakana e aere maira. Rekareka tikai aia i te kite atu anga i tona teina ia Beniamina. Tera ra, kare rai ratou i kite ake e ko Iosepha teia tangata puapinga. Teianei kua rave a Iosepha i tetai mea kia timata i te tu o tona au tuakana e 10.

Kua akakite aia ki tona au tavini kia akaki pouroa i ta ratou pute ki te kai. Ma te kore ratou i kite, kua tuku katoaia tana kapu ario ki roto i te pute a Beniamina. Muri ake i to ratou akaruke anga e kare i mamao roa te aere anga, kua tono a Iosepha i tona au tavini kia arumaki ia ratou. I te rokoia atu anga ratou, kua karanga atu te au tavini e: ‘Eaa kotou i keia ai i te kapu ario a to matou pu?’

‘Kare matou i keia ana i tana kapu,’ i na te au tuakana pouroa mai ei. ‘Me kitea mai e kotou te kapu i tetai ua atu ia matou, e ta i te reira tangata.’

I reira kua kimi te au tavini i roto i te au pute pouroa, e kua kitea te kapu i roto i te pute a Beniamina, mei taau rai e kite ra i konei. Kua karanga te au tavini e: ‘E aere kotou pouroa, ko Beniamina ra ka aru mai aia ia matou.’ Eaa ra ta te au tuakana e 10 ka rave i teianei?

Kua oki pouroa atu ratou e Beniamina ki ko i te are o Iosepha. Akakite a Iosepha ki tona au tuakana e: ‘E oki pouroa kotou ki te kainga, ko Beniamina ua te ka noo mai ei tuikaa naku.’

Kua tuatua mai i reira a Iuda, e kua karanga e: ‘Me oki au ki te kainga e kare teia tamaiti, ka mate toku papa no te mea e tamaiti akaperepere teia nana. No reira kia tika ia koe e tapu mai iaku ei tuikaa naau, inara e tuku i te tamaiti kia oki ki te kainga.’

Te kite ra i reira a Iosepha e kua taui tona au tuakana. Kare o ratou tu kino akaou e te tangi kore. Ka akara tatou e eaa ta Iosepha i rave i teianei.