TE MARO nei teia au tane i te au tangata kia angaanga. Akara ana i tera tangata e papa ra i tetai tangata angaanga ki te uepu! E pamiri te aronga angaanga no Iakoba, tei kapikiia e e ngati Iseraela. E te aronga e maro ra ia ratou kia angaanga e au tangata Aiphiti. Kua riro te ngati Iseraela ei tuikaa na to Aiphiti. Akapeea teia i tupu ei?

No te au mataiti e manganui kua noo au ua te pamiri maata o Iakoba i Aiphiti. Na Iosepha te tangata puapinga roa atu i Aiphiti, i raro ua ake ia Pharao te ariki, i akono ia ratou. Tera ra kua mate a Iosepha. E Pharao ou to Aiphiti tei riro mai ei ariki, e kare aia e inangaro ana i te ngati Iseraela.

No reira kua akariro teia Pharao kino i te ngati Iseraela ei au tuikaa. E kua tuku aia i te au tangata kino e te tangi kore ei akaaere ia ratou. Kua maro ratou i te ngati Iseraela kia angaanga pakari i te patu i te au oire no Pharao. Inara te maata aere ua atura te ngati Iseraela. Muri mai i tetai taime, kua mataku to Aiphiti e ka maata roa atu te ngati Iseraela e te ririnui katoa.

Kua kite koe e eaa ta Pharao i rave? Kua tuatua aia ki te nga vaine e tauturu ra i te au mama Iseraela me anau ta ratou au pepe, i te karanga anga e: ‘E ta korua i te au pepe tamaroa pouroa ka anau mai.’ Tera ra e nga vaine meitaki teia, e kare raua i inangaro i te ta i te au pepe.

No reira kua akaue a Pharao i tona iti tangata e: ‘E rave i te au pepe tamaroa Iseraela e ta ia ratou. Akaruke ua mai i te au pepe tamaine kia ora.’ Kare ainei tera i te akaueanga kino? Ka akara tatou e akapeea tetai pepe tamaroa i ora mai ei.