TUANGA 3
Akaoraanga mei Aiphiti ki te Ariki Mua o Iseraela
Kua arataki a Mose i to Iseraela mei te tuikaa i Aiphiti ki te Maunga i Sinai, te ngai i oronga ai te Atua i tana au ture kia ratou. Muri mai, kua tono a Mose e 12 tane kia tutaka i te enua o Kanaana. Tera ra e 10 ia ratou tei oki mai e tetai ripoti kino. Kua akakeu ratou i te iti tangata kia inangaro i te oki ki Aiphiti. No to ratou akarongo kore, kua akautunga te Atua i to Iseraela kia aaere na roto i te metepara no tetai 40 mataiti.
I te openga, kua ikiia a Iosua kia arataki i to Iseraela ki roto i te enua o Kanaana. Ei tauturu ia ratou kia rauka mai te enua, kua akatupu a Iehova i te au temeio. Kua tapu aia i te vai o te Kauvai Ioridana kia kore e tae, kua akapueuia te au patu o Ieriko, e kua akanoo ua i te ra ki taua ngai rai no te ra katoa. Muri ake i te ono mataiti, kua raveia te enua mei te iti tangata Kanaana.
Akamata mai mei ia Iosua, kua tutara te au akava ki rungao i to Iseraela no te 356 mataiti. Ka apii tatou no runga i te manganui anga ia ratou, tei kapiti mai ia Baraka, Gideona, Iepheta, Samasona e Samuela. Ka tatau katoa tatou no runga i te au vaine mei ia Rahaba, Debora, Iaela, Ruta, Naomi e Delila. Te katoatoa o te Tuanga TORU kua pou e 396 mataiti o te tuatua enua.
I ROTO I TEIA TUANGA
TUA 36
Punua Puakatoro Auro
Eaa ra te tangata ka akamori ei i tetai tiki tei maaniia ki te au poe auro?
TUA 38
E 12 Tangata Tutaka
E tai ngauru aronga tutaka tei akakite i te nuti kino, e rua e apinga ke ta raua i tuatua. Koai ta te ngati Iseraela ka irinaki?
TUA 39
Puera Tiare te Rakau a Aarona
Akapeea tetai rakau te akatupu anga i te tiare e te ua i tera mai popongi?
TUA 44
Uuna Rahaba i Nga Tangata Tutaka
Akapeea Rahaba te tauturu anga ia raua, e eaa tana i pati ia raua kia rave?
TUA 45
Tikoti i te Kauvai Ioridana
Tupu tetai temeio te takai anga te kau taunga ki roto i te kauvai.
TUA 47
Te Keia i Iseraela
Ka rauka ainei e okotai tangata kino i te akatupu te tumatetenga ki te iti tangata katoa?
TUA 48
Tu Karape o to Gibeona
Akavare ratou ia Iosua e te ngati Iseraela kia papau i tetai koreromotu, e kua rave to Iseraela i ta ratou i taputou.
TUA 50
Nga Vaine Toa
Na Baraka i arataki i te nuku vaeau o Iseraela, inara eaa a Iaela i akameitakiia ai?
TUA 52
Gideona e Tona 300 Tangata
Iki te Atua i te au vaeau no teia nuku meangiti na te akara akapeea ratou me inu vai.
TUA 53
Te Taputou a Iepheta
Riro tana i taputou ei taui i tona oraanga, pera te oraanga o tana tamaine.
TUA 55
Tamaiti Meangiti tei Tavini i te Atua
Taangaanga te Atua i te tamaiti ko Samuela ei akakite i tetai karere teiaa ki te Taunga Maata a Eli.
