AKARA ana e eaa ta teia tangata e tanu nei i roto i tona puakapa! E kakau manea, e potonga auro e tetai au ario. Kua rave mai aia i teia mei te oire i Ieriko. Inara eaa tikai tei akakoroia no te au apinga i Ieriko? Te maara ra ia koe?

Kua akakoroia kia takore takiriia te reira, e kia tukuia te auro e te ario ki roto i te vairanga apinga i ko i te tapenakara o Iehova. No reira kua akarongo kore teia au tangata i te Atua. Kua keia ratou i te apinga a te Atua. Ko Akana te ingoa i teia tangata, e te aronga i ko iaia e au mema ratou no tona kopu tangata. Ka akara ana tatou e eaa tei tupu.

Muri ake i te keia anga a Akana i teia au apinga, kua tono a Iosua i tetai au tangata kia tamaki i te oire o Ai. Inara kare ratou i autu i teia tamaki. Kua mate tetai pae, e kua oro ke te toenga. Taitaia tikai a Iosua. Kua tipapa aia ki runga i te one e kua pure kia Iehova: ‘Eaa koe i akatika ai i teia kia tupu kia matou?’

Pau mai a Iehova e: ‘E tu ki runga! Kua ara to Iseraela. Kua keia ratou i tetai au apinga tei akakoroia kia takoreia me kore kia tukuia ki roto i te tapenakara o Iehova. Kua keia ratou i tetai kakau manea e kua uuna i te reira. Kare au e akameitaki ia koe kia takore roa koe i te reira, e te tangata nana i rave i te reira.’ Akakite a Iehova e ka akaari aia kia Iosua e koai taua tangata kino ra.

I reira kua akaputuputu mai a Iosua i te au tangata pouroa, e kua akaari mai a Iehova e ko Akana te tangata kino. Karanga atura a Akana e: ‘Kua ara au. Kua kite au i te kakau manea, e te potonga auro e tetai au ario. Kua inangaro tikai au i te reira, e kua rave iora au. Ka kite koe i te reira, kua tanuia ki roto i toku puakapa.’

I te kite angaia teia au apinga e kua apaiia mai kia Iosua, kua karanga aia kia Akana e: ‘Eaa koe i akatupu ei i te tumatetenga kia matou? Teianei ka apai mai a Iehova i te tumatetenga kia koe!’ I reira kua aere mai te iti tangata pouroa kua pepei ia Akana pera katoa tona kopu tangata ki te toka, kia mate. Kare ainei tera e akaari mai ana e auraka rava tatou e rave i tetai apinga kare na tatou?

Muri ake kua oki atu to Iseraela i te tamaki ia Ai. Teia taime kua tauturu a Iehova i tona iti tangata, e kua autu ratou i te tamaki.