KUA kite koe e eaa ta te tangata e koi ra i runga i te one? A te kiona ua te reira. E teatea te kara o te reira, angiangi e te atiati ua. Kare ra oki i te kiona; e apinga kai ra.

Mei te okotai ake rai marama te akaruke anga te ngati Iseraela ia Aiphiti. Tei roto ratou i te metepara. Kare e maata ana te kai e tupu ra i reira, no reira te tangata i kopekope ei te karanga anga e: ‘Naringa ua ake a Iehova i tamate ia matou i Aiphiti. Tei reira oki te au kai pouroa ta matou e inangaro ra.’

No reira kua karanga a Iehova e: ‘Ka akatopa mai au i te kai no runga i te rangi.’ E kua rave a Iehova i teia. I tera mai popongi i te kite anga to Iseraela i teia apinga teatea tei pururu mai, kua ui ratou tetai ki tetai e: ‘Eaa ra teia?’

Karanga mai a Mose e: ‘Ko te kai teia ta Iehova i oronga mai na kotou ei kai.’ Kua kapiki te tangata i te reira e e MANA. Mei te keke angiangi rai tei maaniia ki te rango tona tongianga.

‘E koi kotou kia rava meitaki ei kai na te tangata tataki tai,’ i akakite ei a Mose ki te tangata. No reira, ta ratou ia e rave ana i te au popongi. I na me vera mai te ra, e tae ana te mana ka toe mai i runga i te one.

Kua akakite katoa a Mose e: ‘Auraka rava tetai tangata e akaruke i te mana no tera mai ra.’ Kare ra oki tetai au tangata i akarongo ana. Kua kite koe e eaa tei tupu? I tera mai popongi ko te mana ta ratou i akaruke, kua ki i te iro e kua akamata i te aunga kino!

E tai ra oki ra i te epetoma ta Iehova i akakite kia ratou kia takirua atu te maata o te mana ka koi. Ko te ra ono teia. E kua karanga a Iehova kia akaruke i tetai o te reira no tera mai ra, no te mea kare aia e akatopa mai i tetai i te ra itu. I to ratou akaruke anga i te mana no te itu o te ra, kare te reira i ki ana i te iro e kare i aunga kino ana! E temeio akaou teia!

I te au mataiti pouroa o te iti tangata o Iseraela i roto i te metepara kua angai a Iehova ia ratou ki te mana.