ME O to Iseraela ki roto i te manamanata, e kapiki ana ratou ia Iehova. E pau mai ana a Iehova ia ratou na te oronga anga mai i te au arataki toa kia tauturu ia ratou. E kapiki ana te Pipiria i teia au arataki e e au akava. Ko Iosua te akava mua, e ko tetai au akava i muri ake iaia ko Oteniela, Ehuda e Samagara. Inara e rua nga vaine tei tauturu i to Iseraela, ko Debora raua ko Iaela.

E vaine peroveta a Debora. E oronga ana a Iehova i te akakiteanga kiaia no runga i te tuatau ki mua, e oti nana e akakite ki te iti tangata i ta Iehova i tuatua mai. E akava katoa a Debora. E noo ana aia ki raro i tetai pu nu tamara i te maunga, e e aere mai ana te tangata kiaia i te kimi tauturu no to ratou au manamanata.

I teia tuatau ko Iabina te ariki o Kanaana. E 900 ona kariota tamaki. E ririnui tikai tona nuku vaeau e e manganui te au tangata Iseraela tei maroia kia riro ei au tavini no Iabina. Ko Sisera te ingoa o te rangatira o te nuku vaeau o te Ariki ko Iabina.

I tetai ra kua tiki a Debora i te Akava ko Baraka, e kua akakite atu kiaia e: ‘Te tuatua maira a Iehova e: “E apai koe e 10,000 tangata e e arataki ia ratou ki te Maunga ko Tabora. Ka apai atu au ia Sisera ki ko ia koe. E ka oronga atu au i te re kia autu koe ki rungao iaia e tona nuku vaeau.”’

Akakite a Baraka kia Debora e: ‘Ka aere au me ka aru mai koe iaku.’ Kua aru atu a Debora, inara kua akakite aia kia Baraka e: ‘Kare te akameitakianga e aere kia koe no teia autuanga, no te mea ka oronga a Iehova ia Sisera ki roto i te rima o tetai vaine.’ E kua tupu rai teia.

Kua aere a Baraka mei runga mai i te Maunga Tabora i te aravei i te au vaeau o Sisera. Kua akatupu poitirere ua mai a Iehova i tetai vaipuke, e kua maremo te au vaeau enemi e manganui. Inara kua eke a Sisera no runga i tona kariota e kua oro.

Tetai taime i muri mai kua aere mai a Sisera ki ko i te puakapa o Iaela. Kua pati a Iaela iaia ki roto, e kua oronga atu i te u kia inu aia. Kua riro teia ei akavarea moe iaia, e kare i roa kua varea aia e te moe. I reira kua rave a Iaela i tetai rakau puakapa e kua patia i te reira ki roto i te katu o teia tangata kino. Muri mai, i te tae mai anga a Baraka, kua akaari atu aia i te tangata tei mate ko Sisera! No reira te kite ra koe e kua tika rai te tuatua a Debora.

I te openga kua tamate katoaia te Ariki ko Iabina, e no tetai tuatau kua rauka akaou te au i to Iseraela.