NA TEAA e maani ra i te patu o Ieriko kia pururu? Mei te mea rai e kua pomuia te reira. Tera ra kare e pomu i taua tuatau ra; kare rai oki e pupui. E temeio akaou teia na Iehova! Ka akara tatou e i akapeea teia i tupu ei.

Akarongo ana i te tuatua a Iehova kia Iosua: ‘E aere koe e toou au tangata tamaki takapini i te oire. E aere koe takapini i te oire okotai taime i te ra, no te ono ra. Apai kotou i te aruna koreromotu. E aere e itu taunga na mua ake i te reira, e e akatangi ratou i ta ratou pu.

‘I te itu o te ra, e aere kotou takapini i te oire e itu taime. E oti e akatangi i te pu kia roa, e e maani i te katoatoa kia ava ma te reo maata tikai. Ka pururu takiri mai i reira te patu!’

Kua rave a Iosua e te au tangata i ta Iehova i tuatua mai. Ia ratou e aere ra, muteki ua te katoatoa. Kare roa e tangata i komakoma ana. Ko te tangi pu ua e te aronga e mati ra tei akarongoia atu. Kare e kore e kua mataku te enemi o te iti tangata o te Atua i roto i Ieriko. Te kite ra koe i tera taura muramura e tautau maira mei roto i te maramarama? Noai ra tera maramarama? Ae, kua rave a Rahaba i ta te nga tangata tutaka i akakite kiaia. Pouroa tona kopu tangata tei roto i te are e akara ua maira e ia.

I te openga, i te itu o te ra, muri ake i te aere anga takapini i te oire e itu taime, kua tangi te pu, kua ava te au tangata tamaki, e kua pururu te patu. I reira, akakite a Iosua e: ‘Tamate i te katoatoa rava i roto i te oire, tau i te reira ki te ai. Tau i te au apinga pouroa. Akaruke ua mai i te ario, te auro, te veo e te auri, tuku i te reira ki roto i te vairanga apinga o te puakapa o Iehova.’

Ki te nga tangata tutaka, kua akakite a Iosua e: ‘Aere ki roto i te are o Rahaba, arataki mai iaia e tona kopu tangata ki vao.’ Kua akaoraia a Rahaba e tona kopu tangata, mei ta te nga tangata tutaka tikai i taputou kiaia.