KUA o teia nga tangata ki roto i te manamanata. Me mou raua, ka tamateia raua. E nga tangata tutaka Iseraela raua, e ko Rahaba te vaine e tauturu ra ia raua. E noo ana a Rahaba i roto i tetai are i runga i te patu o te oire ko Ieriko. Ka akara tatou i te tumu i o ei teia nga tangata ki roto i te manamanata.

Kua papa to Iseraela i te aere atu ki tetai tua i te Kauvai Ioridana ki roto i te enua o Kanaana. Inara i mua ake ka aere ei ratou, kua tono a Iosua i te nga tangata tutaka. Akakite aia kia raua e: ‘Ka aere korua e tutaka i te enua e te oire ko Ieriko.’

Te tae anga mai nga tangata tutaka ki roto i Ieriko, kua aere atu raua ki te are o Rahaba. Tera ra kua akakite tetai tangata ki te ariki o Ieriko e: ‘E rua nga tangata Iseraela i aere mai i teia po i te tutaka i te enua.’ Tona akarongo anga i teia, kua tono te ariki i te au tangata ki ko ia Rahaba, e kua akaue atu iaia: ‘E apai mai koe i te nga tangata tei aere mai ki roto i toou are!’ Inara kua uuna a Rahaba i nga tangata tutaka ki runga ake i tona are. No reira kua karanga aia e: ‘Aere mai ana tetai nga tangata ki konei i toku are, inara kare au i kite e noea mai raua. Kua aere raua i te akapoiri anga, mua ake ka topiriia ai te ngutupa o te oire. Me taviviki kotou, ka mou raua ia kotou!’ E kua arumaki atu taua aronga tangata ra ia raua.

Muri ake i to ratou aere anga, kua taviviki atu a Rahaba ki runga ake i tona are. ‘Kua kite au e ka oronga a Iehova i teia enua kia kotou,’ i akakite ei aia ki nga tangata tutaka. ‘Kua akarongo matou e kua tamaro aia i te Tai Muramura i te akaruke anga kotou ia Aiphiti, e kua tamate aia i te ariki o Sihona e Oga. Kua takinga meitaki au ia korua, no reira e taputou mai korua kiaku, e ka takinga meitaki korua iaku. E akaora i toku papa e toku mama, pera toku au tungane e te au teina.’

Kua taputou nga tangata tutaka e ka rave raua i te reira, inara kia rave katoa a Rahaba i tetai apinga. ‘Apai i teia taura muramura, tapeka ki runga i toou maramarama,’ i karanga ai nga tangata tutaka, ‘e oti e akaputuputu mai i toou kopu tangata pouroa ki roto i toou are. Me oki mai matou i te rave ia Ieriko, ka kite matou i teia taura muramura i roto i toou maramarama e kare matou e tamate i tetai ua atu tangata i roto i toou are.’ I te oki anga nga tangata tutaka ki ko ia Iosua, kua akakite raua i te au mea pouroa tei tupu.