I ROTO i te Pipiria ka kite koe i tetai puka tei tapaia te ingoa o Ruta. E tua te reira no tetai pamiri tei noo ana i te tuatau e au akava to Iseraela. E vaine mapu a Ruta no te enua o Moabi; kare aia no roto i te iti tangata o te Atua ko Iseraela. Inara i te apii anga a Ruta no runga i te Atua mou ko Iehova, kua inangaro maata tikai a Ruta iaia. E vaine pakari mai a Naomi tei tauturu ia Ruta kia kite no runga ia Iehova.

E vaine Iseraela a Naomi. Kua aere atu raua ko tana tane, e tana tamariki tamaroa e rua ki te enua o Moabi, i te tuatau kare e maata ana te kai i Iseraela. I reira, i tetai ra kua mate te tane a Naomi. Muri mai kua akaipoipo nga tamaroa a Naomi i tetai nga tamaine Moabi, ko Ruta raua ko Orapa. Inara muri ake i tetai 10 mataiti, kua mate nga tamaroa a Naomi. Taitaia tikai a Naomi e te nga tamaine! Eaa i reira ta Naomi ka rave i teianei?

I tetai ra kua iki a Naomi i te oki ki tona kainga mamao, ki tona uaorai iti tangata. Inangaro a Ruta e Orapa i te noo atu ki ko iaia, no reira kua aru katoa atu raua iaia. Inara kare ratou i roa ana i runga i te mataara, kua uri atu a Naomi e kua tuatua atu ki nga tamaine e: ‘E oki ki te kainga i to korua nga mama noo ei.’

Kua ongi a Naomi i te nga tamaine kia oki raua. Kua aue raua, no te mea e inangaro maata tikai to raua ia Naomi. Kua karanga raua e: ‘Kare! Ka aru maua ia koe ki toou iti tangata.’ Inara kua pau atu a Naomi e: ‘E oki korua, e taku nga tamaine. E ngari ake korua i ko i to korua kainga.’ I reira kua oki a Orapa ki te kainga. Kare ra a Ruta i oki ana.

Kua uri a Naomi kiaia e kua karanga e: ‘Kua oki a Orapa. E aru katoa koe iaia ki te kainga.’ Tera ra kua pau a Ruta e: ‘Auraka koe e maani kia akaruke au ia koe! Tuku mai koe kia aru au ia koe. Taau ngai ka aere, ka aere rai au e taau ngai ka noo, ka noo rai au ki reira. Toou iti tangata, ko toku rai ia iti tangata, e toou Atua, ko toku ia Atua. Te ngai ka mate koe ei reira katoa au mate ei, e kia tanu katoaia au ki reira.’ Te akakite anga a Ruta i teia kia Naomi, kare aia i maro akaou atu ana iaia kia oki ki te kainga.

I te openga kua tae atu teia nga vaine ki Iseraela. I reira raua noo ei. Kua akamata vave a Ruta i te angaanga i roto i te au kainga, no te mea e tuatau koi kerite te reira. Kua akatika tetai tangata ko Boaza te ingoa kia koi aia i te kerite koia oki i te titona i roto i tona au kainga. Kua kite koe i te ingoa o te mama o Boaza? Ko Rahaba, no te oire ko Ieriko.

I tetai ra kua akakite a Boaza kia Ruta e: ‘Kua akarongo au i te au tuatua pouroa no runga ia koe e toou tu takinga meitaki ia Naomi. Kua kite au e kua akaruke koe i toou papa e toou mama e toou uaorai enua e kua aere mai kia noo ki rotopu i tetai iti tangata, kare rava koe i kite ana i mua ana. Kia akameitaki mai a Iehova ia koe!’

Kua pau atu a Ruta e: ‘E tangata takinga meitaki tikai koe iaku. Kua riro taau tuatua ei akapumaana mai iaku.’ Maata tikai to Boaza inangaro ia Ruta, e kare i roa ana kua akaipoipo raua. Kua mataora tikai a Naomi i teia! Tera ra i mataora atu a Naomi i te anau anga a Ruta e Boaza i ta raua tamaiti mua, ko Obeda. Muri mai kua riro a Obeda ei papa ruau no Davida, ta tatou ka apii maata atu i muri mai.