KUA kite koe i te ingoa o te tangata ririnui roa atu tei ora ana? E akava aia ko Samasona tona ingoa. Na Iehova i oronga i to Samasona ririnui. I mua ake ka anauia ai a Samasona, akakite a Iehova ki tona mama e: ‘Kare e roa atu ka anau koe i tetai tamaiti. Nana e arataki i to Iseraela kia ora mei te ngati Philiseti.’

E iti tangata kino tikai te ngati Philiseti, e noo ana ratou i Kanaana. E maata to ratou au tangata tamaki, e kua tamamae tikai ratou i to Iseraela. I tetai ra, ia Samasona e aere atura ki te ngai e noo ana te ngati Philiseti, kua oro mai tetai aka riona maatamaata ma te ngunguru ki ko iaia. Inara kua ta a Samasona i te riona ki tona nga rima ua. Kua tamate katoa aia me eia anere ua atu au tangata Philiseti kino.

Muri mai kua mate mate a Samasona i te inangaro i tetai vaine ko Delila te ingoa. Kua taputou te au arataki o te ngati Philiseti e ka oronga ratou tataki tai e 1,100 ario na Delila me akakite atu aia kia ratou e noea to Samasona ririnui. Kua inangaro a Delila i tera moni pouroa. Kare aia i te oa mou tikai no Samasona, me kore no te iti tangata o te Atua. No reira kua ui ua rai aia kia Samasona e noea tona ririnui.

Te openga, kua rauka ia Delila i te maani ia Samasona kia akakite mai i te muna o tona ririnui. ‘Kare rava toku rouru i tipuia ana,’ i karanga ai aia. ‘Mei te taime mai i anauia ai au, kua iki te Atua iaku ei tavini akaperepere nona tei kapikiia e e Nazira. Me tipuia toku rouru, ka ngaro toku ririnui.’

Ina, i te kite anga a Delila, kua tamoe aia ia Samasona ki runga i tona ua. I reira kua kapiki aia i tetai tangata kia aere mai e tipu i te rouru o Samasona. I te ara anga mai a Samasona, kua ngaro tona ririnui. Kua aere mai i reira to Philiseti kua opu iaia. Kua ko ratou i tona nga mata, e kua akariro iaia ei tuikaa na ratou.

I tetai ra kua rave to Philiseti i tetai tamataora anga maata i te akamori i to ratou atua ko Dagona, e kua apai mai ratou ia Samasona no roto i te areauri kia aviri ratou iaia. Te taime i aereia, kua tupu akaou te rouru o Samasona. Kua akakite a Samasona ki te tamaiti e arataki ra iaia e: ‘E tuku ana kia amiri ake au i nga poupou e mou ra i te are.’ I reira kua pure a Samasona kia Iehova no te ririnui, e kua mou i nga poupou o te are. Kua kapiki maata aia e: ‘E tuku ana iaku kia mate e to Philiseti.’ E 3,000 Philiseti i ko i te tamataora, e i te piko anga a Samasona i te opara i nga poupou, kua inga te are ki raro e kua mate pouroa teia au tangata kino.