KUA kite koe e eaa te tumu i pure ei teia tangata kia Iehova? Eaa ra aia i tuku ei i teia au reta ki mua i te atarau o Iehova? Ko Hezekia teia tangata. E ariki aia no nga kopu e rua o te pae apatonga o Iseraela. E maata tikai tona manamanata. No teaa ra?

No te mea kua takore takere te nuku vaeau o Asura i te au kopu 10 o te pae apatokerau. Kua akatika a Iehova i teia kia tupu no te mea e kino tikai taua au tangata ra. E teianei te aere maira te nuku vaeau o Asura i te tamaki i te patireia o te nga kopu e rua.

Koi tuku ua maira te ariki o Asura i tetai au reta ki te Ariki ko Hezekia. Ko teia te au reta ta Hezekia i tuku ki mua i te aroaro o te Atua. Te tatiaeae maira teia au reta ia Iehova, e te akakite ra kia Hezekia kia tuku i te au. No reira a Hezekia i pure ei e: ‘E Iehova e, akaora mai ia matou mei te ariki o Asura. I reira te au pa enua pouroa e kite ei e ko koe anake ua te Atua.’ Ka akarongo mai ainei a Iehova ia Hezekia?

E ariki meitaki a Hezekia. Kare aia i aite ki te au ariki kino o te patireia o te au kopu 10 o Iseraela, me kore ki tona papa kino ko te Ariki ko Ahaza. Kua akarongo meitaki tikai a Hezekia i te au ture pouroa a Iehova. No reira i muri ake i te oti anga te pure a Hezekia, kua tuku mai te peroveta ko Isaia i teia karere kiaia mei ko mai ia Iehova: ‘Kare te ariki o Asura e tae mai ki Ierusalema. Kare rava tetai ua atu o tona vaeau e vaitata mai ki reira. Kare roa tetai kakao a ratou e ana ia mai ki roto i te oire.’

Akara ana ra i te tutu i runga i teia kapi. Kua kite koe e koai ma teia au vaeau mate? Ko te ngati Asura. Kua tono mai a Iehova i tana angera, e i roto ua i te po okotai kua tamate te angera e 185,000 vaeau Asura. Kua tuku te ariki o Asura i te au e kua oki ki te kainga.

Kua ora te patireia o nga kopu e rua, e kua noo au ua te tangata no tetai tuatau. Inara muri ake i te mate anga o Hezekia kua riro mai tana tamaiti ko Manase ei ariki. E nga ariki kino tikai a Manase e tana tamaiti ko Amona tei tutara i muri ake iaia. No reira kua ki akaou te enua i te kino e te ta ua. I te tamate angaia te Ariki ko Amona e tona uaorai au tavini, kua riro mai tana tamaiti ko Iosia ei ariki no te patireia o nga kopu e rua.