AKARA ana ia Samuela e riringi ra i te manongi ki runga i te katu o te tangata. Ta ratou teia e rave ana ki tetai tangata i te akaari e kua ikiia aia ei ariki. Na Iehova i akakite kia Samuela kia riringi i te manongi ki runga i te katu o Saula. E manongi puapinga teia e te kakara tikai.

Kare a Saula i manako ana e ka tau aia ei ariki. ‘No te kopu au o Beniamina, te kopu meangiti roa atu i Iseraela,’ i karanga ai aia kia Samuela. ‘Eaa koe i karanga mai ei e ka riro au ei ariki?’ Kua inangaro a Iehova ia Saula no te mea kare aia e akamea ana e e tangata maata aia e te puapinga. Te tumu tera i iki ei Aia iaia ei ariki.

Inara kare a Saula i te tangata putaua me kore i te tangata poto. No roto mai aia i tetai ngutuare tangata apinganui, e e tangata manea aia e te roangarere. Mei te okotai tapuae aia i te roangarere atu i tetai ua atu tangata i Iseraela! E tangata viviki katoa a Saula i te oro, e e tangata matutu tikai. Rekareka tikai te tangata no tei iki a Iehova ia Saula ei ariki. Kua akamata ratou pouroa i te ava e: ‘Kia ora te ariki!’

Te ririnui ra rai te au enemi o Iseraela. Te akatupu ra rai ratou i te pekapeka ki to Iseraela. Kare i roa i muri mai i te akariroia anga a Saula ei ariki, kua aere mai te ngati Amona e tamaki mai ia ratou. Tera ra kua akaputuputu mai a Saula i tetai nuku vaeau maata, e kua autu aia i rungao i te ngati Amona. Kua rekareka tikai te tangata e ko Saula te ariki.

I te au mataiti i aereia, kua arataki a Saula i to Iseraela ki te au autuanga maata tikai i rungao i to ratou au enemi. E tamaiti mataku kore katoa ta Saula ko Ionatana. E kua tauturu a Ionatana ia Iseraela kia re i te au tamaki e manganui. Ko te Philiseti rai te enemi kino roa atu o te ngati Iseraela. I tetai ra kua aere mai e tauatini e tauatini ua atu Philiseti i te tamaki ia Iseraela.

Akakite a Samuela kia Saula kia tiaki iaia kia tae mai, ka oronga ai i te atinga me kore i te apinga aroa kia Iehova. Inara kare a Samuela i tae vave mai ana. Kua mataku a Saula e ka akamata te Philiseti i te tamaki mai, no reira kua oronga aia uaorai i te atinga. I te tae mai anga a Samuela, kua akakite aia kia Saula e kua akarongo kore a Saula. ‘Ka iki a Iehova i tetai tangata ke ei ariki ki rungao ia Iseraela,’ i karanga ai a Samuela.

Muri mai kua akarongo kore akaou a Saula. No reira a Samuela i akakite ei kiaia e: ‘E meitaki atu i te akarongo ia Iehova i te oronga kiaia i te mamoe meitaki roa ei apinga aroa. No te mea kare koe i akarongo ia Iehova, kare a Iehova e vaoo ia koe ei ariki no Iseraela.’

Ka rauka ia tatou tetai apiianga meitaki mei teia. Te akaari maira teia kia tatou i te puapinga o te akarongo ua rai kia Iehova. Te akaari katoa maira e, ko tetai tangata meitaki mei ia Saula rai, ka taui e ka riro ei tangata kino. Kare roa tatou e inangaro kia riro ei aronga kino, me kare ainei?