KUA apai te Ariki ko Nebukaneza i te au tangata apii meitaki ravaia atu o te ngati Iseraela ki Babulonia. Muri mai kua iki te ariki i te aronga mata manea roa atu e te au mapu tane marama roa atu mei roto ia ratou. E a o teia au tamariki tamaroa ko taau ia e kite ra i konei. Ko Daniela tetai, e ko e tokotoru e kapiki ana to Babulonia ia ratou e ko Sadaraka, Meseka e Abedenego.

Kua parani a Nebukaneza i te tereni i teia au mapu tane kia tavini i roto i tona are ariki. Muri ake i te tereni anga no te toru mataiti ka iki aia i te aronga ua tei marama roa atu ei tauturu iaia i te akatikatika i te au manamanata. Inangaro te ariki i teia au tamariki tamaroa kia matutu e kia meitaki i te pae kopapa ia ratou e tereniia ra. I reira kua akaue aia i tona au tavini kia oronga i te kai memeitaki e te uaina ta tona pamiri e kai ra, na ratou pouroa.

Akara ana ra i te mapu ko Daniela. Kua kite koe e eaa tana e tuatua ra ki te tavini maata o Nebukaneza ko Asepenaza? Te akakite ra a Daniela kiaia e kare aia e kai i te kai memeitaki no runga i te kaingakai a te ariki. Inara kua manamanata a Asepenaza. ‘Kua iki te ariki i taau ka kai e ka inu,’ i karanga ai aia. ‘Me kare koe e akaraanga meitaki e te matutu mei tetai au mapu tane ke mai, penei ka tamate aia iaku.’

No reira kua aere a Daniela ki ko i te tiaki ta Asepenaza i tuku ei akaaere i tona au oa tokotoru. ‘E timata mai koe ia matou no te 10 ra,’ i karanga ai aia. ‘Oronga mai koe i te kai tanutanu ei kai e te vai ei inu no matou. E oti akaaite koe ia matou ki te au mapu tane ke e kai ra i te au kai a te ariki, akara koe i reira e koai tei akaraanga meitaki atu.’

Kua akatika te tiaki i te rave i teia. E i te pou anga te 10 ra, akaraanga meitaki atu a Daniela e tona au oa tokotoru i te au mapu tane ke mai. No reira kua akatika te tiaki kia kai ua ratou i te au kai tanutanu kare i te au kai ta te ariki i oronga mai.

I te openga o te toru mataiti kua apai pouroaia te au mapu tane ki ko ia Nebukaneza. Muri ake i te tuatua anga kia ratou pouroa, kua kite mai te ariki e ko Daniela e tona au oa tokotoru te aronga marama roa atu. No reira kua tapu mai aia ia ratou ei tauturu iaia i roto i te are ariki. Noatu e eaa ta te ariki uianga ka ui kia Daniela, Sadaraka, Meseka e Abedenego me kore, me oronga aia i te au manamanata ngata kia ratou, e 10 taime maata atu to ratou kite i tona au taunga me kore au tangata kite pakari.