KUA kite koe e koai teia vaine manea e aere maira i te aravei ia Davida? Ko Abigaila tona ingoa. E vaine manako meitaki aia, e kua tapu aia ia Davida kia kore e rave i tetai apinga kino. Inara i mua ake ka akara atu ei i te reira, ka akara tatou e eaa tei tupu ana kia Davida.

Muri ake i te oro anga a Davida mei ia Saula, kua pipini aia ki roto i tetai ana. Kua piri mai tona au tuakana e te toenga o tona ngutuare tangata kiaia i taua ngai ra. Mei te 400 tangata tei aere mai kiaia, e kua riro a Davida ei arataki no ratou. Kua aere i reira a Davida ki ko i te ariki o Moabi e kua karanga e: ‘E akatika mai ana koe i toku papa e toku mama kia noo ki konei ia koe, kia kite ana au e eaa te ka tupu kiaku.’ Muri mai kua akamata a Davida e tona au tangata i te pipini ki roto i te au maunga.

No muri ake i teia, i aravei ei a Davida ia Abigaila. Ko Nabala tana tane e tangata enua aia e te apinga nui. E 3,000 ana mamoe, e 1,000 puakanio. E tangata karapii a Nabala. Tana vaine ra ko Abigaila e manea tikai aia. Pera katoa, kua kite aia i te rave i te mea tika. Tetai taime akenei kua rauka iaia i te akaora i tona ngutuare tangata. Ka akara tatou e akapeea ra.

Kua takinga meitaki a Davida e tona au tangata ia Nabala. Kua tauturu ratou i te paruru i tana mamoe. No reira i tetai ra kua tono a Davida i tetai o tona au tangata kia pati i te tauturu a Nabala. Kua aere mai te au tangata o Davida kia Nabala, iaia e tona au tauturu e tipu ra i te uru o te mamoe. E ra umukai, e e maata ta Nabala au apinga memeitaki i te kai. No reira ko teia ta te au tangata o Davida i tuatua atu: ‘Takinga meitaki ana matou ia koe. Kare matou i keia ana i taau mamoe, kua tauturu ra i te akono i te reira. Ka tika ia koe kia oronga mai i tetai kai na matou.’

‘Kare au e oronga atu i taku kai na tetai aronga mei ia kotou rai,’ i tuatua mai ei a Nabala. Kua tuatua mai aia na roto i te riri e kua akakino mai ia Davida. I te oki mai anga te au tangata i te akakite kia Davida no te reira, kua riri tikai a Davida. ‘Rave mai i ta kotou koke!’ i akakite ei aia ki tona au tangata. E kua akamata ratou i te aere e ta ia Nabala e tona au tangata.

Kua akarongo mai tetai tangata o Nabala i te tuatua kino a Nabala, e kua akakite kia Abigaila i tei tupu. Te reira taime rai kua akapapa a Abigaila i tetai kai. Kua tuku ki runga i te atini e kua aere atu. Tona aravei anga ia Davida, kua eke aia ki raro mei runga i te atini, e kua tupou ki mua ia Davida e kua karanga e: ‘Auraka koe e taku pu e akamanako atu i taku tane ko Nabala. E tangata manako kore aia, e tana au mea e rave ana e au mea manako kore rai. Teia te apinga aroa. Me ka tika e apai koe i teia, e kia akakore mai koe i ta matou apa i rave.’

‘E vaine manako pakari tikai koe,’ i pau atu ei a Davida. ‘Kua tapu koe iaku kia kore e ta ia Nabala i te tutaki i tona tu kino. E oki koe ki te kainga i teianei ma te au.’ Te mate anga a Nabala, i muri mai i reira kua riro mai a Abigaila ko tetai o te au vaine a Davida.