E TUTU teia no te parataito penei mei ta te Atua rai i akaari ki tana peroveta ko Isaia. Kua ora ana a Isaia i muri ua ake ia Iona.

Te aiteanga o te parataito e “aua” me kore e “paka.” Te akamaara ra ainei teia ia koe i tetai apinga ta tatou i kite ana i roto i teia puka? Te akara anga, a te aua manea rai ta te Atua ko Iehova i maani no Adamu raua ko Eva, me kare ainei? Inara ka riro ainei te ao katoa ei parataito?

Kua akakite a Iehova ki tana peroveta ko Isaia kia tata no runga i te parataito ou e tu mai nei no te iti tangata o te Atua. Akakite aia e: ‘Ka noo kapiti ua te au ruko e te mamoe ma te au. Ka kaikai kapiti te au punua puakatoro e te au punua riona, e na te tamariki rikiriki e akono ia ratou. Kare katoa te pepe e kakatiia e te ovi poitini me kanga aia i te pae i te reira.’

‘Kare rava teia e tupu,’ i karanga ai te maata anga o te tangata. ‘I tupu ua ana te manamanata i runga nei i te enua, e ka tupu ua atu rai te reira.’ Ka akamanako ana ra i te reira: Eaa te tu o te kainga ta te Atua i oronga no Adamu raua ko Eva?

Kua tuku te Atua ia Adamu raua ko Eva ki roto i tetai parataito. No to raua akarongo kore i te Atua i ngere ei raua i to raua kainga manea, i ruaine ei e i mate ei. Kua taputou mai te Atua e ka oronga aia i taua apinga tikai tei ngere ia Adamu raua ko Eva, ki te tangata tei inangaro iaia.

I te parataito ou e tu mai nei kare e apinga e tamamae, me kore e takinoia. Ka tupu te au tinamou tikai. E au turanga meitaki e te mataora pouroa to te tangata. Ka aite mai mei ta te Atua tikai i inangaro i te akamataanga. Tera ra ka apii tatou e akapeea te Atua i te rave anga i te reira a muri mai.