AUE ana e! Te akaraanga e maata to Daniela manamanata. Inara kare te au riona i kakati iaia! Kua kite koe e eaa te tumu? Naai ra i tuku ia Daniela ki konei i te au riona? Ka akara ana tatou.

Ko te ariki o Babulonia i teianei ko Dariu te ingoa. Inangaro maata tikai aia ia Daniela no te mea e tangata takinga meitaki e te pakari a Daniela. Kua iki a Dariu ia Daniela ei akaaere maata i roto i tona patireia. Kua maani teia i tetai au tangata i roto i te patireia kia vareae ia Daniela, no reira ko teia ta ratou i rave.

Kua aere ratou ki ko ia Dariu e kua karanga e: ‘Kua akatika tatou e te ariki e, kia maaniia tetai ture i te karanga e, e 30 ra kare e tangata e pure ki tetai ua atu atua me kore tangata mari ra kia koe anake ua, e te ariki. Me kare tetai ua atu tangata e akarongo, ka titiriia aia ki ko i te au riona.’ Kare a Dariu i kite i te tumu i maani ei teia au tangata i teia ture. Inara i tona manako e mea meitaki teia, no reira kua maani aia kia tataia te ture. Teianei kare e rauka i te taui i te ture.

I te kite anga a Daniela i te ture, kua aere aia ki te kainga i te pure, mei tana rai i matau i te rave. Kua kite te aronga kino e kare a Daniela e akamutu i te pure kia Iehova. Rekareka ratou, no te mea te akaraanga kua tupu ta ratou parani i te takore ia Daniela.

I te kite anga te Ariki ko Dariu i te tumu i inangaro ei teia au tangata i te maani i teia ture, kua tataraara tikai aia. Inara kare e rauka iaia te taui i te ture, no reira aia i akaue ei ia Daniela kia titiriia ki roto i te vaarua riona. Tera ra kua akakite te ariki kia Daniela e: ‘Irinaki au e ko toou Atua taau e tavini ra, ka akaora ia koe.’

Kua taitaia tikai a Dariu e kare i varea ana e te moe i taua po ra. Tera mai popongi kua oro aia ki ko i te vaarua riona. Te kite ra koe iaia i ko. Kua kapiki maata atu aia e: ‘Daniela, te tavini o te Atua ora! Kua akaora ainei te Atua taau e tavini ra ia koe mei te au riona?’

‘Kua tono mai te Atua i tana angera,’ i pau atu ei a Daniela, ‘e kua topiri i te vaa o te au riona kia kore ratou e kakati iaku.’

Rekareka tikai te ariki. Kua akaue aia kia tukuia mai a Daniela ki vao mei roto i te vaarua. I reira kua akaue aia kia titiriia te au tangata kino tei timata i te takore ia Daniela ki ko i te au riona. I mua ake ka to ei taua aronga ra ki raro i te vaarua, kua opuia mai ratou e te au riona e kua atiatiia pouroa to ratou ivi.

I reira kua tata te Ariki ko Dariu ki te au tangata pouroa i roto i tona patireia e: ‘Te akaue atu nei au i te au tangata ravarai kia akangateitei i te Atua o Daniela. E rave ana aia i te au temeio mamaata. Kua akaora aia ia Daniela kia kore e kaingaia e te au riona.’