TE MAARA ra ia koe i te akarongo anga no runga i teia au mapu tane tokotoru? Ae, e au oa ratou no Daniela tei kore i kai ana i te au kai kare e meitaki no ratou. E kapiki ana to Babulonia ia ratou e ko Sadaraka, Meseka e Abedenego. Ka akara ana ra ia ratou i teianei. Eaa ra ratou kore ei e tupou ki raro i te tiki maatamaata mei te katoatoa rai? Ka akara tatou.

Te maara ra ia koe te au ture ta Iehova uaorai i tata tei kapikiia e ko te Ture Ngauru? Ko te mea mua o te reira koia oki: ‘Auraka rava koe akamori i tetai atua ke mari ua ko au.’ Te akono ra teia au mapu tane i teia ture, noatu e kare i te mea mama ua i te rave.

Kua kapiki a Nabukaneza, te ariki o Babulonia i te au tangata puapinga kia akangateitei i teia tiki tana i akatu. Koi oti ua akera aia i te tuatua ki te au tangata pouroa e: ‘Me akarongo kotou i te tangi o te pu, te kinura e tetai atu au apinga akatangi, e tupou kotou ki raro e akamori i teia tiki auro. Tetai ua atu kare e tupou ki raro e akamori, ka titiriia ki roto i te umu ai vera i taua taime tikai.’

I te kite anga a Nebukaneza e kare a Sadaraka, Meseka e Abedenego i tupou ki raro, kua riri tikai aia. Akaue aia kia apaiia mai ratou ki mua iaia. Oronga aia i tetai atianga akaou kia tupou ratou ki raro. Inara kua irinaki teia au mapu tane i roto ia Iehova. ‘To matou Atua ta matou e tavini nei ka rauka iaia i te akaora ia matou,’ i akakite ei ratou kia Nebukaneza. ‘Tera ra noatu e kare aia e akaora ia matou, kare matou e tupou ki raro i taau tiki auro.’

Te akarongo anga a Nebukaneza i teia, kua maata atu tona riri. E umu tetai i te pae mai e kua akaue aia e: ‘Tau i te umu kia vera e itu atu taime!’ I reira kua akaue aia i te au tangata ririnui roa atu i roto i tona nuku vaeau kia tapeka ia Sadaraka, Meseka e Abedenego e kia titiri ia ratou ki roto i te umu. E vera tikai te umu e kua mate te au tangata ririnui i te ai. Inara akapeea i reira te au mapu tane tokotoru ta ratou i titiri ki roto?

Kua akara te ariki ki roto i te umu, e kua mataku maata tikai. ‘Kare ainei e e toru a tatou tangata i tapeka ana e i titiri ki roto i te umu ai vera?’ i ui ei aia.

‘Ae,’ i pau atu ei tona au tavini.

‘Inara e a aku tangata e kite nei e aaere ra i roto i te ai,’ i karanga ai aia. ‘Kare ratou i tapekaia, e kare ratou i ka i te ai. E te a o te tangata, a tetai atua ua te akaraanga.’ Kua akavaitata atu te ariki ki ko i te ngutupa o te umu e kua kapiki atu e: ‘Sadaraka! Meseka! Abedenego! Aere mai ki vao, e te au tavini o te Atua Teitei Rava!’

To ratou aere anga mai ki vao, kua kite te katoatoa e kare roa ratou i ka ana i te ai. Kua karanga i reira te ariki e: ‘Kia akapaapaaia te Atua o Sadaraka, Meseka e Abedenego! Kua tono mai aia i tana angera e kua akaora ia ratou no te mea kare ratou i tupou ana e akamori i tetai atua ke, mari ua i to ratou uaorai Atua.’

Kare ainei teia i te akaraanga meitaki no tatou kia aru i te tu akarongo mou kia Iehova?