EAA te tupu ra i konei? Te umukai maata ra te tangata. Kua patiia e te ariki o Babulonia e tauatini au manuiri puapinga. Te taangaanga ra ratou i te au kapu auro e te au kapu ario e te au pa tei apaiia mei te iero o Iehova i Ierusalema. Inara, poitirere ua ake, kua kite atu i te au mangamanga rima o tetai tangata i roto i te reva e kua akamata i te tata ki runga i te patu. Mataku te katoatoa.

Ko Belesazara, te mokopuna a Nebukaneza te ariki i teianei. Kua ava aia kia apaiia mai tona au tangata kite karape. ‘Tetai ua atu te ka kite i te tatau i teia tataanga e te ka akakite mai kiaku i te aiteanga o te reira,’ i karanga ai te ariki, ‘ka orongaia e maata ua atu tana au apinga aroa e ka akariroia e koia te toru o te tutara puapinga roa atu i roto i te patireia.’ Tera ra kare tetai o te au tangata kite karape e kite i te tatau i te tataanga i runga i te patu, me kore i te akakite mai i te aiteanga o te reira.

Kua akarongo te mama o te ariki i te maniania e kua aere mai ki roto i te ngai kaikai anga maata. ‘Auraka e mataku,’ i akakite ei aia ki te ariki. ‘E tangata tetai i roto i toou patireia tei kite i te au atua tapu. I te tuatau e ariki ra toou papa ruau ko Nebukaneza kua maani aia i taua tangata ra ei pu no tona au tangata kite karape pouroa. Ko Daniela tona ingoa. E tiki koe iaia, e nana e akakite atu i te aiteanga o teia au mea pouroa.’

Te reira taime rai kua apaiia mai a Daniela. Muri ake i te kopae anga i tetai ua atu apinga aroa, kua akamata a Daniela i te akakite i te tumu i takore ei a Iehova i te papa ruau o Belesazara ko Nebukaneza mei tona taoonga ariki. ‘E akaparau tikai aia,’ i karanga ai a Daniela. ‘E kua akautunga a Iehova iaia.’

‘Inara ko koe,’ i akakite ei a Daniela kia Belesazara, ‘kua kite koe i te au mea pouroa tei tupu kiaia, e kua akaparau rai koe mei ia Nebukaneza tikai. Kua apai mai koe i te au kapu e te au pa mei ko mai i te iero o Iehova e kua inu mei roto i te reira. Kua akapaapaa koe i te au atua maaniia ki te rakau e te toka, e kare koe i akapaapaa ana i Tei Anga Ngateitei mai. No reira te Atua i tuku mai ei i teia rima kia tata i teia au tuatua.

‘Teia tei tataia,’ i na Daniela ei: ‘MENE, MENE, TEKELE e UPERESINE.’

‘Te aiteanga o MENE koia oki kua tare te Atua i te au ra o toou patireia e kua akamutuia te reira. Te aiteanga o TEKELE koia oki kua paunuia koe e kua kitea mai e kare e meitaki ana. Te aiteanga o UPERESINE koia oki kua orongaia toou patireia ki to Madai e Peresia.’

Ia Daniela e tuatua ra, kua akamata to Madai e Peresia i te tamaki ia Babulonia. Kua peke ia ratou te oire e kua tamate ratou ia Belesazara. Kua akatupuia te tataanga i runga i te patu i taua po tikai! Inara eaa te ka tupu ki to Iseraela i teianei? Kare e roa ka kite mai tatou, inara ka akara ana tatou na mua e eaa tei tupu kia Daniela.