MURI poto ua mai i te rapakau anga i te nga tangata patipati matapo, kua aere mai a Iesu ki tetai tapere meangiti vaitata atu ki Ierusalema. Kua akakite aia ki tetai nga pipi ana e: ‘Aere korua ki roto i te oire e ka kite korua i tetai atini ou. Tatara i te reira e oti apai mai ki konei iaku.’

Te apaiia mai anga te atini kiaia, kua noo a Iesu ki runga i te reira. E oti kua aere atu aia na runga i te atini ki Ierusalema kare i mamao roa. Tona vaitata anga atu ki te oire, kua aere mai tetai pupu tangata i te aravei iaia. Kua kiriti te maata anga ia ratou i to ratou pereue e kua tuku i te reira ki runga i te mataara. Kua tipu tetai pae i te au rau nu tamara. Kua tuku katoa ratou i te reira ki runga i te mataara, e kua kapiki e: ‘Kia akameitaki te Atua i te ariki tei aere mai i roto i te ingoa o Iehova!’

I te tuatau mua i Iseraela e aere mai ana te au ariki ou na runga i te atini ou ki roto ia Ierusalema i te akaari ia ratou uaorai ki te tangata. Teia ta Iesu e rave ra. E te akaari nei te au tangata e kua inangaro ratou ia Iesu ei ariki no ratou. Tera ra kare te tangata pouroa e inangaro ana iaia. Ka kite mai tatou i teia na roto i tei tupu i te aere anga a Iesu ki ko i te iero.

I ko i te iero kua rapakau a Iesu i te au tangata matapo e te pirikoki. Te kite anga te tamariki rikiriki i teia, kua akapaapaa ratou ia Iesu. Inara kua maani teia i te au taunga kia riri e kua akakite ratou kia Iesu e: ‘Te akarongo ra koe i ta te tamariki e tuatua ra?’

‘Ae,’ i pau atu ei a Iesu. ‘Kare ainei kotou i tatau ana i roto i te Pipiria i te karanga anga te reira e: “Ka apai mai te Atua i te akapaapaa no roto i te vaa o te tamariki rikiriki?”’ No reira te tamariki i akapaapaa ua atu ei i te ariki o te Atua.

Ka inangaro tatou kia aite mei taua au tamariki ra, me kare ainei? Penei ka tauta tetai aronga i te tapu ia tatou kia kore e tuatua no runga i te patireia o te Atua. Tera ra ka rave ua atu rai tatou i te akakite ki tetai ke no runga i te au mea umere ta Iesu ka rave no te tangata.

Kare i tae ake te taime no Iesu i te akamata i te tutara ei ariki, iaia i runga nei i te enua. Aea teia e tae mai ei? Kua inangaro te au pipi a Iesu kia kite. Ka tatau tatou i teia a muri mai.