TE TAMAINE taau e kite ra i konei e 12 ona mataiti. Te mou ra a Iesu i tona rima, e tei te pae ua mai tona mama e tona papa. Kua kite koe e eaa raua i akara anga mataora ai? Ka akara ana tatou.

E tangata puapinga te papa o te tamaine ko Iairo te ingoa. Tetai ra kua maki tana tamaine, e te moe ra. Inara kare aia i meitaki mai ana. Kua maata atu tona maki. Manamanata tikai a Iairo e tana vaine, no te mea te akara anga ka mate ta raua tamaine meangiti. Koia anake ua oki ta raua tamaine. No reira kua aere a Iairo i te kimi ia Iesu. Kua akarongo aia no runga i te au temeio ta Iesu e rave ra.

Te kite anga a Iairo ia Iesu, e maata te tangata takapini iaia. Inara kua na roto atu a Iairo i te au tangata e kua topa atu ki raro i te vaevae o Iesu. ‘E aka maki tikai taku tamaine,’ i karanga ai aia. ‘Aere mai ana koe e maani iaia kia meitaki,’ i pati akatenga ei aia. Karanga mai a Iesu e ka aere mai aia.

Ia ratou e aere atura, kua oparapara ua mai te tangata kia vaitata mai. Kua tapu poitirere a Iesu. ‘Naai i amiri mai iaku?’ i ui ei aia. Kua kite mai a Iesu i te mana i te aere anga mei roto iaia, kite i reira aia e kua amiri mai tetai tangata iaia. Koai ra? E vaine tei maki ana e 12 mataiti. Kua aere mai aia e kua amiri i te kakau o Iesu, e kua akaoraia!

Kua manako meitaki mai a Iairo, no te mea te kite ra aia e e mea mama ua no Iesu i te akaora i tetai tangata. Inara kua tae mai tetai karere. ‘Auraka e tamanata atu ia Iesu,’ i akakite ei aia kia Iairo. ‘Kua mate taau tamaine.’ Akarongo mai a Iesu i teia e kua karanga kia Iairo e: ‘Eiaa e manata, ka meitaki ua aia.’

To raua tae anga atu ki ko i te are o Iairo, te aue ra te tangata no te tu tangi tikai. Inara karanga atu a Iesu e: ‘Eiaa e aue. Kare te tamaine i mate. Te moe ua ra aia.’ Tera ra kua kata ratou e kua aviri ia Iesu, no te mea kua kite ratou e kua mate te tamaine.

Kua apai i reira a Iesu i te papa e te mama o te tamaine, e tana au apotetoro e toru ki roto i te pia e moe ra te tamaine. Kua mou aia i tona rima e kua karanga kiaia e: ‘Tu mai!’ E kua ora mai aia, mei taau rai e kite ra i konei. Kua tu aia ki runga e kua aere! No reira tona mama e tona papa i mataora roa ai.

Kare teia i te tangata mua ta Iesu i akatu mai mei te mate. Te tangata mua ta te Pipiria i akakite mai ko tetai tamaiti a tetai vaine takaua e noo ana i roto i te oire ko Naina. Muri mai, kua akaora katoa a Iesu ia Lazaro, te tungane o Maria raua ko Mareta mei te mate mai. Me tutara a Iesu ei ariki no te Atua, ka akaora akaou aia i te au tangata e maata ua atu tei mate. Kare ainei tatou e mataora i te reira?