AKARA ana ia Iesu e takave ra i teia tamaiti meangiti. Ka kite ua koe e e inangaro tikai a Iesu i te tamariki rikiriki. Te au tangata e akara atura ko tana au apotetoro. Eaa ta Iesu e tuatua ra kia ratou? Ka akara ana tatou.

Koi oki ua maira a Iesu e tana au apotetoro mei tetai tere mamao. I runga i te mataara kua karo te au apotetoro i rotopu ia ratou. No reira i muri ake i te tere kua ui atu a Iesu kia ratou e: ‘Eaa ta kotou e karo ra i runga i te mataara?’ Te tika, kua kite takere a Iesu i ta ratou e karo ra. Inara kua ui aia i te uianga kia kite e me ka akakite mai rai te au apotetoro kiaia.

Kare te au apotetoro i pau mai, no te mea i runga i te mataara te karo ra ratou e koai te tangata maata roa atu ia ratou. Inangaro tetai au apotetoro kia puapinga atu ratou i tetai atu. Akapeea ra a Iesu me akakite kia ratou e kare i te tika te inangaro kia maata roa atu?

Kua kapiki aia i te tamaiti meangiti, e kua maani aia iaia kia tu ki mua ia ratou pouroa. I reira kua karanga atu aia ki tana au pipi e: ‘Ka inangaro au kia kite papu kotou i teia e, Me kare kotou e taui e kia riro mai mei te tamariki rikiriki ra, kare roa kotou e tae ki te patireia o te Atua. Te tangata maata roa atu i roto i te patireia, koia te ka riro mai mei teia tamaiti nei.’ Kua kite koe e eaa a Iesu i tuatua ai i teia?

Kare te tamariki rikiriki e manamanata ana e koai te mea maata roa atu me kore te mea puapinga roa atu i tetai atu. No reira ka inangaroia te au apotetoro kia apii kia riro mei te tamariki i roto i teia tu, eiaa e karo no runga i te tu maata me kore puapinga.

E au taime ke katoa atu tetai ta Iesu i akaari e e aroa maata tikai tona no te tamariki rikiriki. I tetai au marama i muri mai kua apai mai tetai au tangata i ta ratou tamariki kia aravei ia Iesu. Kua tauta te au apotetoro i te arai atu ia ratou. Inara kua akakite a Iesu ki tana au apotetoro e: ‘E tuku ua i te tamariki kia aere mai kiaku, auraka e tapu ia ratou, no te mea ka riro te patireia o te Atua no te au tangata mei ia ratou rai.’ Kua rave i reira a Iesu i te tamariki ki roto i tona rima, e kua akameitaki ia ratou. Kare ainei i te mea meitaki i te kite e e aroa ana a Iesu i te tamariki rikiriki?