AKARA ana i te angaanga kino pakari e tupu nei! Te tamateia nei a Iesu. Kua tuku ratou iaia ki runga i tetai pou. Kua patiatiaia tona nga rima e tona nga vaevae ki te naero. Eaa tetai tangata ka inangaro ei i te rave i teia kia Iesu?

No te mea e riri ana tetai aronga ia Iesu. Kua kite koe e koai ratou? Ko tetai ia ratou ko te angera kino ko Satani te Tiaporo. Koia tei maani ia Adamu raua ko Eva kia akarongo kore ia Iehova. E na Satani i maani i te au enemi o Iesu kia rave i teia angaanga kino pakari.

I mua ake ka patiatia ei ratou ia Iesu ki runga i te pou, kua rave tona au enemi i te au angaanga kino kiaia. Te maara ra ia koe e kua aere mai ratou ki te aua i Getesemane e kua apai atu iaia? Koai taua au enemi ra? Ae, ko te au arataki akonoanga. Ka akara ana tatou e eaa tei tupu i muri mai.

Te apaiia anga a Iesu e te au arataki akonoanga, kua oro tana au apotetoro. Kua akaruke ratou ia Iesu ki ko i tona au enemi, no te mea kua mataku ratou. Inara kare te apotetoro ko Petero e Ioane i aere mamao ana. Kua aru raua kia kite e eaa te ka tupu kia Iesu.

Kua apai te au taunga ia Iesu ki ko i te tangata ruaine ko Ana, koia te taunga maata i mua ana. Kare te pupu tangata i roa ana i te noo anga i konei. Aru mai kua apai ratou ia Iesu ki ko i te are o Kaiapha, te taunga maata i teianei. Kua akaputuputu mai te au arataki akonoanga e manganui ki ko i tona are.

I konei i te are o Kaiapha kua rave ratou i tetai akavaanga. Kua apaiia mai te au tangata kia pikikaa no runga ia Iesu. Kua karanga te au arataki akonoanga pouroa e: ‘Ka tau a Iesu kia tamateia.’ Kua tutua ratou i reira i tona mata ki te uavare, e kua moto atu iaia.

I teia au mea e tupu ra, tei vao a Petero i roto i te aua. E po anu teia, e kua maani te au tangata i tetai ai. Ia ratou e tamaana ra ia ratou uaorai takapini i te ai, kua akara tetai tavini vaine ia Petero, e kua karanga e: ‘Ko teia katoa tetai tangata o Iesu.’

‘Kare, kare e ko au!’ i pau ei a Petero.

E toru taime te tangata i te karanga anga kia Petero e koia tetai tangata o Iesu. Inara i te taime tataki tai kua karanga a Petero e kare te reira i te tika. Te toru o te taime i te tuatua anga a Petero i teia, kua uri mai a Iesu e kua akara atu kiaia. Taitaia tikai a Petero no tei pikikaa aia, e kua aere atu aia e kua aue.

I te ra e iti maira i te popongi Varaire, kua apai atu te au taunga ia Iesu ki ko i to ratou ngai uipaanga maata, te are o te Sunederi. Kua uriuri ratou i konei e eaa ta ratou ka rave kiaia. Kua apai ratou iaia ki ko ia Ponotio Pilato, te tutara o te oire o Iudea.

‘E tangata kino teia,’ i akakite ei te au taunga kia Pilato. ‘Ka tau aia kia tamateia.’ Muri ake i te uiui anga kia Iesu, karanga a Pilato e: ‘Kare au i kite i tetai apinga tarevake tana i rave.’ I reira kua tuku atu a Pilato ia Iesu ki ko ia Heroda Anitipa. E tutara a Heroda no Galilea, inara te noo ra aia ki Ierusalema. Kare katoa a Heroda i kite mai e kua rave a Iesu i tetai apinga tarevake, no reira aia i akaoki ei iaia ki ko ia Pilato.

Inangaro a Pilato i te tuku ia Iesu kia aere. Inara kua inangaro te au enemi o Iesu i te tuku i tetai mouauri ke kia aere. E tangata keikeia teia ko Baraba. Kua avatea aiai i teianei i te apai anga mai a Pilato ia Iesu ki vao. Kua karanga atu aia ki te tangata e: ‘Akara ana ra! To kotou ariki!’ Inara kua ava mai te au taunga maata e: ‘Apai ke atu iaia! Tamate iaia! Tamate iaia!’ No reira a Pilato i tuku ei ia Baraba kia aere, e kua apai atu ratou ia Iesu kia tamateia.

I te avatea aiai Varaire kua patiatiaia a Iesu ki runga i tetai pou. Kare koe e kite ia raua i roto i te tutu, tera ra i te nga tua e rua o Iesu kua tamate katoaia tetai nga tangata kino i runga i te pou. Mua poto ua ake ka mate ei a Iesu, kua karanga mai tetai o te nga tangata kino kiaia e: ‘Akamaara mai koe iaku me tae koe ki toou patireia.’ Kua pau mai a Iesu e: ‘Te taputou atu nei au kia koe, ei Parataito taua aravei ei.’

Kare ainei tera i te taputou mataora? Kua kite koe e eaa te parataito ta Iesu e tuatua ra? Teiea te parataito ta te Atua i maani i te akamataanga? Ae, tei runga nei i te enua. Me tutara a Iesu ei ariki i runga i te rangi, ka akaora mai aia i teia tangata mei te mate kia rekareka i roto i te Parataito ou i runga nei i te enua. Kare ainei tatou e mataora i te reira?