AKARA ana i te kukupa e rere maira ki runga i te katu o teia tangata. Ko Iesu teia tangata. Mei te 30 ona mataiti i teianei. E ko Ioane te tangata i tetai tua iaia. Kua apii takere tatou i tetai apinga no runga iaia. Te maara ra ia koe te aere anga a Maria i te aravei i tona tuakana ia Elisabeta, e kua rere te pepe ma te rekareka i roto ia Elisabeta? Ko Ioane taua pepe ra. Inara eaa ta Ioane e Iesu e rave ra i konei?

Koi taruku ua akera a Ioane ia Iesu ki roto i te vai o te Kauvai Ioridana. E akaperaia ana me papetitoia tetai tangata. Te mea mua, ka tarukuia aia ki raro i te vai, e oti ka apai akaouia mai ki runga. No te mea ko teia ta Ioane e rave ana ki te tangata, kua kapikiia aia e ko Ioane Papetito. Inara eaa te tumu i papetito ei a Ioane ia Iesu?

Kua rave a Ioane i te reira no te mea kua aere mai a Iesu i te pati kia Ioane kia papetito iaia. E papetito ana a Ioane i te au tangata tei inangaro i te akaari e kua tataraara ratou i te au apinga kino ta ratou i rave. Tera ra kua rave ainei a Iesu i tetai apinga kino kia tataraara aia no te reira? Kare, kare roa a Iesu i rave ana i tetai mea kino, no te mea e Tamaiti aia na te Atua uaorai no te rangi mai. No reira aia i pati ei kia Ioane kia papetito iaia no tetai tumu ke. Ka akara ana tatou e eaa taua tumu ra.

Mua ake ka aere mai ei a Iesu kia Ioane, e kamuta aia. E tangata maani apinga te kamuta ki te rakau, mei te au kaingakai, te au nooanga e te au paata. E kamuta a Iosepha te tane a Maria, e nana i apii ia Iesu i te angaanga kamuta. Inara kare a Iehova i tono mai i tana Tamaiti ki te enua nei kia riro mai ei kamuta. E angaanga puapinga tana ka rave, e kua tae te taime no Iesu kia akamata i te rave i te reira. No reira, ei akaari e kua aere mai aia i teianei i te rave i te anoano o tona Metua, kua pati a Iesu ia Ioane kia papetito iaia. Kua mareka ainei te Atua i teia?

Ae, no te mea i muri ake i te aere mai anga a Iesu no raro i te vai, kua karanga tetai reo mei te rangi e: ‘Ko taku Tamaiti teia, kua mareka rava au iaia.’ Pera katoa mei te mea atura e kua ngaa te rangi, e kua rere mai teia kukupa ki runga ia Iesu. Inara kare teia i te kukupa tika tikai. E akara ua anga mei te kukupa rai. Ko te vaerua tapu tikai teia o te Atua.

Teianei e maata tikai ta Iesu ka akamanako atu, no reira aia i aere ei ki tetai ngai koia anake ua no te 40 ra. Iaia i reira kua aere mai a Satani. Kua timata a Satani ia Iesu e toru taime kia rave i tetai apinga tei patoi i te au ture a te Atua. Kare ra a Iesu i rave ana i te reira.

Muri mai, kua oki mai a Iesu e kua aravei i tetai au tangata tei riro mai e ko te aronga mua tei aru iaia, me kore e au pipi. Tetai o to ratou ingoa ko Anederea, ko Petero (e kapikiia ana e ko Simona), ko Philipa e Natanaela (e kapikiia ana e ko Baratolomea). Kua akaruke atu a Iesu e teia au pipi ou no te oire ko Galilea. I Galilea kua noo ratou i ko i te oire anau o Natanaela i Kana. Te reira te ngai i aere ei a Iesu ki tetai umukai akaipoipo maata, e kua rave i tana temeio mua. Kua kite koe e eaa te reira? Kua taui aia i te vai ei uaina.