MURI ake i te akaruke anga a Petero raua ko Ioane i te ngai tanu mate, te ngai i vai ana te kopapa o Iesu, kua akarukeia a Maria ki reira koia anake ua. Kua akamata aia i te aue. I reira kua piko atu ki raro i te akara ki roto i te ngai tanu mate, mei ta tatou i kite i roto i te tutu i mua atu. Kua kite atu aia i te nga angera i reira! Kua ui raua kiaia e: ‘Eaa koe i aue ei?’

Pau atu a Maria e: ‘Kua apai ke ratou i taku Atu, e kare au i kite i te ngai i tuku ei ratou iaia.’ E oti kua uri mai a Maria e kua kite atu i tetai tangata. Kua ui mai aia e: ‘Koai taau e kimi nei?’

Manako a Maria e ko te tangata tanu kai teia, e penei nana i apai te kopapa o Iesu. No reira aia i karanga ai e: ‘Me kua apai koe iaia, akakite mai koe i te ngai i tuku ei koe iaia.’ Inara, ko Iesu tikai teia tangata. E kopapa ou tona kare a Maria i kite. Tera ra i te kapiki anga aia i tona ingoa, kite mai a Maria e ko Iesu teia. Kua oro aia i te akakite ki te au pipi e: ‘I kite ana au i te Atu!’

Muri mai i taua ra ra, i tetai nga pipi e aere atura ki te oire o Emausa, kua kapiti atu tetai tangata kia raua. Kua maromaroa tikai nga pipi no te mea kua tamateia a Iesu. Inara ia ratou e aere ra, kua akamarama mai te tangata i te au apinga e manganui mei te Pipiria, tei akapumaana ia raua. I te openga, i to ratou tapu anga i te kaikai, kite mai nga pipi e ko Iesu teia tangata. I reira kua ngaro ua rai a Iesu, e kua oki viviki atu nga pipi ki Ierusalema i te akakite ki te au apotetoro no runga iaia.

I te reira e tupu ra, kua kite katoa mai a Petero ia Iesu. Kua mataora tetai atu i te akarongo anga i teia. E oti kua aere atu nga pipi ki Ierusalema i te kimi i te au apotetoro. Kua akakite raua kia ratou e akapeea a Iesu i te piri katoa atu anga kia raua i runga i te mataara. E ia raua e akakite ra no runga i teia, kua kite koe i te apinga umere tei tupu?

Akara ana i te tutu. Kua aere tika mai a Iesu ki roto i te pia, noatu e kua rokaia te pa. Rekareka tikai te au pipi! Kare ainei tera i te ra mataora? Ka rauka ainei ia koe te tare i te au taime i kitea ai a Iesu i teianei e tana au pipi? Kua tare koe e rima taime?

Kare te apotetoro ko Toma i kapitiia mai kia ratou i te kitea anga a Iesu. No reira kua akakite te au pipi kiaia e: ‘Kua kite ana matou i te Atu!’ Inara kua karanga a Toma e ka inangaro aia kia kite mata aia ia Iesu i mua ake ka irinaki ei aia i te reira. I na, e varu ra i muri mai tei roto akaou te au pipi i tetai pia rokaia, e i teia taime ko Toma tetai i reira. Poitirere ake, tei reira a Iesu i roto i te pia. Teianei kua irinaki a Toma.