I TE au ra i topa, kua akaari a Iesu iaia uaorai ki tana au pipi i te au taime e manganui. I tetai taime mei te 500 pipi i kite iaia. I te kite anga ratou iaia, kua kite koe e eaa ta Iesu i tuatua atu kia ratou? Te patireia o te Atua. Kua tono mai a Iehova ia Iesu ki te enua nei kia apii no runga i te Patireia. E kua rave ua atu rai aia i teia i muri ake i te akaoraia mai anga aia mei te mate.

Te maara ra ia koe e eaa te patireia o te Atua? Ae, e kavamani tika tikai te Patireia o te Atua i te rangi, e Koia ko Iesu ta te Atua i iki ei ariki. Mei ta tatou i apii mai, kua akaari mai a Iesu e ka riro aia ei ariki meitaki na te angai anga i te aronga mate i te pongi, te rapakau anga i te maki e te akatu anga i tei mate kia ora!

No reira me tutara a Iesu ei ariki i te rangi no te tauatini mataiti, mei teaa rai a runga nei i te enua? Ae, ka riro te enua katoa ei parataito manea. Kare e tamaki akaou me kore e kino, me kore e maki, me kore e mate. Kua kite tatou e e tika teia no te mea kua maani te Atua i te enua ei parataito no te tangata kia rekareka. No reira aia i maani ei i te aua i Edene i te akamataanga. E ka maani a Iesu kia tupu te inangaro o te Atua i te openga.

Kua tae i teianei te taime no Iesu kia oki ki te rangi. No te 40 ra kua akaari ana a Iesu iaia uaorai ki tana au pipi. No reira kua papu ia ratou e kua ora akaou aia. Tera ra i mua ake ka akaruke ei aia i tana au pipi kua akakite aia kia ratou e: ‘E noo ua i Ierusalema kia rauka ia kotou te vaerua tapu.’ Ko te vaerua tapu o te Atua e mana angaanga, mei te matangi e aangi ra, ka tauturu i tana au pipi i te rave i te anoano o te Atua. I te openga, kua karanga a Iesu e: ‘E tutu aere kotou iaku ki te au ngai mamao o te enua.’

Muri ake i te tuatua anga a Iesu i teia, kua tupu tetai mea umere. Kua akamata aia i te aere atu ki runga i te rangi, mei taau e kite ra i konei. I reira kua uunaia aia e te tiao rangi, e kare te au pipi i kite akaou atu ia Iesu. Kua aere a Iesu ki te rangi, e kua akamata i te tutara ki rungao i tana au pipi i te enua nei mei reira.