AUE ana e! Eaa te tupu ra i konei? Kua kino ainei te mamae o te tamaiti i runga i te one? Ka akara ana! ko Paulo tetai o te au tangata e aere maira ki vao i te are! Te kite atura koe ia Timoteo? Kua topa ainei te tamaiti ki vao i te maramarama?

Ae, ko te reira tikai tei tupu. Te oronga ra a Paulo i tetai akoanga ki te au pipi i konei i Teroa. Kua kite aia e kare aia e kite akaou ia ratou no tetai tuatau roa no te mea ka akaruke aia na runga i te pai i tera mai ra. No reira aia i tuatua ua atu ei e taea atu te tuaero i te po.

I na, ko teia tamaiti ko Eutiko te ingoa te noo ra i ko i te maramarama, e kua varea e te moe. Kua inga aia ki vao i te maramarama, e toru taua ki runga i te one! No reira te kite atura koe e kua manamanata te tangata. I te mou anga mai te au tangata i te tamaiti, kua tika rai ta ratou i tamanako. Kua mate aia!

Te kite anga a Paulo e kua mate te tamaiti, kua takoto aia ki runga ake iaia e kua takave iaia. I reira kua karanga aia e: ‘Auraka e manamanata. Meitaki ua aia!’ E e tika rai! E temeio te reira! Kua akaora a Paulo iaia mei te mate! Kua mataora tikai te tangata.

Kua oki pouroa atu ratou ki te taua i runga i te kaikai. Kua tuatua ua atu rai a Paulo e popongi ua ake. E ka papu ia koe e kare a Eutiko i varea akaouia ana e te moe! I reira kua aere atu a Paulo, a Timoteo e te aronga tei aru mai ia raua ki runga i te pai. Kua kite koe e ka aere ratou kiea?

Te akaoti atura a Paulo i te toru o tona tere tutu aere, e te oki ra aia ki te kainga. I teia tere kua noo a Paulo e toru mataiti ki roto i te oire anake ua o Ephesia. No reira e roa atu teia i te rua o te tere.

Muri ake i te akaruke anga ia Teroa, kua noo te pai ki Mileto no tetai taime. No te mea kare a Ephesia i mamao roa, kua pati atu a Paulo i te aronga pakari i roto i te putuputuanga kia aere mai ki Mileto, kia rauka iaia te tuatua atu kia ratou no te taime openga. Muri mai, i te taime i akaruke ei te pai, kua maromaroa tikai ratou i te aere anga a Paulo!

I te openga kua oki mai te pai ki Kaisarea. Ia Paulo e noo ra i konei i ko i te are o te pipi ko Philipa, kua akamatakite te peroveta ko Agabo ia Paulo. Karanga aia e ka maaniia a Paulo ei mouauri me aere mai aia ki Ierusalema. Tika rai, kua tupu teia. E oti, muri ake i te rua mataiti i roto i te are auri i Kaisarea, kua tukuia atu a Paulo ki Roma kia akavaia e te tutara Roma ko Kaisara. Ka akara tatou e eaa tei tupu i te aere anga ki Roma.