AKARA ana i te vivi i runga ia Paulo, e te vaeau Roma e tiaki ra iaia. E mouauri a Paulo i Roma. Te tiaki ra aia kia iki te Kaisara o Roma e eaa tana ka rave kiaia. Iaia e mouauri ra, kua akatikaia te tangata kia aere e aravei iaia.

E toru ra i muri ake i to Paulo tae anga ki Roma, kua tuku atu aia i te tuatua ki te au akaaere ngati Iuda kia aere mai e aravei iaia. Tei tupu, e maata te au ngati Iuda i Roma tei aere mai. Kua tutu aere atu a Paulo kia ratou no runga ia Iesu e te patireia o te Atua. Kua irinaki tetai pae e kua riro mai ei au Kerititiano, inara kare tetai pae i irinaki.

Kua tutu katoa atu a Paulo ki te au vaeau tukeke e tiaki ra iaia. No te rua mataiti i tona mouauri anga i reira kua tutu aere a Paulo ki te au tangata ravarai tana i aravei. Tei tupu, kua akarongo te ngutuare tangata o Kaisara i te tuatua meitaki o te Patireia, e kua riro mai tetai pae ei au Kerititiano.

Inara koai teia manuiri e tata nei i ko i te kaingakai? Kua kite ainei koe? Ae, ko Timoteo. No roto ana rai a Timoteo i te are auri no te tutu aere i te Patireia, inara kua tuku akaouia aia kia aere. E kua aere mai aia i te tauturu ia Paulo. Kua kite koe e eaa ta Timoteo e tata ra? Ka akara tatou.

Te maara ra ia koe te nga oire o Philipi e Ephesia i roto i te Tua 110? Kua tauturu a Paulo i te akamata i te au putuputuanga Kerititiano i roto i taua nga oire ra. Teianei, iaia i roto i te are auri, te tata nei a Paulo i te au reta ki teia au Kerititiano. Tei roto te au reta i te Pipiria, e kua kapikiia e ko Ephesia e Philipi. Te akakite ra a Paulo i teianei kia Timoteo e eaa te ka tata ki to raua au oa Kerititiano i Philipi.

Kua takinga meitaki tikai to Philipi ia Paulo. Kua tuku ratou i tetai apinga aroa nana i roto i te are auri, e no reira te akameitaki nei a Paulo ia ratou no te reira. Na Epaperodito i apai mai i te apinga aroa. Inara kua makiia aia e kua vaitata i te mate. Teianei ra, kua meitaki akaou aia e kua papa i te oki atu ki te kainga. Nana e apai i teia reta mei ia Paulo e Timoteo me oki aia ki Philipi.

Iaia i roto i te are auri kua tata a Paulo e rua akaou reta ta tatou i kite i roto i te Pipiria. Tetai ki te au Kerititiano i roto i te oire o Kolosa. Kua kite koe e koai te ingoa i te reira? Ko Kolosa. Ko tetai atu, e reta nana uaorai ki tetai oa piri vaitata ko Philemona te ingoa, e noo katoa ana i Kolosa. No runga teia reta i te tavini o Philemona ko Onesimo.

Kua oro a Onesimo mei ia Philemona e kua aere mai ki Roma. I roto i tetai mataara kua kite mai a Onesimo no runga ia Paulo i roto i te are auri. Kua aere mai aia i te aravei, e kua tutu atu a Paulo kia Onesimo. Kare i roa kua riro katoa mai a Onesimo ei Kerititiano. Teianei kua tataraara a Onesimo no tei oro aia. No reira kua kite koe e eaa ta Paulo i tata i roto i teia reta kia Philemona?

Kua pati a Paulo ia Philemona kia akakore i te ara a Onesimo. ‘Te tuku atu nei au iaia kia koe,’ i tata ei a Paulo. ‘Inara, teianei kare aia i te tavini ua noou. E taeake Kerititiano meitaki katoa aia.’ I te oki anga a Onesimo ki Kolosa kua apai atu aia i teia nga reta, okotai ki to Kolosa e tetai kia Philemona. Ka rauka ua ia tatou kia manako e kua rekareka a Philemona i te kite anga e ko tona tavini, kua riro mai ei Kerititiano.

I te tata anga a Paulo ki to Philipi e kia Philemona, e nuti meitaki tikai tana. ‘Te tuku atu nei au ia Timoteo kia kotou,’ i akakite ei a Paulo ki to Philipi. ‘Inara kare e roa ka aere katoa atu au e akara ia kotou.’ E kia Philemona, kua tata aia e: ‘Akono mai i tetai ngai nooanga noku.’

I te tuku angaia a Paulo kia aere, kua aere atu aia i te aravei i tona au taeake e te au tuaine Kerititiano i te au ngai e manganui. Inara i muri mai kua mouauri akaou a Paulo i Roma. Teia taime kua kite aia e ka tamateia aia. No reira kua tata aia kia Timoteo i te pati iaia kia aere viviki mai. ‘Kua akarongo mou au ki te Atua,’ i tata ei a Paulo, ‘e ka tutaki mai te Atua iaku.’ I te au mataiti i muri ake i te mate anga o Paulo, kua takore akaouia a Ierusalema, teia taime e to Roma.

Inara e maata atu to roto i te Pipiria. Kua maani te Atua ko Iehova i te apotetoro ko Ioane kia tata i te au puka openga, te kapiti maira te puka o Apokalupo. Te akakite maira teia puka Pipiria no runga i te tuatau ki mua. Ka apii tatou i teianei e eaa te ka tupu i te tuatau ki mua.