AKARA ana ra! kua kino te pai! Te ngaangaa ra te reira! Te kite ra koe i te tangata kua rere ki roto i te tai? Kua tae takere tetai pae ki uta i te maro. Ko Paulo ainei tera? Ka akara tatou e eaa tei tupu ana kiaia.

Akamaara e, e mouauri a Paulo i Kaisarea no te rua mataiti. E oti kua tukuia atu aia e tetai au mouauri ki runga i te pai, e kua aere atu ki Roma. To ratou vaitata anga atu ki te enua o Kereta, kua tupu tetai uriia kino kia ratou. Kua matangi pakari e kare i rauka ana i te tangata i te akatika i te pai. E kare ratou i kite atu i te ra i te ao me kore i te au etu i te po. I te openga, muri ake i te au ra i runga i te pai, kua manako ratou pouroa e kare ratou e ora.

I reira kua tu mai a Paulo e kua karanga e: ‘Kare okotai ia kotou e mate; ko te pai ua te ka ngaro. No te mea inapo kua aere mai tetai angera a te Atua e kua akakite mai kiaku e, “Auraka e mataku, e Paulo! Ka tu koe ki mua i te tutara o Roma ko Kaisara. E ka akaora te Atua ia kotou pouroa i runga i te pai.”’

Mei te tuaero i te po i te ra 14 i muri ake i te akamata anga te uriia, kua kite mai te au mataro e kare te tai e oonu roa ana! No te mataku e ka u ratou ki runga i tetai au toka i roto i te poiri, kua tuku ratou i te au tutau. Tera mai popongi kua kite atu ratou i tetai ava. Kua tauta ratou i te akatika atu i te pai ki te pae tai.

I na, te vaitata anga atu ratou ki uta, kua iri te pai ki runga i tetai puku one e kua piritiaia. I reira kua vavaiia te reira e te ngaru, e kua akamata te pai i te ngaangaa. Kua karanga atu te rangatira vaeau akaaere e: ‘Pouroa kotou e te aronga ka kite i te kau e rere ki roto i te tai na mua e kia kau ki uta. Te toenga ia kotou e rere i muri ake ia ratou, e e opu i tetai au potonga rakau o te pai kia mou ki runga i te reira.’ E ko ta ratou te reira i rave. I roto i teia mataara kua tae pouroa te 276 tangata no runga i te pai ki te pae tai ma te ora, mei ta te angera rai i taputou.

Ko Melita te ingoa o te enua. Takinga meitaki tikai te tangata, e kua akono i te aronga no runga mai i te pai. I te meitaki anga mai te reva, kua tukuia atu a Paulo ki runga i tetai pai ke e kua apaiia atu ki Roma.