TE TAMAITI mapu taau e kite ra i konei e te apotetoro ko Paulo ko Timoteo. E noo ana a Timoteo e tona pamiri ki Lusetera. Ko Eunike te ingoa o tona mama e ko Loi tona mama ruau.

Ko te toru taime teia i to Paulo aere anga ki Lusetera. Mei tetai mataiti i mua atu ana, kua aere mai a Paulo raua ko Banaba no te taime mua ki konei i tetai tere tutu aere. E i teianei kua oki akaou mai a Paulo e tona oa ko Sila.

Kua kite koe e eaa ta Paulo e tuatua ra kia Timoteo? ‘Ka inangaro ainei koe i te aru ia maua ko Sila?’ i ui ei aia. ‘Ka tauturu koe ia maua i te tutu aere ki te tangata i te au ngai mamao.’

‘Ae,’ i pau mai ei a Timoteo, ‘ka inangaro au i te aru atu.’ No reira kare i roa i muri mai kua akaruke a Timoteo i tona pamiri e kua aru atu ia Paulo raua ko Sila. Inara i mua ake ka apii atu ei tatou no runga i to ratou tere, ka akara ana tatou e eaa tei tupu ana kia Paulo. Kua pou i teianei e 17 mataiti mei tona kite anga ia Iesu i runga i te mataara ki Damaseko.

Akamaara ana, kua aere a Paulo ki Damaseko i te tamamae i te au pipi a Iesu, inara i teianei e pipi katoa aia! Muri mai kua parani tetai au enemi i te tamate ia Paulo no te mea kare ratou e reka ana i tana apii no runga ia Iesu. Inara kua tauturu te au pipi ia Paulo kia ora mai. Kua tuku ratou iaia ki roto i tetai kete e kua tuku atu iaia ki vao mai i te patu o te oire.

Muri mai kua aere atu a Paulo i te tutu aere i Anetioka. Ko teia te ngai i kapiki mua ia ai te au pipi a Iesu e e au Kerititiano. Kua tukuia atu i reira a Paulo raua ko Banaba mei Anetioka mai ki tetai tere tutu aere i te au enua mamao. Ko tetai o te au oire ta raua i aere atu ana ko Lusetera, te kainga o Timoteo.

Teianei mei te okotai mataiti i muri mai, kua oki mai a Paulo ki Lusetera no te rua o te tere. I te akaruke anga a Timoteo e Paulo raua ko Sila, kua kite koe e kua aere ratou kiea? Akara ana i te mapu, e ka tamou mai tatou i tetai o teia au ngai.

Te mea mua, kua aere ratou ki te ngai i te pae ua mai ko Ikonio, i reira ki te rua o te oire ko Anetioka te ingoa. Muri mai i te reira kua aere atu ratou ki runga ia Teroa, i reira ki Philipi, ki Tesalonia e Berea. Te kite ra koe ia Atene i runga i te mapu? Kua tutu aere a Paulo ki reira. Muri ake i te reira kua akapou ratou e tai e te apa mataiti i te tutu aere i Korinetia. I te openga kua tapu poto ratou i Ephesia. E oti kua oki mai ratou na runga i te pai ki Kaisarea, e kua aere atu ki runga ia Anetioka, te ngai i noo ei a Paulo.

No reira kua teretere aere a Timoteo e anere ua atu au maire i te tauturu ia Paulo i te tutu aere i te “tuatua meitaki” e te akamata i te au putuputuanga Kerititiano e manganui. Me maata mai koe, ka riro ainei koe ei tavini akarongo mou no te Atua mei ia Timoteo rai?