AKARA ana i te angera i konei e vai ra i te ngutupa o te are auri. E au apotetoro teia au tangata na Iesu, e tuku nei aia kia aere. Ka akara ana tatou e eaa ratou i tukuia ai ki roto i te are auri.

E taime poto ua teia mei te taime i riringiia mai ei te vaerua tapu ki runga i te au pipi a Iesu. E ko teia tei tupu: Te aere ra a Petero raua ko Ioane ki ko i te iero i Ierusalema i tetai avatea aiai. I reira, i te pae i te ngutupa, te noo ra tetai tangata pirikoki mei tona anau mai anga. E apai mai ana te tangata iaia i te au ra ravarai, kia patipati moni ki te aronga e aere ra ki roto i te iero. I te kite anga aia ia Petero raua Ioane, kua pati aia kia oronga mai raua i tetai apinga nana. Eaa ta te nga apotetoro ka rave?

Kua tapu raua e kua akara atu i teia tangata putaua. ‘Kare aku moni,’ i karanga ai a Petero, ‘inara ka oronga atu au i taku. I roto i te ingoa o Iesu, e tu e aere!’ Kua mou mai i reira a Petero i te rima katau o te tangata, e i taua taime rai kua rere aia e kua akamata i te aere. Te kite anga te tangata i teia, kua umere ratou e kua rekareka tikai i teia temeio mataora.

‘Na te mana o te Atua, tei akaora mai ia Iesu mei te mate, i rave ei maua i teia temeio,’ i karanga atu ei a Petero. Ia raua ko Ioane e tuatua ra, kua tae mai tetai au arataki akonoanga. Kua riri ratou no te mea kua akakite a Petero raua ko Ioane ki te tangata no runga ia Iesu tei akaoraia mai mei te mate. No reira ratou i opu ei ia raua e kua tuku atu ki roto i te are auri.

I tera mai ra kua rave te au arataki akonoanga i tetai uipaanga maata. Kua apaiia mai a Petero raua ko Ioane pera katoa te tangata ta raua i rapakau. ‘Na teea mana i rave ei korua i teia temeio?’ i ui atu ei te au arataki akonoanga.

Kua akakite atu a Petero kia ratou e na te mana o te Atua, tei akaora mai ia Iesu mei te mate. Kare te au taunga i kite e eaa ta ratou ka rave, no te mea kare e rauka ia ratou te patoi e kua tupu tikai teia temeio mataora. No reira kua akamatakite ratou i te au apotetoro auraka roa kia tuatua akaou no runga ia Iesu, e kua tuku atu ia raua kia aere.

I te au ra i aereia kua tutu aere ua atu te au apotetoro no runga ia Iesu e kua akaora i te maki. Kua akarongo ua te tangata i teia nuti no te au temeio. No reira oki te au pupu tangata mei te au taoni takapini ia Ierusalema i apai mai ei i te aronga maki kia akaora te au apotetoro. Kua maani teia i te au arataki akonoanga kia vareae, no reira ratou i opu ei i te au apotetoro e i tuku ei ia ratou ki roto i te are auri. Inara kare ratou i roa ana i te noo anga i reira.

I te po ake anga kua vai mai te angera a te Atua i te ngutupa o te are auri, mei taau e kite ra i konei. Kua karanga te angera e: ‘Aere e tu i roto i te iero, e kia tuatua ua atu rai ki te tangata.’ Tera mai popongi, i te tono anga te au arataki akonoanga i te au tangata ki ko i te are auri i te tiki i te au apotetoro, kua tukuia ratou kia aere. Muri mai kua kite te au tangata ia ratou e apii ra i roto i te iero e kua apai mai ia ratou ki ko i te are o te Sunederi.

‘Kua akakite tika atu matou kia kotou e auraka roa e apii no runga ia Iesu,’ i karanga ai te au arataki akonoanga. ‘Inara kua akaki kotou ia Ierusalema ki ta kotou apii.’ Kua pau mai i reira te au apotetoro e: ‘Ka akarongo matou i te Atua ei tutara kare i te tangata.’ No reira ratou i rave ua atu ei i te apii i te “tuatua meitaki.” Kare ainei tera i te akaraanga meitaki no tatou kia aru?