1. I te po i mua ake ka mate ei aia, eaa a Iesu i manamanata ai no runga i tana au pipi?

 KO TE po teia i mua ake ka mate ei a Iesu. Kua kite aia e kare e roa atu ka akaruke mai aia i tana au pipi, e kua manamanata aia eaa te ka tupu kia ratou. Akakite aia kia ratou: “Kare kotou i to teianei ao.” (Ioane 15:19) Muri mai, kua pure aia ki tona Metua no ratou i te na ko anga e: “Kare ratou i to teianei ao, mei iaku nei rai oki, kare i to teianei ao.” (Ioane 17:15, 16) Eaa ra te aiteanga o ta Iesu tuatua?

2. Eaa “to teianei ao” ta Iesu i taiku mai?

² Ko “to teianei ao,” ko te aronga kare i kite i te Atua, e tei raro ake ratou i te akatereanga a Satani. (Ioane 14:30; Ephesia 2:2; Iakobo 4:4; 1 Ioane 5:19) Akapeea tatou e kore ei e riro no “teianei ao”? I roto i teia pene, e maata te mataara ta tatou ka uriuri, ei akaraanga: Kia vai tiratiratu ki te Patireia o te Atua, kare e piri ki te angaanga poritiki. Kia patoi i te vaerua o teianei ao. Kia mako to tatou  kakau e te akamanea. Kia mareka ua i ta tatou i rauka i te pae moni. Kia kakau i te rakei katoa ta te Atua i oronga mai.—Akara i te Au Manako Poto 16.

3. Eaa ra to Iesu manako no runga i te angaanga poritiki?

³ Ia Iesu i te enua nei, kua kite aia e e maata te manamanata o te tangata e te ngatā i te oraanga. Akaaroa tikai aia i te tangata e kua inangaro i te tauturu ia ratou. Kua riro mai ainei aia ei arataki i roto i te kavamani kia rauka iaia i te tauturu i te tangata? Kare. No te mea kua kite aia e ko te Patireia o te Atua te kavamani tei anoanoia no te tangata. Ko Iesu te Ariki o taua Patireia ra, e ko te Patireia te tumu manako maata o tana angaanga tutu evangeria. (Daniela 7:13, 14; Luka 4:43; 17:20, 21) Kare a Iesu i piri ana ki roto i te angaanga poritiki, e kua vai tiratiratu rai aia ki te Patireia. I mua ia Ponotio Pilato te Tutara o Roma, akakite a Iesu e: “Kare to teianei ao taku basileia.” (Ioane 18:36) Mei tera katoa tana au pipi. Akakite te puka On the Road to Civilization e “kare te au Kerititiano i mou taoonga ana i roto i te kavamani.” Teia tuatau, ko tera katoa te turanga o te au Kerititiano. Te turu nei tatou i te Patireia o te Atua ma te tiratiratu, kare e piri ki roto i te au angaanga poritiki o teianei ao.—Mataio 24:14.

4. Akapeea te au Kerititiano mou te turuturu anga i to te Atua kavamani?

 ⁴ Ko te au Karere, e mata ratou no to ratou uaorai kavamani i roto i tetai enua ke, e kare ratou e piri ki te angaanga poritiki o tera enua. Mei tera katoa te turanga o te aronga akatainuia tei rauka te manakonakoanga kia tutara ma te Mesia i te rangi. Tata a Paulo ki te au Kerititiano akatainuia: ‘E karere tatou na te Mesia.’ (2 Korinetia 5:20) Ko te aronga akatainuia te mata no te kavamani o te Atua. Kare ratou e piri ki te angaanga  poritiki e te manamanata o te au kavamani. (Philipi 3:20) E mirioni ua atu tei rauka ia ratou i te tauturu kia kite no runga i to te Atua kavamani. Te au “mamoe ke atu,” tei rauka te manakonakoanga kia noo e tuatau ua atu i roto i te ao ou o te Atua, turuturu ratou i te aronga akatainuia. Kare katoa ratou e piri ana ki te angaanga poritiki. (Ioane 10:16; Mataio 25:31-40) Te taka ua ra e, e ko te Kerititiano mou, kare aia e piri ki te angaanga poritiki o teianei ao.—E tatau ia Isaia 2:2-4.

5. Eaa te tumu kare te au Kerititiano e aere ki te tamaki?

⁵ Te aronga akamori pouroa, e iti tangata ratou no te au Kerititiano mou noatu eaa to ratou enua e te tu o te oraanga. (1 Korinetia 1:10) Me aere tatou ki te tamaki, ka tā atu tatou i to tatou uaorai iti tangata, to tatou au oa akarongo, ta Iesu i akaue mai kia aroa tatou. (Ioane 13:34, 35; 1 Ioane 3:10-12) E tetai, kua akakite a Iesu ki tana au pipi, kia aroa katoa atu i to ratou enemi.—Mataio 5:44; 26:52.

6. Eaa ra te manako o to Iehova au tavini akatapuia no runga i te au kavamani?

⁶ Noatu e au Kerititiano tiratiratu tatou, ka anoanoia rai kia tauta pakari tatou i te akangateitei i te au kavamani, na te akono anga i ta ratou ture e te tutaki i ta tatou tero. Ka akapapu ua rai tatou kia oronga i “ta te Atua . . . ki te Atua.” (Mareko 12:17; Roma 13:1-7; 1 Korinetia 6:19, 20) Ko “ta  te Atua,” te ō maira to tatou inangaro nona, to tatou akarongo e ta tatou akamorianga. Kua papa ua tatou i te akarongo ia Iehova noatu ka tamateia tatou.—Luka 4:8; 10:27; e tatau ia Angaanga 5:29; Roma 14:8.

7, 8. Eaa ra ‘te vaerua o teianei ao,’ e eaa ta te reira e akatupu nei ki te tangata?

⁷ E rauka ai kia akatakake mai ia tatou mei to Satani ao, kare tatou e tuku ua i ‘te vaerua o teianei ao’ kia akatere ia tatou. Ko to Satani aerenga manako e tona au tu, ko te vaerua ïa e akatere nei i te aronga kare e tavini ana ia Iehova. Inara te patoi nei te au Kerititiano i teia tu. Mei ta Paulo i akakite, ‘te vaerua i rauka ia tatou nei, kare ïa to teianei ao, ko te vaerua ra no ko mai i te Atua.’—1 Korinetia 2:12; Ephesia 2:2, 3; akara i te Au Manako Poto 17.

⁸ Ka akatupu te vaerua o teianei ao i te tu akatietie, ngakau parau e te patoitoi. Kare ratou e inangaro i te akarongo ki te Atua. Inangaro a Satani i te tangata kia rave i ta ratou uaorai i inangaro noatu eaa te ka tupu. Mea reka nana kia irinaki te tangata e “ko te anoano tika kore o te kopapa nei, e te anoano tika kore o te mata” te mea puapinga roa atu i roto i te oraanga. (1 Ioane 2:16; 1 Timoteo 6:9, 10) Te tauta pakari nei te Tiaporo i te akavare i to Iehova au tavini kia aru i tona aerenga  manako.—Ioane 8:44; Angaanga 13:10; 1 Ioane 3:8.

9. Na teea au mataara te vaerua o teianei ao te takino anga ia tatou?

⁹ Tei te au ngai ravarai te reva e akaea nei tatou, mei tera katoa rai te vaerua o teianei ao. Me kare tatou e tauta pakari i te patoi i taua vaerua ra, ka takino te reira ia tatou. (E tatau ia Maseli 4:23.) I te akamataanga, penei ka akaraanga meitaki ua me akatika tatou i te aerenga manako e te tu o te aronga kare e akamori ana ia Iehova, kia akakeu ia tatou. (Maseli 13:20; 1 Korinetia 15:33) Me kore na roto i te akarakara anga i te au tu peu viivii o te ainga, te au tarekareka akarērē me kore te akaruke i te tuatua mou.—Akara i te Au Manako Poto 18.

10. Ka akapeea tatou te patoi anga i te vaerua o teianei ao?

¹⁰ Ka akapeea i reira tatou me patoi i te vaerua o teianei ao kia kore e takino ia tatou? Kia piri vaitata tatou kia Iehova e kia tuku na tona pakari e arataki ia tatou. Kia pure putuputu no tona vaerua tapu e kia angaanga pakari i te tavini iaia. Ko Iehova te mana katoatoa tei ririnui rava atu i te ao katoa e pini ua ake. Irinaki tikai tatou e ka tauturu aia ia tatou i te patoi i te vaerua o teianei ao.—1 Ioane 4:4.

11. Eaa ra te tu ta te vaerua o teianei ao e akatupu nei ki te tu e akamanea ana te tangata?

¹¹ Akaari katoa tatou na roto i te tu e akamanea  ana tatou e kare tatou i to teianei ao. Maata te tangata o teianei ao e akamanea ana kia akaraia mai ratou, kia akatupu i te manako tau kore i roto i etai ke, kia akaari i to ratou tu patoitoi, me kore kia kiteaia mai e aronga moni ratou. Tetai aronga e tau kore rai to ratou kakau e te repo, e kare ratou e manata atu ana mei teaa te tu o to ratou kakau. Me iki i to tatou kakau e te akamanea, kare tatou e inangaro i teia tu kia ō mai.

12, 13. Eaa te au kaveinga te ka tauturu ia tatou me iki eaa ta tatou ka aao?

 ¹² E au tavini tatou no Iehova, e ka inangaro tatou kia mako ua rai to tatou akamanea, kia mā, kia manea e kia tau ki to tatou akakoroanga. Ka akamanea tatou “ma te akatietie kore, e te akono meitaki,” no to tatou inangaro i te “akono i te Atua.”—1 Timoteo 2:9, 10; Iuda 21.

¹³ Ka riro to tatou akamanea ei tuatua anga na etai ke no runga ia Iehova e tona iti tangata. Ka inangaro tatou i te rave i te “au mea ravarai . . . ma te akakakā i te Atua.” (1 Korinetia 10:31) Ko te tu akatietie kore te ō maira te akangateitei i etai ke e to ratou manako. No reira me iki i to tatou kakau me kore i te tu o to tatou akamanea, e akamaara e ka akara mai rai te tangata.—1 Korinetia 4:9; 2 Korinetia 6:3, 4; 7:1.

14. Eaa te mea tau kia akamanako tatou me iki i to tatou kakau no te au angaanga Kerititiano?

¹⁴ Mei teaa ra te tu o to tatou kakau, me aere ki te au uipaanga e te tutu evangeria? Te riro ra ainei te reira ei tuatua anga na te tangata e ei akatupu i te akamā ki etai ke? Te manako ra ainei tatou e kare i tetai tangata te tika eaa ta tatou ka aao? (Philipi 4:5; 1 Petero 5:6) Inangaro tatou kia manea tatou e te tau ua, inara ko te mea manea roa atu, ko to tatou au tu Kerititiano. Ko te au tu teia ta Iehova e kite maira me akara mai aia ia tatou. Te akaari maira te reira i te tu tikai o to tatou ngakau koia oki  ‘te tangata ngaro o te ngakau ko te apinga maata ïa ki mua i te aroaro o te Atua.’—1 Petero 3:3, 4.

15. No teaa a Iehova i kore ei e akakite mai eaa ta tatou ka aao e te tu o to tatou akamanea?

¹⁵ Kare a Iehova ture i oronga mai no runga i ta tatou ka aao e kare e aao. Kua oronga mai ra aia i te au kaveinga Pipiria ei tauturu ia tatou kia rave i te au ikianga tau. (Ebera 5:14) Inangaro aia kia rave tatou i ta tatou tukuanga tika no to tatou inangaro iaia e etai ke. (E tatau ia Mareko 12:30, 31.) Takapini i teia ao, tuke tuke te tu e  akamanea ana to Iehova iti tangata, kia tau ki te au peu o te enua e to ratou uaorai inangaro. E mea manea roa teia tu.

16. Eaa to teia ao aerenga manako no runga i te moni i kore ei e tau ki ta Iesu i apii? Eaa te nga uianga ka tau kia ui kia tatou uaorai?

¹⁶ Inangaro a Satani kia irinaki te tangata e na te moni e te au apinga o te oraanga, e apai mai i te mataora, inara kua kite to Iehova au tavini e kare teia i te tika. Irinaki tatou i ta Iesu tuatua: “E maata ua oki to te tangata nei apinga, kare oki tei taua apinga nona ra tona ora.” (Luka 12:15) Kare e rauka i te moni i te oronga mai i te mataora mou. Kare e rauka i te oronga mai i te au oa piri mou tikai, te ngakau ‘au, me kore te ora mutu kore. E tika e ka anoanoia teia au apinga e ka inangaro tatou kia mataora to tatou oraanga. Inara kua apii mai a Iesu e me rauka te pirianga mou kia Iehova, e me akariro i tana akamorianga ei mea puapinga rava atu i roto i to tatou oraanga, ka mataora tatou. (Mataio 5:3; 6:22) E ui kia koe uaorai: ‘Te irinaki ra ainei au i to teianei ao aerenga manako? Ko te moni ainei te mea maata rava atu taku i manako ana e e tuatua ana?’—Luka 6:45; 21:34-36; 2 Ioane 6.

17. Eaa te puapinga ka rauka, me patoi koe i te aerenga manako o teia ao no runga i te moni?

¹⁷ Me akamou ua tatou ki te tavini anga ia Iehova  e te patoi i te aerenga manako o teia ao no runga i te moni, ka puapinga to tatou oraanga. (Mataio 11:29, 30) Ka mareka ua tatou e ka kī ua to tatou ngakau e te manako i te ‘au. (Mataio 6:31, 32; Roma 15:13) Kare tatou e apiapi i te au mea o te kopapa. (E tatau ia 1 Timoteo 6:9, 10.) Ka maata to tatou rekareka i te oronga ua. (Angaanga 20:35) E ka maata atu to tatou taime no to tatou au akaperepere, e ka moe meitaki katoa tatou.—Koheleta 5:12.

18. Eaa ta Satani e umuumu nei i te rave kia tatou?

¹⁸ Te umuumu nei a Satani i te takore i to tatou pirianga kia Iehova, no reira kia tauta pakari tatou i te paruru i te reira. E tamakianga ta tatou ki “te au vaerua kikino.” (Ephesia 6:12) Kare a Satani e tana au temoni e inangaro kia mataora tatou e kia rauka te ora mutu kore. (1 Petero 5:8) Te tamaki mai nei teia au enemi ririnui ia tatou inara, na roto i te tauturu a Iehova ka autu tatou i teia tamaki!

19. Akapeea a Ephesia 6:14-18 te akataka mai anga i “te rakei” o te Kerititiano?

¹⁹ I te au tuatau i taito, e aao ana te au vaeau i te rakei tamaki ei paruru ia ratou i te ngai tamaki. Kia aao katoa rai tatou i “te rakei” ta Iehova i oronga mai no tatou. (Ephesia 6:13) Ka paruru te reira ia tatou. Ka tatau tatou no runga i teia rakei i roto ia Ephesia 6:14-18: “Ka tu, ma te tatuaia to kotou taukupu i te tuatua-mou, e ma  te tapoki-umauma ra ko te tuatua tika i te kakau anga; E kia akatamakaia to kotou vaevae i te teateamamao o te evangelia o te au ra; E rave oki i te paruru ra i te akarongo, ei runga ravao ïa, ko te mea e mate ei te au tao ai ravarai a te vaerua kino ra. Ka rave katoa i te pare ra i te ora, e te koke a te vaerua ra, koia te tuatua a te Atua: Ma te pure tukumoe kore, i te au pure ravarai, i te pati a te vaerua.”

20. Eaa te ka anoanoia kia rave tatou kia rauka i “te rakei” i te tauturu ia tatou?

²⁰ Me ngaropoina i te vaeau tetai tuanga o tona rakei e ka vai ua tetai ngai o tona kopapa kare e paruruia, ka akakoro te enemi i te takino i te reira ngai. Me ka inangaro tatou kia paruruia e to tatou “rakei,” kare tatou e akangaropoina i tetai ua atu tuanga o to tatou “rakei.” Ka aao tatou i te reira i te au atianga ravarai e ka akono meitaki i te reira. Kare ta tatou tamaki e akamutu, kia pou roa to Satani ao e kia takore roaia aia e tana au temoni mei te enua nei. (Apokalupo 12:17; 20:1-3) No reira me te tauta nei tatou i te kopae i te au anoano tika kore me kare i tetai au tu tarevake, eiaa tatou e tuku i te ‘au!—1 Korinetia 9:27.

21. Akapeea tatou e autu ei i ta tatou tamakianga?

²¹ Kare tatou i maroiroi atu i te Tiaporo. Ka maroiroi atu ra tatou i te tauturu a Iehova! E rauka ai ia tatou kia vai tiratiratu ua, ka anoanoia tatou kia pure kia Iehova, kia apii i tana Tuatua, e kia kapiti atu ki to tatou au taeake e te au tuaine. (Ebera 10: 24, 25) Na teia au mea e tauturu ia tatou kia vai tiratiratu ua ki te Atua, e kia papa ua rai i te paruru i to tatou akarongo.

22, 23. (a) Akapeea e rauka ai ia tatou kia papa ua rai i te paruru i to tatou akarongo? (e) Eaa ta tatou ka uriuri i roto i te pene ka aru mai?

²² Ka anoanoia tatou kia papa ua rai i te paruru i to tatou akarongo i te au taime pouroa. (Ioane 15:19) No runga i tetai au manamanata, e tuke to te Au Kite o Iehova turanga, ki to te maata anga o te tangata. E ui kia koe uaorai e: ‘Kua mārama ainei au i te tumu i iki ei tatou i teia turanga? Kua papu ainei iaku e e tika ta te Pipiria e ta te tavini akono meitaki e te pakari, e tuatua nei? Te rekareka ra ainei au e e Kite au no Iehova? (Salamo 34:2; Mataio 10:32, 33) Ka rauka ainei iaku i te akamārama i toku irinakianga ki etai ke?’—Mataio 24:45; Ioane 17:17; e tatau ia 1 Petero 3:15.

²³ Roto i te au turanga e manganui, taka meitaki ua eaa ta tatou ka rave, kia kore e riro i to teianei ao. I tetai au taime ra, kare e taka meitaki. Tuke ke ta Satani au ravenga e tauta ana kia mou tatou ki roto i tana ereere. Tetai o taua ereere ra, e tamataora. Eaa ra te mea tau kia rave tatou, me iki i ta tatou tamataora? Ka kite tatou i roto i te pene ka aru mai.