1, 2. Me tupu te manamanata i roto i te akaipoipo, ko te aiteanga ainei e kua akamutu rai tera akaipoipo? Akamārama mai.

 E APINGA aroa te akaipoipo na Iehova. Ka mataora te oraanga o te tangata. Noatu ra te reira, ka tupu rai te manamanata i roto i te oraanga akaipoipo. I te akaraanga, mei te mea ra e kare roa teia au manamanata e akamutu, e penei kare to raua inangaro no tetai e tetai e aite akaou ana mei to mua ana.

² Inara kare tatou e poitirere me tupu tetai au turanga ngatā i roto i to tatou oraanga akaipoipo. Noatu ra te au turanga ngatā kare mei te mea e kua akamutu rai to tatou akaipoipo. Tetai au tokorua tei na roto ana i tetai au manamanata kino, kua rauka ia ratou te au ravenga kia akamatutu akaou i to ratou pirianga akaipoipo. Akapeea ra?

3, 4. Eaa te tupu ana i tetai taime i roto i te oraanga akaipoipo?

³ Ka riro te akaipoipo ei taokotai i tetai nga tokorua tei tuke rai to raua inangaro i tetai au mea, pera katoa to raua aerenga manako, e te tu e rave ana raua i tetai au mea. Penei, e tuke rai te turanga o te oraanga i utuutuia ai raua e te au peu ta raua i  matau. Ka pou rai tetai tuatau no te nga tokorua kia kite e kia mārama tikai i to raua tu.

⁴ I te tuatau ka aereia, penei ka varenga ua te tane me kore te vaine i te rave i to raua uaorai au anoano, ka kite ake ei kare to raua pirianga e mataora akaou ana. Mei te mea atura i reira e oraanga ke to tetai e to tetai. Eaa te ka tauturu ia raua kia oki akaou to raua pirianga mei to mua ana?

5. (a) Eaa te ka tauturu i tetai Kerititiano kia piri vaitata ki tona tokorua akaipoipo? (e) Mei ta Ebera 13:4 e akakite maira, mei teaa ra to tatou manako no runga i te akaipoipo?

⁵ Oronga mai a Iehova i te ako meitaki rava atu te ka tauturu ia koe e toou tokorua kia piri vaitata ki tetai e tetai. (Salamo 25:4; Isaia 48:17, 18) Te akakite maira aia: “Kia akameitakiia te akaipoipo i te tangata ravarai.” (Ebera 13:4) Tetai apinga meitaki e te marekaia, e mea akaperepereia te reira e te puapinga maata. Ka paruru koe i te reira e kare koe e akariro ei mea puapinga kore ua. Ko tera tikai ta Iehova e inangaro maira ia tatou kia akapera no runga i te akaipoipo.

6. Eaa ta Mataio 19:4-6 e akakite maira no runga i to Iehova aerenga manako no te akaipoipo?

⁶ Na Iehova i rave i te akaipoipo mua. Akakite tana Tamaiti a Iesu: “Kare rai kotou i tatau e, ko tei anga ia raua i muatangana, i anga ïa i te tane okotai e te vaine okotai; E kua na ko akera, ‘E akaruke ei te tangata i tona metua tane e tona metua vaine, ka  piri atu ei ki tana vaine; e ka riro oki raua ei kopapa okotai?’ E teianei, kare atura raua i te toko rua, kua kopapa okotai ra. E ta te Atua i topiri ra, auraka te tangata e akataka ke atu.” (Mataio 19:4-6) Mei muatangana mai rai, kua akakoro a Iehova kia riro te akaipoipo ei mea tinamou. Inangaro aia kia rauka i te ngutuare tangata te pirianga mou, e kia mataora to ratou oraanga.

7. Ka akapeea e rauka ai i te au tane e te au vaine akaipoipo i te akamatutu i to ratou oraanga akaipoipo?

⁷ Inara i teia tuatau, e maata atu te manamanata e te taomianga ta te au tokorua akaipoipo e kite nei. Tetai taime e pakari tikai te taomianga, e manako ana ratou e kare e puapingaia to ratou akaipoipo, e  kua tuku i te ‘au. Inara me mārama tikai tatou i to Iehova aerenga manako no runga i te akaipoipo ka riro tera ei tauturu ia tatou.—1 Ioane 5:3.

8, 9. (a) Eaa te taime tau kia aru tatou i ta Iehova aratakianga no runga i te akaipoipo? (e) Akapeea tatou te akaarianga e e mea akaperepere te oraanga akaipoipo kia tatou?

⁸ E riro ua ana rai ta Iehova aratakianga ei meitaki no tatou. Mei ta tatou i kite, te ako maira aia ia tatou: “Kia akameitakiia te akaipoipo.” (Ebera 13:4; Koheleta 5:4) Me aru tatou i ta Iehova aratakianga noatu te ngatā, mea papu roa e ka puapingaia tatou.—1 Tesalonia 1:3; Ebera 6:10.

⁹ E mea akaperepereia te oraanga akaipoipo kia tatou, no reira ka kopae tatou i te rave e i te tuatua i tetai ua atu apinga te ka takino i te reira. Ka inangaro tatou kia matutu roa atu to tatou pirianga ki to tatou tokorua. Akapeea e rauka ai ia tatou i te rave i te reira?

10, 11. (a) Eaa tetai au manamanata kino e tupu ana i roto i tetai au akaipoipo? (e) No teaa ra i puapinga ai te tu e tuatua ana tatou ki ta tatou tane e te vaine?

¹⁰ Tuke tuke te mataara e akatupu ana tetai i te mamae ki tona tokorua. Kua kite tatou e kare e tau kia tamamae te au Kerititiano i to ratou tokorua me kore kia rave i tetai ua atu au mea te ka takino ia ratou. Inara, ka riro ta tatou tuatua mei te apinga tamaki te ka tamamae i to tatou tokorua. Akakite tetai vaine e: “E tamamae ua ana taku tane iaku ki tana tuatua. Noatu kare e ngai kino i runga i toku  kopapa, e mamae tikai toku ngakau i tana au tuatua akakino mei te, ‘Tamanamanata tikai koe iaku!’ me kore ‘Kare oou puapinga kiaku!’” Akakite tetai tane e, e mea matau tikai na taku vaine i te akakino ua rai iaku. Karanga aia: “Kare e rauka iaku kia taiku atu i te au mea tana e tuatua mai ana kiaku. Te tumu tera kare au e tuatua atu kiaia e no reira katoa au e noo atu ei ki taku ngai angaanga. E ngari ake a reira i te kainga.” Teia tuatau e mea matau uaia te tuatua viivii, e te tuatua akakino te riro ana ei akatupu i te mamae ngakau.

¹¹ Me tuatua akakino te tane e te vaine i tetai e tetai, ka akatupu te reira i te mamae ngakau te kare e ngaro vave. Te taka meitaki ua ra, e kare ko teia ta Iehova i akakoro no te tane e te vaine kia akapera. Inara ka mamae rai toou tokorua noatu kare koe i manako atu ana. Penei te manako ra koe te meitaki ua ra koe ki toou tokorua, eaa ra oki tona manako no runga ia koe? Me ka riro taau tuatua ei tamamae i toou tokorua, ka inangaro ainei koe i te taui i toou tu?—Galatia 5:15; e tatau ia Ephesia 4:31.

12. Eaa te ka takino i te pirianga o tetai tangata akaipoipo kia Iehova?

¹² Te tu e tuatua ana koe ki toou tokorua me i te ngai tangata e me ko korua ua, e mea puapinga te reira kia Iehova. (E tatau ia 1 Petero 3:7.) Te akamaara maira a Iakobo 1:26 ia tatou e: “Te manako ra tetai tangata ia kotou e, e akono tona i te Atua, e kare i tapeka i tona arero, te pikikaa ra i tona uaorai ngakau; e akono pikikaa tona i te Atua.”

13. Eaa tetai mataara ke mai te ka riro ei tamamae i to tetai tokorua akaipoipo?

 ¹³ E au mataara ke atu tetai ka anoanoia te nga tokorua kia matakite. Ei akaraanga, eaa ra te manako o toou tokorua me pou ua toou taime ki tetai ke? Noatu e tumuanga tau tetai, mei te angaanga kapiti i roto i te tutu evangeria, me kore i te tauturu iaia no tetai manamanata, ka kinokino ainei toou tokorua? Karanga tetai vaine Kerititiano e: “Mamae toku ngakau i te kite atu i taku tane e akapou ra i tona taime ki tetai tuaine i roto i te putuputuanga. Mei te mea atura e kare oku puapinga kiaia.”

14. (a) Eaa te tuatua mou ta tatou i kite i roto ia Genese 2:24? (e) Eaa te ka tau kia ui tatou kia tatou uaorai?

 ¹⁴ E apainga ta te au Kerititiano ki to tatou au metua, au taeake, e te au tuaine i roto i te putuputuanga. Noatu rai, me akaipoipo tatou, ko ta tatou apainga mua koia oki ki ta tatou tane me kore vaine. Akakite a Iehova e ‘ka piri atu te tane ki tana vaine.’ (Genese 2:24) No reira e mea puapinga kia akamanako tatou i te turanga o to tatou tokorua. Ui kia koe uaorai: ‘Te akapou ra ainei au i tetai taime i te akaari i toku akaperepere e toku inangaro no toku tokorua?’

15. Eaa te tumu ka anoanoia kia kopae tetai Kerititiano akaipoipo i te akaoaoa atu ki tetai kare i te tane me kore i te vaine nana?

¹⁵ Me akariro tatou ei mea matau na tatou i te akaoaoa atu ki tetai kare i te tokorua akaipoipo no taua, ka akatupu teia i te manamanata. Ka piri to taua manako kiaia e ka akatupu i te inangaro no tera tangata me kore vaine. (Mataio 5:28) Ka maata atu teia inangaro e ka riro ei akakeu ia koe kia rave i tetai mea te ka taviivii i toou akaipoipo.

16. Eaa te akauenga ta te Pipiria i oronga mai no runga i te akaipoipo?

¹⁶ Muri ake i te tuatua anga e: “Kia akameitakiia te akaipoipo,” akakite te Pipiria e kia: “Viivii kore oki te roi: e akava oki te Atua i te akaturi e te moeana.” (Ebera 13:4) I konei, ko te “viivii kore oki te roi” te tuatua ra te reira no runga i te pirianga ainga i rotopu i te tane e te vaine. (Maseli 5:18) Ka akapeea  tatou me akaari i te akangateitei no teia pirianga e kia kore e taviivii i te reira?

17. (a) Mei teaa rai te aerenga manako o te tangata i teia tuatau no runga i te akaturi? (e) Mei teaa rai to te au Kerititiano manako no runga i te akaturi?

¹⁷ Tetai aronga i teia tuatau, kare ratou e manako ana e tarevake kia akaturi ratou ki tetai ke kare i te tokorua akaipoipo no ratou. Kare tatou e inangaro kia aru i te reira tu. Te akataka tika ua maira a Iehova e e mea rikarika nana te akaturi. (E tatau ia Roma 12:9; Ebera 10:31; 12:29) Mei te mea e ka akaturi tatou ki tetai kare i te tane me kore i te vaine akaipoipo na tatou, ka taviivii tatou i to tatou akaipoipo. Te akaari ra tatou e kare tatou e akangateitei ana i to Iehova au turanga e ka takino i to tatou pirianga kiaia. No reira ka anoanoia tatou kia kopae takiri i te aru i te takainga mua te ka arataki atu ki te akaturi. Te kapiti maira teia i te kopae anga i te aerenga manako tau kore no runga i tetai tangata.—Iobu 31:1.

18. (a) No teaa te akaturi i aite ei ki te akamori i te au atua pikikaa? (e) Eaa to Iehova aerenga manako no runga i te akaturi?

¹⁸ I roto i te Ture a Mose i te tuatau o te ngati Iseraela i taito, e ara kino tikai te akaturi, aite rai mei te akamori i te au atua pikikaa. E mate te utunga no nga mea e rua. (Levitiku 20:2, 10) Na roto i teea tu i aiteite ei te akaturi ki te akamori i te au atua pikikaa? Me akamori tetai tangata ngati Iseraela i te au atua pikikaa, kua aati aia i tana koreromotu kia vai tiratiratu kia Iehova. Me akaturi aia, kua aati aia i tana i taputou e ka vai tiratiratu aia ki tona tokorua. (Exodo 19:5, 6; Deuteronomi 5:9; e tatau ia Malaki  2:14.) Te taka meitaki ua ra e, i te tuatau i topa, e ara kino te akaturi i roto i te mata o Iehova.

19. Eaa te ka tauturu ia tatou kia kore rava e rave i te ara o te akaturi?

¹⁹ Akapeea ra i teia tuatau? Noatu kare tatou i raro ake i te Ture a Mose, kare rai i taui to Iehova aerenga manako no runga i te akaturi. Kare rava tatou e akamori i tetai atua pikikaa, e kare katoa rai tatou e akaturi ki tetai ke kare i te tokorua akaipoipo no tatou. (Salamo 51:1, 4; Kolosa 3:5) Me akapera tatou, te akaari ra tatou i te tu akangateitei kore no toou tokorua akaipoipo e no to tatou Atua, ko Iehova.—Akara i te Au Manako Poto 26.

20. Eaa te puapinga ta te tu pakari ka akatupu no te akaipoipo?

²⁰ Akapeea koe me akamatutu i toou akaipoipo? Te akakite maira te Tuatua a te Atua e: “E patuia te are i te pakari; e e akatinamouia i te kite.” (Maseli 24:3) Tetai au are e anu a roto e kare e apinga, me kore e maanaana, e tau ua, e te matutu. Aite rai te reira ki te akaipoipo. Ko te tangata tei rauka iaia te pakari ka akapapu meitaki aia kia matutu, kia rekareka e kia mataora ua tona akaipoipo.

21. Akapeea te kite i te akamatutu roa atu anga i toou akaipoipo?

²¹ No runga i taua are ra, te karanga ra te Pipiria: “E ki oki te au pia ra i te kite ki te au apinga memeitaki katoa i inangaroia ra.” (Maseli 24:4) Taau i apii mai no roto i te Tuatua a te Atua, ka riro te reira ei akameitaki roa atu i toou oraanga akaipoipo. (Roma 12:2; Philipi 1:9) Me tatau kapiti korua i te Pipiria e ta tatou au puka, e uriuri ka akapeea korua me taangaanga  i ta korua e apii ra. Kimi i te au mataara te ka tauturu ia korua kia akaari i te inangaro e te akangateitei no tetai e tetai, e kia takinga meitaki ma te akaperepere ia korua. Pati kia Iehova kia tauturu mai ia korua i te akatupu i te au tu te ka akamatutu i to korua akaipoipo e noou kia akaperepere i toou tokorua.—Maseli 15:16, 17; 1 Petero 1:7.

22. No teaa tatou ka akaari ei i te aroa, takinga meitaki, e te akangateitei no to tatou tokorua akaipoipo?

²² Mea tau kia tauta pakari tatou i te akaperepere i ta tatou au tane e ta tatou au vaine ma te aroa, takinga meitaki, e te akangateitei. Ka riro i reira to tatou akaipoipo ei mea mataora e te matutu. E ko te mea puapinga rava atu, ka akamareka tatou ia Iehova.—Salamo 147:11; Roma 12:10.