1, 2. Eaa te tumu i inangaro ei koe ia Iehova?

 TE INANGARO ra ainei koe i te Atua? Penei no toou inangaro iaia kua akatapu koe i toou oraanga kiaia. E kua riro aia ei Oa piri mou noou. Inara i mua ake ka inangaro ei koe ia Iehova, kua inangaro ke ana aia ia koe. Karanga te Pipiria: “Te anoano nei tatou iaia, no te mea koia ana tei anoano mai ia tatou nei.”—1 Ioane 4:19.

² Akamanako ana i te au mea tei akaari mai i to Iehova inangaro no tatou. Kua oronga mai aia i te enua manea ei kainga no tatou, e te au mea pouroa kia mataora to tatou oraanga. (Mataio 5:43-48; Apokalupo 4:11) Inangaro aia kia rauka tetai pirianga meitaki kiaia, e kua oronga mai i te ravenga kia kite tatou no runga iaia. Me tatau tatou i te Pipiria, te akarongo ra tatou kia Iehova. Me pure tatou, te akarongo maira aia kia tatou. (Salamo 65:2) Te arataki e te akamaroiroi nei aia ia tatou na roto i te mana o tona vaerua tapu. (Luka 11:13) Kua tono katoa mai aia i tana  Tamaiti akaperepere ki te enua nei, ei akaora ia tatou mei te ara e te mate.—E tatau ia Ioane 3:16; Roma 5:8.

3. Akapeea tatou me akamou i tetai pirianga meitaki kia Iehova?

³ Akamanako ana i tetai o toou au oa piri mou, tei turuturu ia koe i te au tuatau mataora e te taitaia. No teia tu pirianga oa kia vai matutu ua, ka anoanoia te tauta pakari. Mei teia katoa to tatou pirianga oa kia Iehova. Koia to tatou Oa piri mou roa atu e ka rauka ia tatou tetai pirianga oa mutu kore kiaia. Akakite mai te Pipiria: “Tamou tikai kotou i to kotou uaorai inangaro i te Atua.” (Iuda 21) Akapeea tatou me rave i teia? Te pau maira te Pipiria: “Teia oki te inangaro i te Atua, ko te akono i tana au akauenga; kare oki tana au akauenga i te mea teiaa.”—1 Ioane 5:3.

4, 5. (a) Eaa te aiteanga o “te inangaro i te Atua? (e) Akapeea toou inangaro no Iehova te akamata anga?

⁴ Eaa ra te aiteanga o ta te Pipiria tuatua, “te inangaro i te Atua”? Kare te reira e tuatua ra i to te Atua aroa no tatou mari ra, i to tatou inangaro nona. Te maara ra ia koe toou kite anga e e inangaro toou ia Iehova?

⁵ Rekareka koe e te inangaro ra Iehova ia koe kia noo i roto i tona ao ou e tuatau ua atu. Kua apii koe no runga i te au mea pouroa tana i rave,  e i te apinga akaperepere roa atu tana i oronga mai i tona tono mai anga i tana Tamaiti ki te enua nei. (Mataio 20:28; Ioane 8:29; Roma 5:12, 18) Kua kite koe e e aroa maata to Iehova noou e kua akakeuia toou ngakau; akamata i reira koe i te inangaro iaia.—E tatau ia 1 Ioane 4:9, 10.

6. Eaa te ō maira me inangaro tatou i tetai tangata? Eaa ta te inangaro no te Atua i akakeu ia koe kia rave?

⁶ Inara ko te akamata anga ua ïa. Me inangaro tatou i tetai tangata, e maata atu te ō maira i te tuatua ua e “Inangaro au ia koe.” Ka akakeu te inangaro ia tatou kia rave i te au mea te ka akamareka i tera tangata. Pera katoa toou inangaro no Iehova. Me maata mai toou inangaro nona, kare e kore ka akatapu koe i toou oraanga kiaia e ka papetito. Tera i reira, te taputou ra koe kia tavini ia Iehova e tuatau ua atu. (E tatau ia Roma 14:7, 8.) Akapeea koe me akatupu i tera taputou?

7. Me inangaro tatou ia Iehova, eaa ta tatou ka rave? Eaa tetai o tana au akauenga?

⁷ No to tatou inangaro ia Iehova, ka “akono [tatou] i tana au akauenga.” Akapeea tatou me rave i te reira? Ka akarongo tatou iaia. Apii tatou i roto i te Pipiria i te oraanga ta Iehova e inangaro maira kia noo tatou. Akakite mai aia, e tarevake te kona kava, te keia, te pikikaa, te pirianga ainga ki  tetai kare koe i akaipoipo, te akamori i tetai tangata e i tetai ua atu apinga.—1 Korinetia 5:11; 6:18; 10:14; Ephesia 4:28; Kolosa 3:9.

8, 9. Akapeea tatou e kite ei eaa ta Iehova e inangaro maira kia rave tatou me kare a te Pipiria ture i akataka mai? Oronga mai i tetai akaraanga.

⁸ E mareka mai ei a Iehova, e maata atu te ka anoanoia kia rave tatou i to te akarongo ua i tana au akauenga. Kare aia i oronga mai i te ture no te au turanga ravarai o te oraanga. Ka kite tatou i tetai au turanga, kare tikai a te Pipiria ture i te akakite mai eaa ta tatou ka rave. Akapeea ra tatou me rave i te au ikianga meitaki? (Ephesia 5:17) Tei roto i te Pipiria te au kaveinga te ka apii ia tatou i te tuatua mou no runga i to Iehova aerenga manako. Ia tatou e tatau ra, ka kite tatou e koai tikai a Iehova, tona manako, tana e inangaro ra e e rikarika ra.—E tatau ia Salamo 97:10; Maseli 6:16-19; akara i te Au Manako Poto 1.

⁹ Ei akaraanga, akapeea tatou me iki eaa te ka akara i runga i te tivi e te initaneti? Kare a Iehova i akakite mai eaa tikai ta tatou ka rave. Kua oronga mai ra aia i te au kaveinga ei tauturu ia tatou. Te tamataora o teia tuatau kua kī ua i te kino e te peu ainga. Te akakite maira a Iehova i roto i te Pipiria e, ko “tei inangaro i te takinga-kino, kua riri roa tona ngakau iaia” e ka “akava oki te Atua i te akaturi e te moeana.”  (Salamo 11:5; Ebera 13:4) Akapeea teia au kaveinga me tauturu ia tatou kia rave i te au ikianga meitaki? Me kite tatou e te rikarika ra a Iehova i tetai mea tau kore, e kopae tatou i te reira.

10, 11. Eaa te tumu ka akarongo ei tatou kia Iehova?

¹⁰ Eaa te tumu ka akarongo ei tatou kia Iehova? Akarongo tatou ia Iehova no to tatou inangaro iaia; kare no te kopae ua i te utunga e te manamanata no ta tatou ikianga tarevake. (Galatia 6:7) Mei te tamariki rai e inangaro ra i te akamareka i to ratou metua, ka inangaro katoa tatou i te akamareka i to tatou Metua i te rangi. Mataora tikai i te kite e te mareka maira a Iehova ia tatou!—Salamo 5:12; Maseli 12:2; akara i te Au Manako Poto 2.

¹¹ Kare tatou e akarongo ia Iehova i te tuatau meitaki ua e me kare atu e ravenga. Kare na tatou e iki e ko teea o tana ture e te turanga ta tatou ka aru e kare e aru. (Deuteronomi 12:32) Ka akarongo ra tatou iaia ma te ngakau katoa, mei ta te tata salamo i karanga: “Ka mataora rai au i taau ra au akauenga, tei inangaroia e au nei.” (Salamo 119:47; Roma 6:17) Inangaro tatou kia aite mei ia Noa, tei rave i te au mea ravarai ta Iehova i akaue mai no tona inangaro ia Iehova. Karanga te Pipiria e “ko [ta Noa] ïa i rave marie.” (Genese 6:22) Ka inangaro ainei koe kia tuatua akapera mai a Iehova ia koe?

12. Akapeea tatou me akarekareka ia Iehova?

 ¹² Eaa to Iehova manako me akarongo tatou iaia? Ka ‘rekareka tona ngakau.’ (Maseli 11:20; 27:11) Me akarongo tatou ki Tei Anga i te ao katoa, ka rekareka aia ia tatou! Kare roa aia e māro ia tatou kia akarongo iaia. Kua oronga mai aia i te tikaanga no tatou kia iki. Koia oki, kia iki i te mea tika me kore i te mea tarevake. To Iehova inangaro kia riro na to tatou inangaro iaia e akakeu ia tatou kia rave i te au ikianga tau kia rauka te oraanga meitaki.—Deuteronomi 30:15, 16, 19, 20; akara i te Au Manako Poto 3.

13, 14. Akapeea tatou i kite ei e kare ta te Atua au akauenga i te mea ngatā i te akono? Akatutu mai.

¹³ Akapeea me ka manako tatou e e ngatā tikai i te akono i ta Iehova au akauenga, me kore ka apai ke te reira i to tatou tikaanga kia iki? Akakite taka mai te Pipiria: “Kare oki tana au akauenga i te mea teiaa.” (1 Ioane 5:3) Ta te New English Translation urianga: “Kare tana au akauenga e akateiaa ia tatou.” Kare i te mea ngatā no tatou kia akono i te reira. Te au mea tana e pati maira kia rave tatou, e mea tau anake ïa.

¹⁴ Ei akaraanga, akamanako ana e te tauturu ra koe i to taeake kia neke ki tetai are ou. Kua tuku aia i te au mea pouroa ki roto i te au pia. Māmā ua  tetai pae i te amo, tetai pae e teimaa, ka anoanoia e rua tangata i te amo. Ka pati ainei toou taeake ia koe kia amo i te au pia teimaa ko koe anake ua? Kare! No teaa ra? No te mea kare aia e inangaro kia rokoia koe e te kino. Mei tera taeake rai, kare roa a Iehova e pati mai ia tatou kia rave i tetai mea ngatā. (Deuteronomi 30:11-14) Kua mārama ua a Iehova ia tatou. “Kua kite oki aia i to tatou tu; te manako ra aia e, e one tatou nei.”—Salamo 103:14.

15. Eaa i papu ei ia tatou e ka riro ta Iehova au akauenga ei meitaki no tatou?

¹⁵ Akakite a Mose ki to Iseraela e e mea “meitaki” ta Iehova au akauenga no ratou. Me akarongo ratou ka “akaora” aia ia ratou. (Deuteronomi 5:28-33; 6:24) Mei tera katoa i teia tuatau. Te au mea ta Iehova ka pati mai kia rave tatou, ka akameitaki atu te reira i to tatou oraanga. (E tatau ia Isaia 48:17.) Kua kite to tatou Metua ko Iehova, eaa te mea meitaki rava atu no tatou. (Roma 11:33) Akakite te Pipiria: “Ko te Atua oki te aroa.” (1 Ioane 4:8) Ta Iehova tuatua e tana angaanga, kua akatumuia ki runga i te aroa.

16. Akapeea tatou i kite ei e ka rauka ia tatou kia akarongo noatu te tu apa ua, e noatu tei roto tatou i teia ao kino?

¹⁶ Kare i te mea māmā te akarongo i te Atua. Te noo nei tatou i teia ao kino na te Tiaporo e akatere nei. Te tauta nei aia i te akakeu i te tangata kia rave i te kino. (1 Ioane 5:19) Ka anoanoia tatou kia  patoi i to tatou uaorai manako apa ua, no te mea na teia e arataki ia tatou kia kore e akarongo i te Atua. (Roma 7:21-25) Inara na to tatou inangaro ia Iehova, e akamaroiroi ia tatou kia rave i te mea tika. Te kite maira aia i ta tatou tautaanga kia akarongo iaia. Ka oronga mai aia i tona vaerua tapu ei tauturu ia tatou. (1 Samuela 15:22, 23; Angaanga 5:32) Na te reira e akatupu i te au tu te ka riro ei mea māmā ua no tatou kia akarongo iaia.—Galatia 5:22, 23.

17, 18. (a) Eaa ta tatou ka apii i roto i teia puka? (e) Eaa ta tatou ka uriuri i roto i te pene ka aru mai?

¹⁷ I roto i teia puka, ka apii tatou eaa te tu oraanga te ka akamareka ia Iehova. Ka kite tatou akapeea me akono i tana au kaveinga e tona au turanga i roto i to tatou oraanga. Kare a Iehova e māro ia tatou kia akarongo iaia. Me iki tatou kia akarongo iaia, ka meitaki atu to tatou oraanga i teianei, e a te tuatau ki mua. Na to tatou tu akarongo e akaari e mei teaa te maata o to tatou inangaro i te Atua.—Akara i te Au Manako Poto 4.

¹⁸ Ei tauturu ia tatou kia kite eaa te mea tika e te mea tarevake, kua oronga mai a Iehova i te akava ngakau no tatou tataki tai. Me tereniia to tatou akava ngakau, ka tauturu te reira ia tatou kia “akono i tana au akauenga.” Eaa ra te akava ngakau, akapeea tatou me tereni i te reira? Ka akara tatou.