Ki te aronga tei inangaro i te Atua ko Iehova e tana Tuatua, te Pipiria:

“Ka kite ïa kotou i te tuatua-mou, e na te tuatua-mou kotou e akarangatira,” i akakite ei a Iesu. (Ioane 8:32) E akamanako ua ana e mei teaa ra te tu i toou kite anga i te tuatua mou i roto i te Pipiria, no te taime mua! E mea mataora tikai i te kite, e i roto i tetai ao e maata te pikipikikaa, ka rauka ia tatou kia kite i te tuatua mou.—2 Timoteo 3:1.

Inangaro te Atua ko Iehova kia kite tatou i te tuatua mou. No to tatou inangaro i te tangata, inangaro rai tatou kia kite ratou no runga i te reira. Inara e maata atu te ō maira i te tavini anga i te Atua. Ka tauta pakari tatou kia rotai to tatou oraanga ei Kerititiano, no te mea te akangateitei ra tatou i to Iehova au kaveinga ma te ngakau tae. Kua akamārama mai a Iesu i tetai mataara puapinga, ka rauka ia tatou i te akapapu ki te Atua i to tatou inangaro nona. Akakite aia e: “[Me] akono kotou i taku au akauenga, e vai akaperepereia atu kotou e au; mei iaku i akono i te au akauenga a taku Metua ra, e e vai akaperepereia mai au e ia.”—Ioane 15:10.

Inangaro maata tikai to Iesu i tona Metua, e ka rave aia i te au mea ravarai ta tona Metua i pati mai iaia kia rave. Me aru tatou i to Iesu akaraanga na roto i te tu e noo ra tatou i to tatou oraanga, ka inangaro a Iehova ia tatou, e ka rauka ia tatou te mataora mou. Mei ta Iesu i akakite, “E ao to kotou, te aronga i kite i teianei au tuatua, kia akono kotou i te reira.”—Ioane 13:17.

Te irinaki nei matou e ka riro teia puka ei tauturu ia kotou kia kite akapeea me akarotai i to kotou oraanga ki te tuatua mou mei roto i te Pipiria, e kia riro ei oa no te Atua. Te pure nei matou kia matutu ua atu rai to kotou inangaro no te Atua, e kia Vai Tamou i Roto i te Aroa o te Atua i roto i to kotou “inangaro i te Atua . . . e tae ua atu ki te ora mutu kore.”—Iuda 21.