1, 2. Eaa ta tatou ka rave kia rauka i te vai tamou ki roto i te aroa o te Atua?

 KA INANGARO tatou pouroa kia maroiroi e kia matutu to tatou kopapa. No reira ka inangaro tatou i te kai i te au kai memeitaki, te akaetaeta putuputu e te akono i to tatou kopapa. Noatu ka pou te taime e te maroiroi, te kite ra tatou i te puapinga, no reira kare tatou e tuku i te ‘au. Inara e turanga ke mai tetai te ka anoanoia tatou kia maroiroi e kia matutu.

² Noatu kua mārama tatou i tetai au mea no runga ia Iehova, ka anoanoia rai tatou kia akamatutu rava atu i to tatou pirianga kiaia. I te akamaroiroi anga a Iuda i te au Kerititiano kia, “Tamou tikai kotou i to kotou uaorai inangaro i te Atua,” kua akamārama atu aia kia ratou ka akapeea me rave i teia. Akakite aia kia ratou kia: “[Akamatutu] ia kotou uaorai, i to kotou akarongo tapu maata.” (Iuda 20, 21) Ka akapeea tatou i te akamatutu anga i to tatou akarongo?

3-5. (a) Eaa ra ta Satani ka inangaro ia koe kia manako no runga i to Iehova au turanga? (e) Eaa ra toou manako no runga i ta Iehova au ture e te au kaveinga?

³ E mea puapinga noou uaorai kia papu e ko to Iehova au arataa te mea meitaki rava atu. Ka inangaro a Satani kia manako koe e e ngatā roa kia akono i to Iehova au turanga, e ka mataora roa atu koe me naau rai e iki eaa te mea tika e eaa te mea tarevake. Mei te tuatau roa mai i te kainga i Edene to Satani tauta anga, kia irinaki te tangata i teia. (Genese 3:1-6) E te tauta pakari nei rai aia i teia tuatau.

⁴ E tika ainei ta Satani? E ngatā ainei to Iehova au turanga kia akono? Kare. Ei akatutu, e akamanako ua ana e te aere ra koe na roto i tetai aua manea. I na kua kite atu koe i tetai aua teitei e arai ra i tetai tuanga o taua aua ra. Penei ka manako koe e, ‘Eaa ra teia aua i tukuia ai ki konei?’ I na i taua atianga tikai, kua rongo atu koe i tetai riona e ngunguru ra i tetai tua mai i te aua. Eaa ra i reira toou manako no runga i teia aua? Kare ekoko e ka rekareka roa koe te paruruia ra koe e te aua kia kore koe e kaingaia e te riona! Aite rai ta Iehova au kaveinga ki tera aua, e te Tiaporo ki tera riona. Te akamatakite maira te Tuatua a te Atua ia tatou: “E akono meitaki, e matakite, te aaere nei oki to kotou enemi ko te diabolo, mei te liona ngunguru ra, i te kimi anga i te tangata e pou iaia.”—1 Petero 5:8.

⁵ Inangaro a Iehova kia rauka ia tatou te oraanga  meitaki rava atu. Kare aia e inangaro kia akavareia tatou e Satani. No reira aia i oronga mai ei i tana au ture e te au kaveinga, ei paruru ia tatou kia mataora tatou. (Ephesia 6:11) Kua tata a Iakobo e: “Ko te akara ra ki roto i te ture tika rava o te rangatira ra, ma te tamou tikai . . . e akameitakiia ïa aia i te rave anga,” i te reira.—Iakobo 1:25.

6. Akapeea e ketaketa ai to tatou irinakianga e ko to Iehova au arataa te mea meitaki rava atu?

⁶ Me aru tatou i ta Iehova aratakianga, ka meitaki atu to tatou oraanga e ka matutu atu to tatou pirianga oa kiaia. Ei akaraanga, me āriki tatou i tana patianga kia pure putuputu ua rai kiaia, ka puapingaia tatou. (Mataio 6:5-8; 1 Tesalonia 5:17)  Mataora tatou me akarongo i tana ikuikuanga kia uipa kapiti i te akamori iaia e te akamaroiroi i tetai e tetai, e kia piri putuputu ki te angaanga tutu aere e te apii i te tangata. (Mataio 28:19, 20; Galatia 6:2; Ebera 10:24, 25) Me akamanako tatou e akapeea teia au mea i te tauturu anga ia tatou kia akamatutu i to tatou akarongo, ka ketaketa roa atu to tatou irinakianga e ko to Iehova au arataa te mea meitaki rava atu.

7, 8. Eaa te ka tauturu ia tatou kia kore e manamanata i te au timataanga te ka tupu i te tuatau ka aereia?

⁷ Penei ka manamanata tatou e ka timataia to tatou akarongo i te au taime ka aereia, te ka riro ei mea ngatā tikai no tatou. Me ka manako akapera ake koe, e akamaara i ta Iehova tuatua: “Ko au toou Atua ra ko Iehova, ko tei akakite ia koe i te mea e puapingaʼi koe na; ko tei arataki ia koe na te arataa e tau ei kia aere koe ra. Angairi koe i akarongo mai ki te au akauenga naku! kua riro ïa toou au mei te vai taʼe ra; e taau tuatua-tika mei te ngaru moana ra.”—Isaia 48:17, 18.

⁸ Me akarongo tatou ia Iehova, ka riro to tatou ‘au mei te vai taʼe marie kare e māro, e to tatou tu tuatua tika, mei te ngaru moana e pakipaki maira i taatai. Noatu eaa te ka tupu i roto i to tatou oraanga, ka vai tiratiratu rai tatou. Te taputou maira te Pipiria: “E tuku koe i taau apainga kia Iehova ra, e nana koe e tauturu mai; kare rava aia e vaoo ua atu i te tangata tuatua-tika kia akangaueueia.”—Salamo 55:22.

9, 10. Eaa te aiteanga kia riro ei tangata pakari mou?

⁹ Ia koe e akaketaketa ra i toou pirianga kia Iehova, ka ‘aere koe ki mua ma te pakari mou.’ (Ebera 6:1) Eaa te aiteanga kia riro ei tangata pakari mou?

¹⁰ Kare tatou e riro ei au Kerititiano pakari mou no te mea ua nei e kua ruaine tatou. E rauka ai kia riro ei tangata pakari mou, ka anoanoia kia akariro ia Iehova ei Oa piri mou tikai no tatou, e kia aru i tona aerenga manako. (Ioane 4:23) Kua tata a Paulo e: “Te aronga oki i tau i ta te kopapa nei, te akono ra i ta te kopapa; kareka te aronga i tau i ta te vaerua ra te akono ra ia i ta te vaerua.” (Roma 8:5) Ko te tangata tei rauka te pakari mou, kare tona oraanga i akamouia ki runga i te au mea e navenave ei, e te au mea kopapa. Tei runga ra i te tavini anga ia Iehova e te rave i te au ikianga tau i roto i tona oraanga. (Maseli 27:11; e tatau ia Iakobo 1:2, 3.) Kare aia e vare ua i te rave i te au mea tarevake. Kua kite ra aia eaa te mea tika e ko te reira rai tana ka rave.

11, 12. (a) Eaa ta Paulo i tuatua no runga i te Kerititiano ‘tei tereniia kia kite’? (e) Akapeea te riro anga tetai ei Kerititiano pakari mou, i aite ei ki te tu i riro ei tetai ei tangata tarekareka?

¹¹ Ka angaanga pakari tatou ei reira e rauka ai te pakari mou. Tata te apotetoro a Paulo e: ‘Kareka te kai pakari ra, na te aronga pakari ïa, na te aronga tei mātau i te taangaanga e tei tereniia kia kite eaa te mea meitaki e eaa te mea kino.’ (Ebera 5:14) I roto i te reo Ereni, ko te kupu tei uriia ei “kite,” tona  aiteanga, “tereniia.” No runga i te tuatua “tereniia,” penei ka manako tatou i tetai tangata tarekareka e tereniia ra.

¹² Me kite tatou i tetai tangata karape i te tarekareka, kua kite tatou e kua roa te tuatau e te tereni anga iaia i rauka ai iaia tera tu karape. Kare aia i te tangata tarekareka i tona anauia mai anga. Me anauia mai tetai pepe, kare aia e kite ka akapeea me taangaanga i tona rima e tona nga vaevae. I te tuatau ra ka aereia, ka kite aia akapeea me mou i tetai apinga e ka akapeea me aere. Na roto i te tereni anga iaia, ka riro mai aia i reira ei tangata tarekareka. Mei tera rai tatou, ka pou tetai tuatau i te tereni anga ia tatou kia riro mai ei au Kerititiano pakari mou.

13. Eaa te ka tauturu ia tatou kia kite i to Iehova aerenga manako e tona au arataa?

¹³ I roto i teia puka, kua akara ana tatou e ka akapeea e rauka ai ia tatou kia aru i to Iehova aerenga manako e tona au arataa. Kua apii tatou eaa te ō maira me āriki e me akaperepere tatou i to Iehova au turanga. Me rave tatou i tetai au ikianga, ka ui tatou kia tatou uaorai e: ‘Eaa ra te au ture e te au kaveinga Pipiria te ka tau no teia turanga? Ka akapeea ra e rauka ai iaku i te taangaanga i te reira? Eaa ra ta Iehova e inangaro maira kia rave au?’—E tatau ia Maseli 3:5, 6; Iakobo 1:5.

14. Eaa te ka anoanoia kia rave tatou ei akamatutu i to tatou akarongo?

¹⁴ Kare rava tatou e akamutu i te akamatutu i to  tatou akarongo i roto ia Iehova. Mei te kai rai i te au kai memeitaki te ka riro ei tauturu ia tatou kia akamatutu i to tatou kopapa, ka riro katoa te apii no runga ia Iehova ei tauturu ia tatou kia akamatutu i to tatou akarongo. I to tatou akamata anga i te apii i te Pipiria, kua kite tatou eaa tikai te au tuatua mou no runga ia Iehova e tona au arataa. Inara i te au tuatau tei aereia, kua anoanoia kia oonu atu to tatou mārama. Ko te aiteanga tera o ta Paulo tuatua e: “Kareka te kai pakari ra, na te tangata pakari ïa.” Me taangaanga tatou i te au mea ta tatou i apii, ka rauka ia tatou te pakari mou. Te akakite maira te Pipiria kia tatou e: “Ko te pakari rai te mea meitaki.”—Maseli 4:5-7; 1 Petero 2:2.

15. Mei teaa tikai ra te puapinga kia inangaro mou tikai tatou ia Iehova e to tatou au taeake e te au tuaine?

¹⁵ Penei te matutu ra tetai tangata e te maroiroi ra aia, inara nona kia vai maroiroi ua rai, ka anoanoia aia kia akono meitaki iaia. Mei tera rai te tangata kua rauka iaia te pakari mou, ka tauta pakari aia kia vai matutu ua rai tona pirianga kia Iehova. Te akamaara maira a Paulo ia tatou: “E kimi matatio ia kotou uaorai i to kotou akarongo; e akara matariki ia kotou uaorai.” (2 Korinetia 13:5) Inara, e maata atu te ō maira. Ka anoanoia kia maata ua atu rai to tatou inangaro no Iehova e to tatou au taeake e te au tuaine. Akakite a Paulo: “Tei iaku ua rai . . . te au kite katoa; e tei iaku te au akarongo katoa, e tikaʼi iaku kia apai ke i te maunga, e kare oku aroa, kare ua aku e puapinga.”—1 Korinetia 13:1-3.

16. Eaa ra ta Satani e inangaro maira ia tatou kia irinaki?

¹⁶ Ka inangaro a Satani ia tatou kia manako e kare rava e rauka ia tatou kia akamareka ia Iehova. Ka inangaro aia kia taitaia tatou e kia manako e kare takiri e ravenga no to tatou au manamanata. Kare aia e inangaro kia irinaki tatou i to tatou au oa Kerititiano, e kare aia e inangaro kia mataora tatou. (Ephesia 2:2) Kua kite ua a Satani e ka riro te aerenga manako apikepike ei takino ia tatou e to tatou pirianga kia Iehova. Inara kua oronga mai a Iehova i tetai apinga ei tauturu ia tatou kia patoi takiri i te manako paruparu. Kua oronga mai aia i te manakonakoanga no tatou.

17. Mei teaa ra te puapinga o te manakonakoanga?

¹⁷ I roto ia 1 Tesalonia 5:8, akaaite te Pipiria i to tatou manakonakoanga ki te pare ei paruru i te upoko o te vaeau i roto i te tamaki. Kua kapikiia te reira e ko “te manako ora.” Ka riro te manakonakoanga o ta Iehova au taputou ei paruru i to tatou manako e ei tauturu ia tatou i te kopae i te au manako paruparu.

18, 19. Akapeea to Iesu manakonakoanga i riro ei ei akamaroiroi iaia?

¹⁸ Kua riro to Iesu manakonakoanga ei akamaroiroi iaia. I te po openga o tona oraanga i te enua nei, e maata te au turanga ngatā tana i na roto. Kua pikikaaia aia e tetai oa piri tikai. Kua karanga tetai oa ke mai e kare aia i kite ia Iesu. Kua akaruke tetai papaki iaia e kua oro. Kua kopae tona uaorai  iti tangata iaia, e kua umuumu ratou kia tamateia aia i runga i te satauro. Eaa ra tei tauturu iaia kia akakoromaki i teia au turanga kino? Te karanga ra a Ebera 12:2 e: ‘Ko te meitaki i tukuia mai ki mua i tona aroaro, e kua akakoromaki i te satauro, kare i akono i te akama, e te noo ra i teianei i te pae katau i te terono o te Atua.’

¹⁹ Kua kite a Iesu e me vai tiratiratu ua aia, ka riro tera ei akakakā i tona Metua e ei akapapu e e pikikaa a Satani. Kua riro teia manakonakoanga ei rekareka anga maata nona. Kua kite katoa aia e kare e roa atu ka taokotai akaou atu aia ki tona Metua i runga i te rangi. Riro teia manakonakoanga ei tauturu iaia kia akakoromaki. Ka inangaro tatou kia aite mei ia Iesu, e kia akamou ki runga i to tatou  manakonakoanga. Na teia e tauturu ia tatou kia akakoromaki noatu eaa te ka tupu.

20. Eaa te ka tauturu ia koe kia ngaueue kore?

²⁰ Te kite maira a Iehova i toou akarongo e toou tu akakoromaki. (Isaia 30:18; e tatau ia Malaki 3:10.) Taputou mai aia “e nana e oronga mai i ta to ngakau e anoano ra.” (Salamo 37:4) No reira kia mou marie i toou manakonakoanga. Te inangaro ra a Satani kia kore toou manakonakoanga e kia manako koe e kare a Iehova e akatupu i tana i taputou mai. Inara eiaa koe e tuku ua atu ki ta te aerenga manako paruparu! Me kite koe e te paruparu atura toou manakonakoanga, pati kia tauturu mai a Iehova ia koe. Akamaara i te au tuatua i roto ia Philipi 4:6, 7: “Auraka rava kotou e apiapi i te au  mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.”

21, 22. (a) Eaa to Iehova akakoroanga no te enua? (e) Eaa taau ka rave ma toou ngakau katoa?

²¹ E akataka ua rai i tetai taime no te akamanako marie no runga i te tuatau ki mua. Kare e roa atu, ka akamori te au tangata ravarai e ora nei, ia Iehova. (Apokalupo 7:9, 14) E akamanako ua ana no runga i te oraanga i te ao ou. E meitaki rava atu te reira i tetai ua atu mea ka akamanako tatou! Ka kore a Satani, tana au temoni e te au tu kino pouroa. Kare koe e maki, e kare e mate. Kareka ra ka ara mai koe i te au rā ravarai ma te maroiroi e te rekareka e, te ora nei koe. Ka taokotai te katoatoa i te akariro anga i te enua ei Parataito. Ka rauka te kai meitaki na te katoatoa e te au ngai noo anga meitaki. Kare te tangata e takinga kino i tetai e tetai, ka takinga meitaki ra. I te au tuatau ka aereia, ka “rauka te rangatira meitaki o te tamariki a te Atua,” e ka rekareka te tangata ravarai i te enua nei.—Roma 8:21.

²² Inangaro a Iehova kia akariro koe iaia ei Oa meitaki rava atu noou. No reira kia rave i taau ka rauka ma to ngakau katoa i te akarongo ia Iehova, e kia akapiri vaitata kiaia i te au rā ravarai. Ae, kia vai tamou rai tatou katoatoa i roto i te aroa o te Atua e tuatau ua atu!—Iuda 21.