Taangaanga i te au manako kua papu e e tika te reira. Akakite i te au manako no roto mai i te Tuatua a te Atua, me ka tau e tatau mai i te reira. Me ka taiku koe i tetai manako no runga i te kite taieni, tetai nuti, tetai akaraanga me kore i tetai ua atu manako ei turu i taau e apii ra, kia akapapu e kua tano te reira.

Kia rotai taau akamārama anga. Akamārama i te au irava kia tau ki te aerenga manako, kia āū ki te katoa anga o te karere a te Pipiria, e pera ki te au puka ta te au “tavini akono meitaki e te pakari” i akapapa na tatou. (Mata. 24:45) Me ka taiku koe i tetai manako kare no roto i te Pipiria, akapapu eiaa e taui i te aerenga manako o te tangata i tata i te reira.

Akamārama eaa te apiianga. Me oti ia koe te tatau i tetai irava me kore i te taiku i tetai manako kare no roto i te Pipiria, ui i tetai au uianga me kore akakite i tetai au akatutuanga te ka tauturu i te tangata kia akamanako eaa te apiianga.