Kia “riro kotou ei au orometua” i te apii i te tangata. (Ebe. 5:12) Akamanako ana ia Iehova—te Puapii maata rava atu i roto i teia ao e pini ua ake, te pati maira aia ia tatou kia apii i tetai ke no runga iaia! Ko te apii i te tika no runga ia Iehova i roto i te ngutuare, i te putuputuanga me kore i roto i te ngai tutu aere—e apainga maata e te puapinga te reira. Akapeea e rauka ai ia tatou te rave i teia apainga?

Ka kiteaia te pauanga i roto i ta Paulo au tuatua kia Timoteo: “E akamaroiroi rai i te tatau i te tuatua, e te ako, e te apii, e tae ua atu au.” Karanga katoa aia: “Tei te akapera oki e oraʼi koe, e te aronga katoa e akarongo mai ia koe ra.” (1 Timo. 4:13, 16) E karere ora taau e akakite ra ki te tangata. No reira i puapinga ai kia akamaata atu i to tatou karape i te tatau e te apii. Te akakoroanga o teia poroutia, kia tauturu ia koe i roto i te reira tuanga. Teia tetai au akanoonoo anga i roto i teia poroutia:

Kare atu e puapii tei aite kia Iehova. (Iobu 36:22) No reira ka tauturu teia poroutia ia tatou kia karape atu i te tatau e te apii. Auraka e akangaropoina e ko Iehova te Tumu o ta tatou karere, e nana e arataki mai i te tangata kiaia. (Ioane 6:44) Pure putuputu no te vaerua tapu e kia tatau putuputu i te Pipiria. E akameitaki ua rai ia Iehova, kare ia koe uaorai. Tauta i te akakeu i tetai ke kia akatupu i te inangaro no Iehova.

Kua oronga ia atu te apainga naau kia apii i te tangata ki te karere puapinga roa atu. Kua papu ia matou e me irinaki kotou i te maroiroi “ta te Atua i oronga” mai, ka rauka ia kotou te rave i ta kotou apainga.—1 Pete. 4:11.

To kotou au taeake,

Pupu Akaaere o te Au Kite o Iehova