UIANGA 3
Akapeea Au me Tuatua ki Toku Nga Metua?
EAA TAAU KA RAVE?
Akamanako ana i teia akaraanga: E po Ruitoru teia. Kua akaoti a Geoff, e 17 ona mataiti i tana angaanga, e kua papa no tetai manga akangaroi! Kua pata aia i te tivi e kua topa ua ki runga i tona nooanga.
I taua taime rai, tu mai a Tati i ko i te ngutupa, e kare aia e mataora ana.
“E Geoffrey! Eaa koe i kaimoumou taime ua ai i te akarakara tivi, tano tikai ka tauturu koe i toou teina kia akaoti i tana apii? Kare koe e akarongo ana!”
“Teia akaou a manamanata,” i koumuumu ei a Geoff.
Akara atu a Tati. “Eaa taau i tuatua mai e tama?”
“Kare e apinga e Tati,” i karanga ai a Geoff ma te takara i tona mata.
Riri tikai a Tati i teia taime. “Eaa koe e tuatua akapera mai kiaku!” i karanga ai aia.
Me ko koe a Geoff, eaa taau ka rave kia kore e tupu teia manamanata?
TĀPU E AKAMANAKO!
Mei te akaoro motoka rai, me tae koe ki tetai ngai kua araiia te mataara, ka kimi koe i tetai mataara ke atu. Koia katoa rai me tuatua koe ki toou nga metua.
EI AKARAANGA:
“E ngata iaku i te tuatua ki toku papa,” i na tetai tamaine ko Leah. “Te tuatua ra au kiaia, e oti ka karanga mai aia, ‘Aue, te tuatua maira koe kiaku?’”
E TORU A LEAH IKIANGA.
-
A. Ka vaa maata ki tona papa.
Kapiki a Leah, “Eaa e koe, puapinga teia! Akarongo mai!”
-
E. Kare e tuatua akaou kiaia.
Kare a Leah e inangaro i te tuatua no runga i tona manamanata.
-
NG. Tiaki aia a tetai tuatau no te tuatua akaou.
Ka tuatua akaou a Leah ki tona papa, me kore ka tata i tetai reta.
Teea ikianga taau ka inangaro kia aru a Leah?
AKAMANAKO: Ngai ke ua te manako o te papa—kare aia e kite eaa te manamanata. Me iki a Leah i te Ikianga A, kare tona papa e mārama eaa aia i riri ei. Kare teia ikianga e akakeu i te papa kia akarongo kia Leah, kare katoa e akaari i te tu ngateitei e te tu kauraro kiaia. (Ephesia 6:2) No reira, kare teia ikianga e tauturu ia Leah raua ko tona papa.
Eiaa e tuku i tetai araianga kia tāpu ia koe, kimi i tetai mataara ke me tuatua ki toou nga metua
Penei ko te Ikianga E te mataara māmā i te iki, kare ra i te mea meitaki. No teaa ra? Ei akatikatika i tona manamanata, ka anoanoia a Leah kia tuatua ki tona papa. Me ka tauturu tona papa iaia, ka anoanoia aia kia kite eaa to Leah manamanata. Kare e tau kia noo muteki ua.
Kareka te Ikianga NG, kare teia e arai ia Leah. Mari ra, ka tuatua akaou aia a tetai tuatau ke atu. Me iki aia i te tata reta ki tona papa, penei ka maru mai a Leah.
Me tata reta aia, ka tauturu katoa iaia kia akakite i tana ka inangaro i te tuatua. Me tatau a papa i te reta, ka kite aia eaa ta Leah e inangaro ra i te akakite. Ka tauturu katoa iaia kia mārama eaa te manamanata. Ka tauturu te Ikianga NG ia Leah raua ko tona papa. Me na roto i te tuatua me kore te tata reta, te aru ra teia i te akoanga a te Pipiria: “Ka umuumu tatou i te tuatua i akatupu i te au.”—Roma 14:19.
Eaa tetai atu ikianga ta Leah ka iki?
Akamanako i tetai atu ikianga. E oti, akamanako eaa ta te reira ka akatupu.
EIAA E TUKU I TE AU MANAKO TUKEKE
Akamaara, taau i tuatua e ta toou nga metua e manako ra, kare e aiteite ana.
EI AKARAANGA:
Me ui mai toou nga metua eaa koe i riri ei. Ka pau atu koe, “Kare au e inangaro i te akakite atu.”
Ta toou nga metua e manako maira: “Kare au e irinaki ana ia korua. Ka akakite ra au i te manamanata ki toku au oa.”
Akamanako e e manamanata toou, inangaro toou nga metua i te tauturu ia koe. Inara karanga atu koe: “Kare e manamanata, ka rauka iaku i te kimi i tetai ravenga.”
-
Eaa ta toou nga metua ka manako?
-
Eaa tetai pauanga meitaki taau ka oronga atu?
Ka Reka Katoa Koe i Teia
UI TE AU MAPU E
Akapeea Au me Tuatua ki Toku Nga Metua no Runga i ta Raua Ture?
Apii akapeea me tuatua ki toou nga metua na roto i te tu akangateitei e penei ka poitirere koe eaa te ka tupu.
TEATA TORŌIA
Akapeea au me Tuatua ki Toku Nga Metua?
Akapeea koe me tuatua ki toou nga metua noatu kare koe e inangaro ana?
