Akamanako ana i teia akaraanga: Te akaoro ra a David ki tetai ngai kare aia i mātau. Te akaari maira te au akairo o te mataara e kare aia e tae ki tana ngai e akakoro ra. Kite mai a David e kua ngaro aia. Papu e kua tarevake te ngai i tapaʼe ei aia.

Me ko koe a David, eaa taau ka rave?

Teia taau ikianga:

1. A. Pati i te tauturu

2. E. Akara i te mapu, me kore GPS.

3. NG. Akaoro ua atu, ma te irinaki e ka kitea e koe te mataara.

Akara anga, kare ko te NG te ikianga meitaki.

E meitaki atu te Ikianga E i te ikianga mua. No te mea, tei te pae ua ia koe te mapu me kore GPS ei tauturu ia koe kia taeria te ngai e akakoro ra koe.

Mei te reira rai, ka rauka i te Pipiria i te tauturu ia koe!

Ka rauka i teia puka oko maataia i te

• arataki ia koe na roto i te au manamanata o te oraanga

• tauturu ia koe kia kite no runga ia koe uaorai e kia riro mai ei tangata meitaki

• akaari mai kia koe akapeea e rauka ai te oraanga meitaki rava atu

Mei te tuatau i akamata ai tatou i te tuatua, ui tatou i te au uianga.

• Eaa ra te rangi i auika ai?

• Kua maaniia te au etu ki teaa?

Penei i muri mai, kua akamata tatou i te ui i te au uianga no runga i teianei ao takapini ia tatou.

• Eaa ra i tupu ei te au mea kino?

• Eaa ra te tangata i mate ei?

Akapeea me te vai ua ra te au pauanga i roto i te Pipiria?

Maata te tangata e karanga ana e kua kī te Pipiria i te au tua maani ua, e mea takere teia puka, me kore e ngata tikai i te mārama. Inara ko te Pipiria ainei te manamanata me ko te manako o te tangata no runga i te Pipiria? Kua tarevake ainei te au manako tei akakiteia kia ratou?

Ei akaraanga, manako te tangata e te karanga ra te Pipiria ko te Atua te akaaere o te ao. E tika ainei te reira? Kua kino tikai teianei ao! Kua kī teianei ao i te au tu mamae e te taitaia, te maki e te mate, te putaua e te au tumatetenga natura. I toou manako, ka akatupu ainei tetai Atua aroa i teia au mea?

Ka inangaro ainei koe kia kite i te pauanga? Ka poitirere koe i ta te Pipiria e akakite maira koai te akatere ra i teianei ao!

Papu kua kite mai koe e kua akatumuia te au manako i roto i teia poroutia ki runga i te Pipiria. Irinaki te Au Kite o Iehova e te oronga maira te Pipiria i te au kaveinga papu tikai. Ae, “e mea akauruia mai e te Atua, e e mea meitaki ei apiianga, ei akoanga, ei akakiteanga apa, e ei akakite mai i te tuatua-tika.” (2 Timoteo 3:16, 17) Tei runga ia koe uaorai i te kimikimi marie atu i teia puka taito e te tau no teia tuatau!