Akamanako ana i teia akaraanga: Me akara a Julia ki roto i te iʼo, e matu ua tana ka kite. Tuatua aia kiaia uaorai, “Inangaro au i te akatopa i toku kopapa”—noatu e te akakite ra tona nga metua e tona au oa e e tamaine ikoke ua aia.

E “rima ua paunu” ta Julia ka inangaro i te akatopa mai. Ka rave aia i teia na te akamatepongi anga iaia no tetai nga rā . . .

Me manako koe mei ia Julia rai, eaa taau ka rave?

Kare i te mea tarevake i te akamanako i toou tu akaraanga. No te mea, te akataka meitaki maira te Pipiria i te tu manea o te au vaine e te au tane mei ia Sara, Rahela, Abigaila, Iosepha, e Davida. Karanga ra te Pipiria e e “vaine manea rava” a Abisaga.—1 Ariki 1:4.

E maata te au mapu tei taitaia no runga i to ratou tu akaraanga. E āka manamanata te ka tupu mai. Akamanako ana:

• I roto i tetai kimikimianga, e 58 patene o te tamariki tamaine tei manako e e matu ratou, inara e 17 ua patene e matu.

• I roto i tetai kimikimianga ke mai, e 45 patene o te au vaine tei manako e e matu ratou, inara e au vaine ikoke ua!

• Tauta anga i te akatopa mai i to ratou kopapa, riro mai tetai au mapu ei anorexia—e ravenga takinokino i te kopapa no te akakore anga i te kai.

 Me tupu te maki anorexia kia koe, me kore te akakore i te kai, pati i te tauturu. Tuatua ki toou metua me kore tetai tangata taau e irinaki ra. Karanga ra te Pipiria: “E aroa mairai te [oa mou] i te au tuatau katoa ra, i anau maira te taeake no te tuatau e tumatetengaʼi ra.”—Maseli 17:17.

Na roto i toou tu e akariro ia koe ei tangata manea me kore ei tangata viivii. Akamanako ana ia Abasaloma, te tamaiti a te Ariki ko Davida. Karanga ra te Pipiria:

‘Kare ra e tangata i akapaapaaia no tona purotu e kare rava e kino i roto iaia.’—2 Samuela 14:25.

Inara, kua kī teia mapu tane i te akaparau, noinoi e te pikikaa. No reira kare te Pipiria e akataka maira ia Abasaloma ei akaraanga meitaki; te akatutu maira iaia ei tangata tiratiratu kore, kino e te tā tangata.

No reira, oronga maira te Pipiria i teia akoanga kia tatou:

‘Kia akatangata ouia kotou.’—Kolosa 3:10.

“E to kotou akamanea, eiaa ko te manea ki vao ua ra . . . , ko te tangata ngaro ra ko te ngakau te akamanea.”—1 Petero 3:3, 4.

Kare e kino ana i te inangaro kia akara manea, te mea puapinga rava atu ra, ko toou tu meitaki kare ko toou tu akaraanga. Ka riro toou tu memeitaki i te akavaitata ia koe ki tetai ke, kare ko te kopapa matutu e te manea! Karanga tetai tamaine ko Phylicia, “Ka viviki ua te tangata i te akara mai i toou tu manea, i na ko ta te tangata ka maara, ko toou tu meitaki.”

Reka kore ainei koe i toou tu akaraanga?

I manako ana koe i te rave i tetai vaʼi anga ei akamanea i toou tu akaraanga me kore akakore takiri i te kai?

Eaa taau ka taui no runga i toou tu akaraanga? (Iki i te ka tau.)

• TEITEI

• TEIAA

• ROURU

• KOPAPA

• MATA

• KARA

Me kua iki koe AE ki te nga uianga mua, e oti kua iki e toru tuma ikianga no te uianga openga, akamanako ana i teia: Penei ko koe anake ua te akamanako akapera ra, kare ko tetai ke. Māmā ua i te akamanako me kore i te taitaia tikai no runga i toou tu akaraanga.—1 Samuela 16:7.