UIANGA 9
Ka Irinaki Ainei Au i te au Mea Tupu ua Mai?
EAA TAAU KA RAVE?
Akamanako ana i teia akaraanga: Kua ekoko a Alex. E irinaki ua ana aia i te Atua e i te au mea angaia. I tetai rā, kua māro mai tona puapii taineti e e mea tika tikai te au mea tupu ua, e kua akatumuia ki runga i te kimikimianga papu. Kare a Alex e inangaro kia manakoia mai e e neneva aia. Ui aia kiaia uaorai, ‘Me kua akapapu mai te aronga taineti e e mea tika tikai te au mea tupu ua, eaa au ka ekoko ei?’
Me ko koe a Alex, ka āriki koe i te au mea tupu ua no te mea te akakite ra te puka apii e e mea tika tikai te reira?
TĀPU E AKAMANAKO!
Ka viviki ua te au tangata i te akakite mai eaa ta ratou e irinaki ra, kare ra ratou i kite i te tumu i irinaki ei ratou i te reira.
-
Irinaki tetai aronga i te au mea angaia no te mea te apiiia ra te reira i ko i te are pure.
-
Irinaki tetai aronga i te au mea tupu ua no te mea te apiiia ra te reira i ko i te are apii.
ONO UIANGA KIA AKAMANAKO
Karanga ra te Pipiria: “E akatu oki to te au are ravarai nei; ko tei akatu ra i te au mea katoa, ko te Atua ïa.” (Ebera 3:4) Ka tau ainei kia irinaki i te reira?
Mea neneva me karanga e kare te oraanga i angaia, mei te mea rai e kare na tetai tangata i akatu i teia are
IRINAKI: Tupu ua mai te au mea takapini i teianei ao na roto i te aruru anga maata.
1. Koai e na teaa i akatupu i te aruru anga maata?
2. Ko teea te mea tau—na roto mai te au mea ravarai i te kare, me e mea angaia ainei?
IRINAKI: No roto mai te tangata i te manu.
3. Me no roto mai te tangata i te manu—ei akaraanga, te monkey—eaa i tuke ei te tu kite o te tangata me akaaiteia ki te monkey?
4. Eaa ra te au mea ora i riro ei ei mea umere tikai?
IRINAKI: E mea tika tikai te au mea tupu ua mai.
5. Ko te tangata tei irinaki i teia, kua akara ainei aia i te au akapapuanga?
6. Eia aronga te irinaki ra i te au mea tupu ua no te mea kua akakiteia kia ratou e te irinaki ra te aronga kite i te reira?
“Me aere koe na roto i te vaorakau e kua kite atu i tetai are manea, ka manako ainei koe: ‘E mea umere tikai! Tano meitaki te inga anga o te au tumu rakau i rauka mai ei teia are.’ Kare rava! Eaa i reira tatou ka irinaki ei e mea tupu ua mai te au mea takapini ia tatou?”—Julia.
“Me akakite mai tetai tangata kua aruru tetai ngai neneianga e kua peniia te au paruru e ka kite koe i te au tataanga o tetai dictionary, ka irinaki ainei koe i te reira?”—Gwen.
EAA KOE KA IRINAKI EI I TE ATUA?
Akamaroiroi maira te Pipiria kia akatupu koe i te “ngakau akono meitaki.” (2 Timoteo 1:7) Teia te aiteanga, eiaa e akatumu i toou irinaki i te Atua ki runga i te
-
MANAKO (Toku manako, e mana teitei rava tetai)
-
AKAKEUANGA A TETAI KE (Maata te aronga aere pure i toku ngai)
-
MĀROANGA (Kua utuutu toku nga metua iaku kia irinaki i te Atua—kare aku ikianga ke atu)
Kia akatumuia ra toou irinaki ki runga i te au akapapuanga tau.
“Me akarongo au ki te puapii e akamārama maira i te tu o to tatou kopapa, kare au e ekoko e e Atua tetai. Tukeke te angaanga a te au mero kopapa e tae ua atu ki te au mero rikiriki. E kare tatou e kite atu me angaanga te reira. Mea umere tikai te kopapa tangata!”—Teresa.
“Me kite atu au i tetai are teitei, paī, me kore motoka, ka ui au kiaku uaorai, ‘Naai i maani i teia?’ Ei akaraanga, na tetai aronga kite i maani i te motoka no te mea te anoanoia ra te au tuanga rikiriki kia tere te motoka. Me na tetai tangata i maani i te motoka, pera katoa rai te tangata nei.”—Richard.
“Te maata atu taku apii anga i te taineti, te iti atura toku irinaki i te au mea tupu ua. . . . Kiaku, ka anoanoia te ‘akarongo’ maata kia irinaki i te au mea tupu ua i to te irinaki anga i Tei Anga mai ia tatou.”—Anthony.
KIA AKAMANAKO
Kare te aronga taineti i āriki ana e i akamārama mai ake i te au mea tupu ua noatu kua roa ta ratou kimikimianga i te reira. Me kare te aronga taineti e āriki i te au mea tupu ua—e ko ratou te aronga kite karape—ka ekoko ainei koe i teia apiianga?
