Akamanako ana i teia akaraanga: Kare i pou ake e tai ngauru miniti ia Karen i ko i te ngai tamataoraanga, kua akarongo aia i tetai reo i muri iaia.

Uri atu a Karen, kite atu i tona oa ko Jessica e mou ra e rua nga moina. Kite aia e nga moina kava teia. Mou atu a Jessica i tetai moina ki mua ia Karen e kua karanga atu, “Ka akatikaia rai koe kia inuinu, ea?”

Inangaro a Karen i te patoi atu, e oa ra a Jessica nona. Kare a Karen e inangaro i tona oa kia manako e e tamaine tu maromaroa aia, no te mea e tamaine meitaki a Jessica. No reira me te inu ra aia, kare i te mea kino. Tuatua a Karen kiaia uaorai, ‘E manga inuinu ua, kare e te kai drug nei au.’

Me ko koe a Karen, eaa taau ka rave?

Ei rave i te ikianga meitaki no teia turanga, ka anoanoia te tu akapapuanga. Toou tu akapapuanga, e akakite anga e koai koe e eaa taau e irinaki ra. Ka akamaroiroi teia ia koe kia akatere i toou uaorai oraanga e kare na tetai ke.—1 Korinetia 9:26, 27.

Akapeea e rauka ai ia koe teia turanga? E mea meitaki kia pau i teia au uianga.

Te kite anga i toou tu meitaki e te maroiroi, ka akakeuia toou tu irinaki papu.

AKARAANGA PIPIRIA: Tata te apotetoro ko Paulo: “Te kamakura ra au i te tuatua, kare ra au e kamakura i te kite.” (2 Korinetia 11:6) Mārama meitaki a Paulo i te au irava e kua rauka iaia i te patoi atu i te aronga tei akakoko mai iaia. Kare aia i akatika i ta ratou tuatua akakoko kia akaparuparu i tona tu irinaki papu.—2 Korinetia 10:10; 11:5.

TAAU KA AKAMANAKO: Tata i toou tu kite me kore tu karape.

Teianei, e akataka mai i toou tu meitaki. (Ei akaraanga, e tangata aroa koe? oaoa? meitaki? e te irinakiia?)

Me e ngai paruparu to te vivi ketaketa, ka maʼuti ua te reira. Pera katoa me tuku koe i toou au tu paruparu ei akatere i toou oraanga, ka kino roa atu toou tu.

AKARAANGA PIPIRIA: Kua mārama a Paulo eaa tona au tu paruparu. Tata aia: “Te rekareka nei oki au i te ture a te Atua i te akonoanga i te tangata i roto ra; Te kite nei ra au i tetai ture i roto i toku kopapa nei, i te māro mai anga i te ture i roto i toku ngakau, e te akariro anga iaku ei tuikaa na te ture kino i roto i toku nei kopapa.”—Roma 7:22, 23.

TAAU KA AKAMANAKO: Eaa te au tu paruparu ka inangaro koe i te akatere?

Ka aere ainei koe ki roto i tetai taxi e ka akakite ki te tangata akaoro kia takapinipini aere ua e pou ua atu tana penitini? Kare, e neneva te reira—e te āka moni!

Eaa te apiianga? Ka riro te au akakoroanga ei akatere i toou oraanga. E ngai e e parani taau e akakoro ra kia rauka te reira.

AKARAANGA PIPIRIA: Tata a Paulo: “Te oro nei au, kare ra mei te mea kare i kitea.” (1 Korinetia 9:26) Kare aia i tuku i te au mea puapinga kore kia akatere i tona oraanga, kua akanoo e kua akono a Paulo i te au akakoroanga.—Philipi 3:12-14.

TAAU KA AKAMANAKO: Tata e toru akakoroanga taau ka akanoo no teia mataiti e tu mai nei.

Me kare oou irinakianga, kare koe e kite eaa taau ka iki, ka aru patete ua koe i toou au oa—kare i reira oou tu akapapuanga.

Me akanoo koe i taau ikianga ki runga i taau e irinaki ra, ka tinamou toou tu akapapuanga—noatu eaa ta etai ke ka rave.

AKARAANGA PIPIRIA: I tona mapuanga, “te manako ra te ngakau” o te peroveta ko Daniela kia akono i te au ture a te Atua noatu e kare aia i te pae i tona ngutuare tangata. (Daniela 1:8) Na te aru anga i te reira, kua rave a Daniela i tana e irinaki ra.

TAAU KA AKAMANAKO: Eaa taau e irinaki ra? Ei akaraanga: Te irinaki ra koe i te Atua? No teaa ra? Eaa koe i irinaki ei e e Atua tetai?

Te irinaki ra koe e e meitaki te au kaveinga a te Atua noou? No teea ra?

I teianei, ko teea taau ka inangaro—ko te rau e pupuiia ra e te matangi me ko tetai tumu rakau kare e inga i roto i te uriia ririnui? No reira, akaketaketa i toou tu akapapuanga, ka aite koe mei taua tumu rakau rai. Na te reira e tauturu ia koe kia pau i te uianga, Koai au?