Akamanako ana i teia akaraanga: Kare a Thomas e inangaro i te aere ki te apii i teia rā, apopo, e kare rava. E toru marama i akamata ai teia turanga, te tuatua pikikaa aere anga tona au oa apii no runga iaia. E oti, aru mai te au ingoa tatiaeae. Tetai taime, ka opara tetai tamaiti i te puka apii a Thomas mei tona rima e ka maani e e mea tupu poitirere ua. Me kore ka tutuki tetai tamaiti iaia e me uri atu a Thomas, kare aia i kite e naai i tutuki mai iaia. I nanai, kino roa atu te rave kino i to Thomas tatau anga i tetai karere i runga i te Initaneti e ka inangaro tetai tangata i te tā iaia . . .

Me ko koe a Thomas, eaa taau ka rave?

Tei ia koe te tu maroiroi! Ae, ka rauka ia koe i te patoi atu i te tangata rave kino ma te kore e taangaanga i toou puku rima. Akapeea ra?

•   NOO MARU UA. Karanga ra te Pipiria: “E akaope te neneva i tona manako ki vao: kareka te tangata pakari, e tāpu ïa e kia roa iti ake.” (Maseli 29:11) Me noo maru ua koe, penei ka akamutu te tangata rave kino i te tamanata ia koe.

• AURAKA E AKAKINO ATU. Karanga ra te Pipiria: “Auraka te kino e tutakiia atu ki te kino i te tangata ravarai nei.” (Roma 12:17) Me akakino atu koe, ka kino atu te turanga.

• AURAKA E KIMI MANAMANATA. Karanga ra te Pipiria: “E kite mamao te tangata pakari i te kino, e kua pipini iora.” (Maseli 22:3) Me ka rauka, e kopae i te aronga akatupu manamanata e te au turanga te ka tupu te tu rave kino.

• PAU POITIRERE. Karanga ra te Pipiria: “Ko te tuatua maru ra tei akaanga ke i te riri.” (Maseli 15:1) Penei ka tamata koe i te tu katakata. Ei akaraanga, me karanga mai tetai tangata rave kino e e matuia ra koe, pau atu koe, “Tika rai, inangaro au i te akatopa mai toku kopapa!”

• AKAATEA MAI. “Me ka muteki ua koe, akaari maira e pakari atu koe e e maroiroi atu i te tangata e tatiaeae maira,” karanga ai a Nora, e 19 ona mataiti. “Te akaari maira i te tu akakoromaki marie—e tu ta te tangata rave kino i ngere.”—2 Timoteo 2:24.

• AKAARI I TE TU PAPU. Ka viviki ua te aronga rave kino i te kite e te ekoko ra tetai tangata iaia uaorai e kare aia e patoi mai. Tetai tua, me kite te aronga rave kino e kare teia aronga e mataku atu ana, kare ratou e tatiaeae akaou.

• AKAKITE I TE REIRA. Karanga tetai vaine tei puapii ana: “Ka akamaroiroi au i tetai kua tupu te rave kino kiaia kia akakite i te reira. E tau kia rave i te reira ei paruru i tetai tangata ke atu kia kore te rave kino e tupu kiaia.”