Kua opara tetai tangata ia Annette ki raro, e kare aia i kite eaa te tupu ra kiaia. “Tauta pakari au i te opara atu iaia,” karanga ai a Annette. “Kua tauta rai au i te ava maata inara kare e apinga i topa mai ki vao. Kua opara, kua tue, kua moto e kua paraku atu au iaia. Kite i reira au e e matipi tetai i kō mai iaku. Kare au e oriori akaou.”

Me tei roto koe i taua turanga, eaa taau ka rave?

Noatu ka papa ua koe—te matakite anga me aere ki vao i te po—ka tupu rai te kino. Karanga ra te Pipiria: “Kare tei te vaevae viviki te emo e emo ei, . . . e kare tei te karape te kiteia mai; e tuatau ra, e te manuia ua, to te tangata katoa ra.”—Koheleta 9:11.

Ko tetai au mapu mei ia Annette rai, kua takinoia e tetai tangata ke. Tetai pae, kua takinoia e tetai tangata ta ratou i kite me kore tetai mema o te kopu tangata. E tai ngauru ua rai ona mataiti, kua takinoia a Natalie e tetai mapu e noo ra i te pae mai i tona kainga. “I te akamataanga, kua mataku e kua akama tikai au e kare au e inangaro i te akakite i te reira ki tetai tangata,” i karanga ai aia.

Te manako apa nei rai a Annette no te kino tei tupu kiaia. Karanga aia: “E oki ua ana au i te akamanako eaa tei tupu i taua po. Naringa au i tauta pakari i te opara atu iaia, kare teia kino e tupu kiaku. Toku kōia anga ki te matipi, mataku au. Kare aku apinga i rauka i te rave, naringa ra au i tauta tikai.”

Taitaia katoa a Natalie no te manako apa. Karanga aia: “Naringa kare au i te tamaine irinaki ua i tetai ke, kare au e oronga i tetai atianga kia takinokino mai tera tamaiti iaku. Akakite mai to maua nga metua e noo kapiti maua ko toku teina me kangakanga i vao, kare ra au i akarongo ana kia raua. Taitaia tikai toku ngutuare no teia āka manamanata taku i akatupu kia ratou. Ko teia te mea ngata roa atu i te akakoromaki.”

Me aite toou manako ki to Annette raua ko Natalie, e akamaara e kare te aronga tei kangaia i akatika ana i te reira. Inara, karanga tetai aronga e kare teia i te manamanata, e mea mātau na te tamariki tamaroa kia akapera, me kore e tano rai kia kangaia tera tamaine. Inara kare tetai ua atu e inangaro kia akaperaia. Me kua tupu teia angaanga viivii kia koe, kare noou te apa!

Tika rai, māmā ua i te tatau e “kare noou te apa;” e ngata ra i te irinaki i te reira. E akamanako ua ana rai tetai aronga eaa tei tupu kia ratou, e ka ō mai te manako apa e te manako ekoko. Koai te ka puapingaia me noo muteki ua—ko koe ainei me ko te tangata tei takino mai ia koe? Tei ia koe te ikianga.

Te akakite maira te Pipiria e i te tuatau e maata tona au manamanata, kua tuatua te tangata tiratiratu ko Iobu: “E tuatua rai au ma te mamae o toku nei vaerua.” (Iobu 10:1) Ka puapingaia rai koe me aru koe i teia manako. Me tuatua koe ki tetai tangata taau e irinaki ra, ka tauturuia koe kia āriki i tei tupu e ka akamaru mai i toou ngakau taitaia.

Āriki katoa a Annette i teia. Karanga aia: “Kua tuatua au ki tetai oa piri vaitata e kua akamaroiroi mai kia tuatua au ki tetai nga tangata pakari Kerititiano i roto i taku putuputuanga. Mataora au e kua rave au i te reira. Maata te taime kua noo mai raua i te pae iaku e kua akakite mai i taku tikai e inangaro ra i te akarongo—kare noku te apa. Kare takiri aku apa.”

Kua akakite a Natalie no runga i te takinokino ki tona nga metua. Karanga aia: “Kua turuturu e kua akamaroiroi mai raua iaku kia tuatua no runga i tei tupu, e kua tauturu teia iaku kia kore e maromaroa e kia kore e riri.”

Na roto i te pure, akapumaanaia a Natalie. Karanga aia: “Na te pure anga ki te Atua i tauturu mai iaku, i te tuatau tikai kare au e inangaro i te tuatua ki tetai tangata. Me pure au, ka rauka iaku i te tuatua maoraora ua. Ka akatupu te reira i te ‘au kiaku.”

Ka kite katoa mai koe e “e tuatau to te akaora.” (Koheleta 3:3) Akono meitaki ia koe uaorai i te pae kopapa e te pae manako. Akangaroi meitaki. Mea puapinga rava atu, irinaki ki runga ia Iehova, te Atua o te pumaana.—2 Korinetia 1:3, 4.

Me e tamaine koe kua māroia kia piri atu ki tetai angaanga tau kore, e akakite papu atu, “Auraka e rave i tera!” me kore, “Akaatea i toou rima!” Auraka e mataku e ka akaruke aia ia koe. Me akapera aia, kaimoumou taime ua i te akainangaro iaia! Ko te tangata tei akangateitei ia koe e taau e irinaki ra, ko taau ïa ka inangaro.

“I te apii tua rua, ka utiʼuti te tamariki tamaroa i toku papa, e ka tuatua viivii mai—e meitaki atu me piri ainga au kia ratou.”—Coretta.

Toou manako, ko taua au tamaroa te

1. A. Tatiaeae ra iaia?

2. E. Akameamea ra iaia?

3. NG. Takinokino ra iaia?

“I runga i te bus, kua akamata tetai tamaiti i te tuatua viivii mai e te amiri mai iaku. Kua pokara atu au i tona rima e kua akakite atu kiaia kia akaatea. Akara mai aia iaku, manako e e neneva au.”—Candice.

Eaa toou manako ta teia tamaiti e rave ra kia Candice?

1. A. Te tatiaeae ra iaia?

2. E. Te akameamea ra iaia?

3. NG. Te takinokino ra iaia?

“I te mataiti i topa, akakite ua mai ana tetai tamaiti e āka inangaro tona iaku e kia aere kapiti maua, noatu e kua akakite ana au e kare. Tetai taime, ka maoro aia i toku rima. Akakite au e e akamutu, kare ra aia e akamutu. I tetai rā, iaku e tapeka ra i toku tamaka, papaki mai aia ia muri iaku.”—Bethany.

Toou manako, ko teia tamaiti te

1. A. Tatiaeae ra iaia?

2. E. Akameamea ra iaia?

3. NG. Takinokino ra iaia?

Ko te NG te pauanga tano no teia nga uianga e toru.

Eaa te tuke o te takinokino mei te akameamea e te tatiaeae?

Okotai rai tua o te takinokino. Ka tupu ua rai te reira noatu kua akakite tei takinokinoia kia akamutu tera tangata.

Kino tikai te takinokino. Ka taki atu te reira ki te takinokino ainga.