“Kua maata mai au i roto i tetai oire tanutanu,” i karanga ai a Agostinho, tei noo i Brazil. “E oraanga putaua tikai to matou. Kua akaruke vave au i te apii no te kimi angaanga e te tauturu i te akono i toku ngutuare tangata.” E 33 oku mataiti i akamata ai au i te apii kia kite i te tatau e te tata. Karanga aia, “Te apii anga au i te tatau e te tata, kua tauturu te reira iaku kia rauka te tu manako papu.”

Ko Agostinho tetai o te kōta mirioni tangata ta te Au Kite o Iehova i apii kia kite i te tatau e te tata i roto i te 70 mataiti i topa. Eaa te Au Kite o Iehova i rave ei i teia au apiianga? Akapeea te tangata te puapingaia anga mei te reira?

Mei te 1935, kua rave te Au Kite o Iehova i ta ratou angaanga tutu aere i roto i te 115 enua. Kia tae te karere ki te au tangata e tuatua ra i te au reo tukeke, ka akatangi te au mitinari i te au rekoti akatangi o te au akoanga Pipiria, e ka oronga i te au puka i roto i te reo o te reira ngai. Noatu e maata te tangata te inangaro ra i te apii i te Pipiria, kare te maata anga ia ratou e kite i te tatau e te tata.

No te mea kare te tangata e kite i te tatau i te Pipiria, kare i reira ratou e kite i te taangaanga i te au kaveinga Pipiria. (Iosua 1:8; Salamo 1:2, 3) Ka ngatā ia ratou i te rave i ta ratou au apainga ei Kerititiano. Ei akaraanga, me kare te au metua e kite i te tatau, ka ngatā ia ratou i te apii i te Pipiria ki ta ratou tamariki. (Deuteronomi 6:6, 7) E ko te Au Kite ou kare e kite i te tatau, ka ngatā katoa ia ratou i te apii i te Pipiria ki tetai ke.

Mei te 1940 ki te 1959, kua aere a Nathan H. Knorr e Milton G. Henschel, te nga taeake akaaere o te Au Kite o Iehova, ki te au enua tukeke no te tauturu i te akanoo i te au angaanga tutu aere. I te au enua kare te tangata i apiiia i te tatau e te tata, kua akamaroiroi raua i te opati Betela i reira kia akanoo i tetai apii no te tatau e te tata ki roto i te au putuputuanga.

Kua tuku te opati Betela i te au akakiteanga ki te au putuputuanga akapeea me rave i teia au apii. I tetai au enua, e porokaramu apii ta te kavamani ka rauka i te Au Kite i te taangaanga. Ei akaraanga, i Brazil, kua oronga te kavamani i te au puka e te au apinga apii ki te opati Betela e kua tuku ratou i te reira ki te au putuputuanga. I tetai au enua ke, kua maani te Au Kite i ta ratou uaorai porokaramu apii.

Kua orongaia teia apii ki tetai ua atu tane e te vaine, mapu e te ruaine. Te akakoroanga, kia apii ia ratou kia kite i te tatau i to ratou uaorai reo—noatu me maata te reo tukeke ka apiiia i roto e tai putuputuanga.

Akapeea te tangata te puapingaia anga mei teia porokaramu? Akakite tetai Kite i Mexico: “Teianei ka mārama au i ta te Pipiria e akakite maira, e kua akakeu te reira i toku ngakau. Te kite anga au i te tatau, kua tauturu teia iaku kia tuatua ki toku tangata tupu e kua rauka iaku i te akakite i te karere a te Pipiria kia ratou.”

Kua tauturu teia porokaramu i te tangata kia mārama i ta te Pipiria e apii ra, e tetai au puka ke. Karanga a Isaac, tei noo i Burundi: “Te kite anga au i te tatau e te tata, kua tauturu te reira iaku kia apii i te patu are. Kua riro mai au ei tangata patu are e te akaaere nei au i tetai patu anga mamaata.”

Ko Jesusa, tei noo i Peru, e 49 ona mataiti te aere anga aia ki te apii no te tatau e te tata. Karanga aia, “Ei vaine akono ngutuare, ka anoanoia au kia kite i te tatau i te moni e te ingoa o te au kai i ko i te makete. E mea ngatā teia kiaku i mua ana. Mari ua ake te apii no te tatau e te tata, ka aere au ka oko kai na toku ngutuare tangata ma te papu tikai.”

Te au mataiti i aereia mai, kua akameitaki te au arataki o te au enua tukeke i te Au Kite o Iehova no te apii anga i te tangata kia kite i te tatau e te tata. I teia tuatau, te rave nei rai te Au Kite o Iehova i teia apii na roto i te au porokaramu e te au apinga apii tei akameitakiia mai. Kua tata e kua nenei katoa ratou mei te 224 mirioni poroutia i roto i te 720 reo no te tauturu i te tangata kia kite i te tatau me kore no te tauturu i te aronga kare i aere ana ki te apii. *