Ia Okotopa 21, 1940, akakite to Nu Tireni e e akaaerenga akatupu pekapeka e te kino te Au Kite o Iehova. Noatu te au turanga ngata tei tupu no teia akakiteanga, kare te Au Kite o Iehova i tuku i te ‘au. Ei akaraanga, kua akaputuputu rai ratou no te akamorianga noatu ka tamanataia te reira e ka tapekaia ratou e te aronga mana.

Ko Andy Clarke tetai tangata kare i te Kite, ko tana vaine ra ko Mary, e Kite aia. Kua tauta tana vaine i te aere ki te au uipaanga noatu te au manamanata ka tupu. Mataku a Andy e ka tapekaia tana vaine i ko i te uipaanga. Noatu kare i te mea mātau nana, kua aru a Andy ia Mary ki te uipaanga e kua karanga kiaia, “Me ka tapekaia koe, ka tapekaia au!” Mei reira mai, kua aru a Andy i tana vaine ki te au uipaanga pouroa. Aere ua rai, kua papetitoia aia ei Kite. Noatu kua takinokinoia te Au Kite i Nu Tireni i te tuatau o te Tamaki II o te Ao, e manganui mei ia Mary rai tei tauta kia vai tiratiratu kia Iehova.

Tetai rā, kua tāpu te au akava ia John Murray e 78 ona mataiti mei te tuatua anga ki te tangata no runga i te Pipiria mei tera are ki tera are. Akautungaia aia no te rave i te angaanga a tetai akaaerenga akatupu pekapeka. E maata katoa te Au Kite tei apainaia ki mua i te akavaanga. Tetai pae, kua anoanoia kia tutaki i te utunga; e tetai pae, kua tapekaia no tetai toru marama.

Kua patoi te Au Kite i te aere ki te tamaki no to ratou akava ngakau tei tereniia e te Pipiria. (Isaia 2:4) No reira i te tuatau o te tamaki, kua tupu te au turanga ngata ki te maataanga tei māroia kia aere ki te tamaki. No te mea kare ratou e aere ki te tamaki, kua tiria tetai 80 Au Kite ki roto i te puakapa tapekaanga no te tuatau o te tamaki. I roto i reira, noatu te takinokinoanga e te anu, kua akamori tamou teia au taeake ia Iehova ma te rekareka.

Kua viviki te Au Kite i roto i teia au puakapa tapekaanga i te akanoo i te au uipaanga e te angaanga tutu aere. Angaanga ratou mei te putuputuanga rai, kua rave putuputu i te au uipaanga e kua tutu aere ki te au mouauri. Kua akatika katoaia te Au Kite kia rave i te au akaputuputuanga i tetai au ngai tapekaanga, me e tiaki mouauri tetai i te pae ia ratou. Kua apii tetai au mouauri i te tuatua mou Pipiria i teia au ngai tapekaanga e kua papetitoia.

Ko Bruce te tamaiti openga a Mary raua ko Andy, tei taikuia i mua ana, akariro aia i te tuatau tapekaanga ei atianga kia apii maata atu no runga i te Atua. Akakite aia: “Mei te mea e te aere ra au ki te apii no te mea ka pukapuka au ki te au taeake tukatau i roto i te ngai tapekaanga e e maata taku i apii mei ia ratou.”

I te 1944, kua manako mai te kavamani kia tuku i tetai pae i roto i te ngai tapekaanga kia aere. Inara, kua patoi te aronga mana o te nuku vaeau no te mea irinaki ratou e me tukuia te Au Kite kia aere, ka tuatua ua rai ratou no runga i to ratou akarongo. Akakite mai te kimikimianga: “Noatu ka riro te tapekaanga ei akakotinga i te angaanga a teia aronga, kare te reira e taui ia ratou.”

No te mea kua tae te rongo ki te maataanga no teia au araianga, akamata te tangata i te inangaro kia kite no runga i te Au Kite o Iehova. Aere ua rai, kua āriki te maataanga e kare te Au Kite o Iehova i te aronga kino. Kite mai ratou e au Kerititiano akamoeau e te maru te Au Kite. Tei tupu, kua tupu maata te numero o te Au Kite i Nu Tireni mei te 320 i te 1939 ki te 536 i te 1945!

I tetai au atianga, kua āriki tetai aronga mana taoonga e e mea tika kore te araianga i te Au Kite o Iehova. Te rongo anga tetai akava i te au akaapaanga i tetai taeake no te tutu aere, kua takore aia i te oroanga. Karanga aia: “Kia tau ki taku i irinaki e toku mārama i te ture, e mea manako koreia kia akautungaia tetai tangata no te tuʼa aere i te Pipiria.”

Te takoreia anga te au araianga i te openga o te tamaki, kua maroiroi roa atu te Au Kite i te tauturu i to ratou tangata tupu kia apii no runga i te Patireia o te Atua. I te 1945, kua tata te opati Betela i tetai reta ki te au putuputuanga katoatoa i Nu Tireni, te karanga anga: “E akaari tatou i te tu maru, oaoa e kia takinga meitaki i te katoatoa. Auraka e tauetono e te taumāro atu. E akamaara, te aronga ta tatou ka aravei, te irinaki ra ma te ngakau tae i te au apiianga a to ratou akonoanga e te tauta nei i te akono i te reira. . . . Maataanga ia ratou e au ‘mamoe’ na te Atu te ka tau kia aratakiia kia Iehova e tona patireia.”

I teianei, te akakite aere ra te Au Kite o Iehova i Nu Tireni i te karere Pipiria ki te au tangata e te aronga turoto. I tetai rā i Turangi, i roto i nga ora, kua tuatua tetai Au Kite e 4 ki te 67 aronga turoto mei te 17 enua ke!

Taka meitaki, kua kite mai te iti tangata o Nu Tireni e e au Kerititiano akamoeau e te maru te Au Kite o Iehova, tei akangateitei i te au tuatua mou a te Pipiria. E anere ua atu tei papetitoia ei Au Kite no Iehova i te au mataiti. I te 2019, tere atu i te 14,000 Au Kite tei tavini rekareka ia Iehova i teia enua i apatonga.