I teia mataiti 2022, e maata te nuti no te tamaki, te kino o te turanga moni, e te au tumatetenga natura. Ko te Pipiria anake te ka rauka i te akamārama mai i te aiteanga o teia au tumatetenga.

Te aiteanga o te au tumatetenga no te 2022

 Te akaari maira te au tumatetenga o te mataiti i topa e te noo nei tatou i te tuatau ta te Pipiria i kapiki ko te “tuatau openga.” (2 Timoteo 3:1) Kua akamata mai te reira i te mataiti 1914. Kua aite teia au tumatetenga ki ta te Pipiria i totou no to tatou tuatau:

 “Tamaki.”—Mataio 24:6.

•   “2022 te Mataiti Tupu Akaou te Tamaki Kino ki Europa.” a

 “Onge.”—Mataio 24:7.

•   “2022: E Mataiti Kino te Onge.” b

 “Maki-Mate.”—Luka 21:11.

•   “Tupu akaou te maki polio, kino maata te monkeypox e te kino ua atura te COVID-19, te akaari maira e kino pakari te au maki piri, e te taitaia nei te tangata.” c

 “Au Akairo Mamaata.”—Luka 21:11.

•   “Te matangi vera, te tuatau marō, te aʼi kā, e te au vaipuke. Ka maaraia te tuatau maana 2022 no te au reva kino tei tamate e anere ua atu e te tauatini tuma tangata, e e mirioni ua atu tei ngere i to ratou kainga.” d

 “Ngaueue Anga.”—Luka 21:9.

•   “Makitakita te tangata no te manamanata o te moni, kake te apinga ki runga, tupu maata te patoi anga i te kavamani i te 2022.” e

Eaa te ka tupu a teia mataiti ki mua?

 Kare tatou i kite eaa te ka tupu i te 2023. Kua kite ra tatou kare e roa atu ana, na te Patireia o te Atua, me kore kavamani i te rangi, e akatupu i te au taui anga maata i te enua nei. (Daniela 2:44) Ka takore te reira kavamani i te mamae o te tangata e ka akatupu i te anoano o te Atua i te enua nei.—Mataio 6:9, 10.

 Te akamaroiroi nei matou ia koe kia aru i ta Iesu Karaiti ako ‘kia matakite’ i te au mea e tupu ra i teianei ao tei akatupu i te totou Pipiria. (Mare. 13:37) E aravei mai ia matou ine, kia kite koe akapeea te Pipiria me tauturu ia koe i teianei e akapeea te reira me oronga atu i tetai manakonakoanga meitaki noou e toou ngutuare tangata no te tuatau ki mua.