Akakoromaki—Akapeea te Pipiria me Tauturu
“Na te akakoromaki anga [e] rauka ai te tu au.”—UNESCO Declaration of Principles on Tolerance, 1995.
Ka akatupu te akakoromaki kore i te tu akangateitei kore e te makitakita. Ka akatupu katoa teia i te tuatua makitakita, te iriiri tangata, e te ta ua.
E tukeke to te tangata manako no te tu akakoromaki. Irinaki tetai aronga e kia mareka ua te aronga akakoromaki i te au tu angaanga e te au tu ravarai o te tangata. Manako tetai aronga tei turuia e te Pipiria, e ka akangateitei te aronga akakoromaki i te ikianga a tetai no te oraanga e te irinakianga, noatu kare ratou e āriki ana i te reira.
Ka rauka ainei i te Pipiria te tauturu i te tangata kia akakoromaki marie i roto i teianei ao?
To te Pipiria manako no te tu akakoromaki
Te akamaroiroi maira te Pipiria i te tu akakoromaki. Te karanga ra: “Kia kitea meitakiia oki to kotou maru i te tangata katoa.” (Philipi 4:5) Te akamaroiroi maira te Pipiria ia tatou kia akono i te katoatoa ma te tu manako meitaki, te maru, e te tau. Penei kare teia aronga e mareka me kore e aru i te oraanga o tetai ke, inara ka tuku ua ratou i te reira tangata kia rave i tana i inangaro.
Te akakite maira te Pipiria i to te Atua au turanga no te tangata. Te karanga ra: “Kua akakite mai [te Atua] kia koe, e te tangata na, i te mea meitaki.” (Mika 6:8) Te akaari maira te reira i ta te Atua arataki anga i te tangata ma te oraanga mataora.—Isaia 48:17, 18.
Kare te Atua i akamana ia tatou kia akava i tetai ke. Karanga te Pipiria, “Okotai oki Tumu o te Ture . . . Koai oki koe ka akaapaʼi koe ia etai ke?” (Iakobo 4:12) Kua oronga mai te Atua i te tikaanga kia iki tatou i ta tatou ka rave e kia akono i te reira.—Deuteronomi 30:19.
To te Pipiria manako no te tu akangateitei
Te karanga ra te Pipiria “e akangateitei atu i te tangata ravarai.” (1 Petero 2:17) Pouroa te aronga tei aru i te Pipiria, ka akono ratou i te tangata ravarai ma te tu akangateitei, noatu eaa te irinakianga e te oraanga. (Luka 6:31) Kare te aiteanga e ka āriki ua ratou i te au irinakianga e te au manako ravarai o tetai ke e te turu i ta ratou au ikianga. Mari ra kare ratou e akaari i te tu kino e te akangateitei kore, ka aru ratou i to Iesu tu akono meitaki.
Ei akaraanga, kua aravei a Iesu i tetai vaine noatu kare aia e mareka ana i tana akonoanga. Te noo katoa ra teia vaine ki te tane kare aia i akaipoipo—e oraanga kare a Iesu e mareka ana. Noatu ra, kua tuatua aia ki teia vaine ma te tu akangateitei.—Ioane 4:9, 17-24.
Mei ia Iesu, ka akamārama te au Kerititiano i ta ratou irinakianga ki te aronga tei inangaro ma te tu “kauraro marie.” (1 Petero 3:15) Kua apii te Pipiria i te au Kerititiano eiaa e maro atu i to ratou au manako. Te karanga ra “kare oki te tavini o te Atu nei e tika kia māro; kia maru ra aia i te tangata katoa nei,” pera te aronga akonoanga tukeke.—2 Timoteo 2:24.
To te Pipiria manako no te tu makitakita
Te akakite maira te Pipiria “e umuumu i te au i te tangata katoa nei.” (Ebera 12:14) Ka kopae te tangata akamoeau i te tu makitakita. Noatu kare aia e kopae i tona uaorai irinakianga, ka tauta ra aia i te noo au ua. (Mataio 5:9) Te akamaroiroi katoa ra te Pipiria i te au kerititiano kia aroa atu i to ratou enemi na te takinga meitaki anga i te aronga tei takinokino mai ia ratou.—Mataio 5:44.
E tika, te karanga ra te Pipiria “e riri,” e “e mea viivii,” na te Atua te au angaanga tei akangateitei kore e tei takinga kino i tetai ke. (Maseli 6:16-19) Kua taangaanga te Pipiria i te tuatua “riri” ei akatutu i te riri anga no te au angaanga kino. Te akaari maira te Pipiria e te puareinga ua ra te Atua i te akakore e te tauturu i te tangata tei inangaro i te taui e kia aru i tona au turanga.—Isaia 55:7.
Te au irava no te tu akakoromaki e te akangateitei
Tito 3:2: “Kia maru ra, e te akono i te mea maru i te tangata katoa ra.”
Ka akangateitei tetai tangata meitaki i te au manako tukeke o tetai ma te tu maru, te akangateitei anga i tetai e tetai.
Mataio 7:12: “E te au mea katoa ta kotou i anoano ia etai ke ra, na reira katoa kotou ia ratou.”
Rekareka tatou me akangateitei mai tetai ia tatou ma te āriki i to tatou au manako ngakau. Kia kite maata atu akapeea me taangaanga i teia ture ngateitei na Iesu, akara i te atikara “What Is the Golden Rule?”
Iosua 24:15: “E akataka ana kotou i teianei rā i ta kotou e akamori.”
Me akangateitei tatou i te tika anga o tetai kia iki i tana ka inangaro i te rave, te akono ra tatou i te tu au.
Angaanga 10:34: “Kare te Atua e akono i te tu o te tangata.”
Kare te Atua e iriiri ana i te tangata ma ta ratou peu, te tane me kore te vaine, te enua, te iti tangata, me kore te oraanga. Te aronga tei aru i to te Atua tu, ka akangateitei ratou i te tangata ravarai.
Habakuka 1:12, 13: Kare “[te Atua] e akara mai ei i te aronga aru.”
Kare te Atua e akakoromaki ua atu. Kare aia e akatika i te tangata kino kia aere ua atu i tona aerenga kino. Kia kite maata atu, akara i te vitio Eaa ra te Atua i Akatika ai i te Mamae Kia Tupu?
Roma 12:19: “Tuku ua atura i te riri [o te Atua]; kua tataia oki e, “Te tuatua maira [Iehova], ei iaku te akaoko, e naku e tutaki atu.” a
Kare te Atua ko Iehova i akamana i tetai ua atu kia akaoko. Ka rave aia i te tika i tona uaorai taime. Kia kite maata atu, tatau i te atikara “Ka Rongoia Ainei te Kapiki Anga no te Tu Tika?”
a Ko Iehova to te Atua ingoa. (Salamo 83:18) Akara i te atikara “Koai a Iehova?”
Ka Reka Katoa Koe i Teia
TAUI TE PIPIRIA I TE ORAANGA
Aea te Aroa Tiratiratu e Autu ei ki Rungao i te tu Makitakita?
E ngatā i te autu i te tu makitakita. Akara mai akapeea tetai tangata ngati Iuda e te tangata Arapia i te autu anga i te reira.
AU UIANGA A TE TANGATA
Te Irinaki ra Ainei te Au Kite o Iehova e na Ratou ua te Akonoanga Tika Tikai?
Kua tuatua ainei a Iesu e e maata te mataara e arataki atura ki te ora?
AU UIANGA A TE TANGATA
Eaa ra te Au Kite o Iehova i Tutu Aere ei Mei Tera Are ki Tera Are? Kia Akaoraia Ainei Ratou?
Apii i ta matou i irinaki no runga i te oraanga mutu kore e akapeea e rauka ai te reira.
NO RUNGA IA MATOU
Pati i Tetai Atoroanga
Uriuri i tetai uianga Pipiria, e e akara kia kite maata atu i te Au Kite o Iehova.
