Inu Kava—Akapeea Koe me Akatere i te Reira?
E inu maata ana tetai aronga i te kava me apiapi e me maromaroa ratou. Te inu maata ra ainei koe i te reira mei to mua ana? Me koia ia, akapeea koe me akapapu e kare koe e inu maata me kore e irinaki ua ki te reira? Akamanako ana i teia au ravenga te ka tauturu ia koe.
Eaa te maata taau ka tau kia inu?
Akakite te Pipiria e: “Auraka koe e kapiti katoa ki te aronga i kona i te wina ra.”—Maseli 23:20.
Akamanako: Kare te Pipiria i ture ana i te inu kava. (Koheleta 9:7) Inara, kua akataka mai te reira i te tuke o te inu tau ua, te inu maata e te kona kava. (Luka 21:34; Ephesia 5:18; Tito 2:3) Noatu me kare te tangata e kona i te kava, ko te inu maata ra ka takino te reira i taau ikianga, toou oraanga e toou pirianga ki tetai ke.—Maseli 23:29, 30.
Kua kite te au aronga akaaere i te tuke i rotopu i te aronga inu tau ua e te aronga inu maata na roto i te numero o te kava ta ratou ka inu i te rā okotai e te numero ta tetai ka inu i te epetoma. a Tukeke te manako o te tangata no te inu kava, e tetai taime ko te ikianga meitaki, koia oki auraka e inu. Akakite te World Health Organization:
“E tai me kore e rua karati kava, e maata rai te reira—ei akaraanga:
Me akaoro me kore me taangaanga i tetai matini.
Te nui ra me kore te angai ra tetai metua vaine i tana pepe ki tona ū.
Te kai ra i te vairakau a te taote.
Me e turanga maki toou.
Me kare e rauka i te akatere i taau inu kava.”
Akapeea koe e kite ei e te irinaki ra koe ki te kava
Akakite te Pipiria e: “E kimi tatou, e e unuunumou marie, i to tatou au aerenga.”—Te Aue o Ieremia 3:40.
Akamanako: Ka paruru koe ia koe uaorai mei te kino o te kava me kimi matatio koe i taau inu kava e kia rave i te au tauianga ka anoanoia. Akara no teia au akairo te ka akaari mai e te irinaki ra koe ki te kava.
Irinaki koe ki te kava kia tupu te mataora. Te manako ra koe e na te inu kava e rauka ai te tu maru, te taokotai ki tetai ke e te mataora. Ka inu koe kia akakoromaki i toou au manamanata.
Maata atu taau ka inu i to mua ana. Kua inu putuputu koe. Kua pakari atu e kua maata taau kava ka inu i mua ake ka kite ei koe i te tuke.
Akatupu taau inu kava i te manamanata ki toou ngutuare e taau ngai angaanga. Ei akaraanga, ka akapou maata koe i taau moni no te oko kava.
Rave koe i te au ikianga tarevake a muri ake, mei te akaoro, te pai vai, me kore te taangaanga anga i tetai matini.
Ka manata tetai ke i taau inu kava. Me akakite mai ratou kia koe, ka riri koe i ta ratou tuatua. Ka tauta koe i te uuna i taau inu kava mei tetai ke, me kore ka pikikaa koe i te maata o taau i inu.
Kare e rauka ia koe i te akamutu. Kua tauta koe i te akaiti, me kore i te akamutu i taau inu kava inara kare i rauka.
E rima ravenga tauturu no te akatere i taau inu kava
1. Parani.
Akakite te Pipiria e: “Te kimianga o te aronga maroiroi ra, tei runga ïa i te apinga maata.”—Maseli 21:5.
Tamata i teia: Iki i te au rā o te epetoma ka inu koe. Akanoo eaa te maata o te kava taau ka inu i taua au rā ra. E oti akanoo e rua rā i roto i tera epetoma, e kare koe e inu kava.
“Ko te akangaroi putuputu mei te inu kava te ravenga meitaki rava atu i te akaiti mai i taau irinakianga ki te kava,” i karanga ai te U.K.-based alcohol education charity.
2. Taangaanga i taau parani.
Akakite te Pipiria e: “E akaope ua i te rave i taua mea ra.”—2 Korinetia 8:11.
Tamata i teia: Kimi eaa te vaito o te karati kava kia rauka ia koe i te tare meitaki i taau ka inu. Kimi i te au vai inu kare e kava i roto e ka reka koe i te inu.
“Ka riro te au tauianga rikiriki i te akaiti te au manamanata ta te kava ka akatupu,” i karanga ai te U.S. National Institute on Alcohol Abuse and Alcoholism.
3. Tamou ki taau ikianga.
Akakite te Pipiria e: “E te au taputou koia, ei koia; e ta kotou kare, ei kare.”—Iakobo 5:12.
Tamata i teia: Kia papa ua i te karanga maru atu e “Kare” me oronga mai tetai tangata i te kava te ka tamanamanata i taau parani.
“Te viviki ia koe i te karanga kare ki te kava, ka rauka ia koe te tamou ki taau ikianga,” i karanga ai te U.S. National Institute on Alcohol Abuse and Alcoholism.
4. Akamou ki runga i te puapinga o taau ikianga.
Akakite te Pipiria e: “E ngari ake te openga ra i te akamataanga.”—Koheleta 7:8.
Tamata i teia: Tata i te au tumu ka inangaro koe i te akatere i taau inu kava. Pera katoa kia moe meitaki koe, meitaki toou oraanga, te turanga o te moni e toou pirianga ki tetai ke. Me akakite koe i taau ikianga ki tetai ke, e akamou ki runga i te puapinga ka rauka mai e auraka ki runga i te au timataanga.
5. Pati i te tauturu a te Atua.
Akakite te Pipiria e: “E tika iaku te au mea ravarai nei i te Mesia, ko tei akamaroiroi mai iaku nei.”—Philipi 4:13.
Tamata i teia: Me te manata ra koe i taau inu kava, e pure ki te Atua no te tauturu. Pati i tana akamaroiroi e no te akakoromaki. b E apii i tana Tuatua, te Pipiria, kia rauka te pakari. Me irinaki koe kiaia, ka rauka ia koe i te akatere meitaki i taau inu kava.
a Ei akaraanga, akakite te U.S. Department of Health and Human Services e ko te inu maata, koia oki “e 4 karati me kore e maata atu i te rā okotai, me kore e 8 karati me kore e maata atu i te epetoma no te au vaine, e e 5 karati me kore e maata atu i te rā okotai, me kore e 15 karati me kore e maata atu i te epetoma no te au tane.” Tukeke te vaito o te karati o te kava i te au enua, no reira e aravei i toou taote no te akapapu i te maata o te kava ka tau kia koe.
b Me kare e rauka ia koe te akatere i taau inu kava, penei ka anoanoia koe i te kimi i te tauturu a te taote.