KIA MATAKITE!

Te Akonoanga e te Tamaki i Ukraine—Eaa ta te Pipiria e Akakite Maira?

AKATANGI

Akamanako ana i teia no te au arataki akonoanga e te tamaki i Ukraine:

“Kare te arataki o te Russian Orthodox Church, ko Patriarch Kirill, i patoi ana i ta Russia tamaki anga. . . . Ko te au tuatua pikikaa a te Akonoanga no Ukraine kua [taangaangaia] e Putin ei akakoroanga nona kia tamaki.”—EUobserver, Mati 7, 2022.
“Kua akaari a Patriarch Kirill . . . e kua turu aia e kia tomoia a Ukraine—na te akakite anga e tamaki anga teia no te patoi i tona au apa.”—AP News, Mati 8, 2022.
“Kua akameitaki te arataki o te Ukrainian Orthodox Church, Metropolitan Epiphanius I o Kyiv, i te Monite, i tona iti tangata kia ‘tamaki atu ia Russia’ . . . Karanga katoa [aia] e kare i te ara kia tamate i te au vaeau o Russia.”—Jerusalem Post, Mati 16, 2022.
“Ko matou [te Ukrainian Council of Churches and Religious Organizations (UCCRO)] te turu nei i te Nuku Vaeau o Ukraine e to matou aronga tauturu, te akameitaki nei matou ia ratou no te paruru ia Ukraine mei te aronga tamaki, e te pure nei no ratou.”—UCCRO a Statement, Peperuare 24, 2022.

Eaa toou manako? Kua tau ainei te au akonoanga tei karanga e te aru ra ratou ia Iesu Karaiti kia akakeu i to ratou mema kia tamaki? Eaa ta te Pipiria e akakite maira?

Te tuatua enua o te akonoanga i roto i te tamaki

Te akaari maira te tuatua enua e kua āriki te au akonoanga e kua akatika, me kore kua turu i te au tamaki e i taua taime rai kua akatupu i te ‘au. E ngauru ua atu mataiti i teianei, kua akakite te Au Kite o Iehova i teia tu pikikaa o te au akonoanga. Ka akara ana i tetai au akaraanga i roto i ta matou puka.

“The Crusades—A ʻTragic Illusion’” te akaari maira e kua apa te Roman Catholic Church no te tamate anga rikarika tei raveia i roto i te ingoa o te Atua e Karaiti.
“The Catholic Church in Africa” te akaari maira e kare te au akonoanga i tāpu ana i te tamaki i rotopu i te au kopu, matemate atura te tangata.
Te au atikara “No te Akonoanga Ainei te Apa?,” “Religion’s Role in Man’s Wars,” e te “Religion Takes Sides” te akamārama maira e kua turu te au orometua Katorika, Orthodox, e te Porotetani i te nga tua o te au tamaki.

Ka turu ainei te au akonoanga Kerititiano i te tamaki?

Ta Iesu i apii: “E aroa atu koe i toou tangata tupu mei te aroa ia koe uaorai.” (Mataio 22:39) “E aroa atu i to kotou aronga enemi.”—Mataio 5:44-47.

Akamanako: Ka rauka ainei i tetai akonoanga te tuatua e te aru ra ratou i ta Iesu akaueanga no te aroa e i taua taime rai te akakeu ra i to ratou au mema kia tamate i tetai i te tamaki? No te pauanga, e tatau i te au atikara “True Christians and War” e te “Is It Possible to Love One’s Enemies?”

Ta Iesu i tuatua: “Kare to teianei ao taku basileia: naringa no teianei ao taku basileia, kua akamaroiroi ïa toku au tavini, kia kore au e tukuia.” (Ioane 18:36) “Ko tei rave i te koke ra, ka mate ïa i te koke.”—Mataio 26:47-52.

Akamanako: Kare te au Kerititiano i tamaki e te paruru ia Iesu, ka tau ainei ratou kia rave i te koke noatu eaa te akakoroanga? E tatau i te atikara “Te Au ra Ainei te Tamaki ki te Akonoanga Kerititiano?” kia kite e kua aru tiratiratu te au Kerititiano o mua ana i te akaraanga o Iesu e tana apiianga.

Eaa te ka tupu ki te au akonoanga e turu ra i te tamaki?

Te apii ra te Pipiria e kua patoi te Atua i te au akonoanga e karanga ra e te aru ra ratou ia Iesu kare ra i akono i tana au apiianga.—Mataio 7:21-23; Tito 1:16.

Te akaari maira te puka o Apokalupo e te akaapa ra te Atua i teia au akonoanga no te mate o “te aronga katoatoa i taia i teianei ao.” (Apokalupo 18:21, 24) Kia kite i te tumu, e tatau i te atikara “Eaa a Babulonia Maata?”
Te akakite maira a Iesu no te au akonoanga pouroa tei patoiia e te Atua, ka takoreia no ta ratou au angaanga kino, mei te rakau kikino e ua mai i te ua kino e “tipuia ïa, e ka titiriia ki roto i te ai.” (Mataio 7:15-20) E tatau i te atikara “Te Vaitata Maira te Openga no te Akonoanga Pikikaa!” kia kite akapeea teia e tupu ei.

Tuke te Au Kite o Iehova

I Russia e Ukraine, e te ao katoa, te akarongo ra te Au Kite o Iehova i ta Iesu au akaueanga kia akatakake mai mei te angaanga poritiki e auraka e tamaki. No teia tumu, kare matou e piri atu e kare e turu i teia tamaki e tetai ua atu. No to matou irinakianga Pipiria, kua takinokinoia tetai pae Au Kite. (Ioane 15:19, 20; 2 Timoteo 3:12) Ei akaraanga, kua titiri te kavamani o Russia i te Au Kite o Iehova ki roto i te are auri e kua takinokino i tetai pae. Kua raveia to matou au are akamorianga. Kia kite maata atu, aere ki te www.jw-russia.org.

Akara i te vitio e a miniti Jehovah’s Witnesses in Irkutsk Remain Faithful Despite Brutal Home Raids kia kite e kua takinokinoia te Au Kite o Iehova i Russia no to ratou akarongo.
Kua vai takake te Au Kite o Iehova no tetai tuatau roa. Akara i te vitio Ngaueue Kore Noatu te Patoianga kia kite e kua vai takake ratou noatu te takinokino anga a te Nazi Germany e te Soviet Union i mua ana.

E akara i ta matou website kia kite maata atu i to matou irinakianga, pera te taputou a te Pipiria e kare e tamaki a te tuatau ki mua. (Isaia 2:4; Ieremia 29:11) Te patiia nei koe kia aravei mai ia matou kia kite maata atu.

Photo credits, kaui ki te katau: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a Te UCCRO, me kore Ukrainian Council of Churches and Religious Organizations, ka kapiti mai e 15 akonoanga Orthodox, Greek e te Roman Catholic, Porotetani, e te au akonoanga Evangelical pera te au ngati Iuda e te au Muslim.